କୋଲକାତା,୨୨ା୭:ଭାଜପା ନେତୃତ୍ୱାଧୀନ କେନ୍ଦ୍ରର ନରେନ୍ଦ୍ର ମୋଦି ସରକାର ଅଳ୍ପାୟୁ। ସଂଖ୍ୟାବଳ ନ ଥାଇ ଏଣୁତେଣୁ କରି କ୍ଷମତାସୀନ ହୋଇଥିବା ଏହି ସରକାର ଖୁବ୍ଶୀଘ୍ର ଭାଙ୍ଗିଯିବ ବୋଲି ରବିବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ଭବିଷ୍ୟବାଣୀ କରିଛନ୍ତି।
କୋଲକାତାରେ ତୃଣମୂଳ କଂଗ୍ରେସ (ଟିଏମ୍ସି)ର ବାର୍ଷିକ ଶହୀଦ ଦିବସ ପାଳନ ଅବସରରେ ସମାଜବାଦୀ ପାର୍ଟି (ଏସ୍ପି) ଅଧ୍ୟକ୍ଷ ଅଖିଳେଶ ସ୍ବତନ୍ତ୍ର ନିମନ୍ତ୍ରିତ ଅତିଥି ଭାବେ ଯୋଗ ଦେଇଥିଲେ। ଟିଏମ୍ସି ସୁପ୍ରିମୋ ମମତା ରାଲିକୁ ସମ୍ବୋଧିତ କରି କହିଥିଲେ, କେନ୍ଦ୍ରର ଏନ୍ଡିଏ ସରକାର କ୍ଷମତାରେ ଅଧିକ ଦିନ ରହିପାରିବ ନାହିଁ। ଭାଜପା ଏବଂ ଏହାର କୁଶାସନକୁ ହଟାଇବା ପାଇଁ ଅଖିଳେଶଙ୍କ ସମେତ ଇଣ୍ଡିଆ ବ୍ଲକ୍ର ସମଭାବାପନ୍ନ ଦଳଗୁଡ଼ିକ ମିଳିତ ଭାବେ କାର୍ଯ୍ୟ କରିବେ। ଭାଜପାର ସଂଖ୍ୟାବଳ ନାହିଁ। କିନ୍ତୁ ଅନ୍ୟ ଛୋଟ ଦଳଗୁଡ଼ିକର ଏମ୍ପିମାନଙ୍କୁ କିଣାକିଣି କରି ସରକାର ଗଢ଼ିଛି। ଅଖିଳେଶ ଯେଉଁ ଖେଳ କରିଥିଲେ, ସେଥିରେ ୟୁପିରେ ଯୋଗୀ ସରକାର ଇସ୍ତଫା ଦେବାକୁ ବାଧ୍ୟ ହୋଇଥାନ୍ତେ। କିନ୍ତୁ କେନ୍ଦ୍ରୀୟ ଏଜେନ୍ସିଗୁଡ଼ିକର ଦୁରୁପଯୋଗ କରି ଏହି ନିର୍ଲଜ୍ଜ ସରକାର ତିଷ୍ଠି ରହିଛି ବୋଲି ମମତା ସମାଲୋଚନା କରିଛନ୍ତି।
ଏସ୍ପି ମୁଖ୍ୟ ଅଖିଳେଶ କହିଛନ୍ତି, ୟେ ଦିଲ୍ଲୀ ସରକାର ଚାଲିବ ନାହିଁ। ଖୁବ୍ଶୀଘ୍ର ଏହାର ପତନ ଘଟିବ। ଲୋକଙ୍କ କଥା ଆଦୌ ବୁଝୁ ନ ଥିବା ସରକାର ଭାଙ୍ଗିଗଲେ ଜନସାଧାରଣ ଖୁସି ହେବେ। ନକାରାତ୍ମକ ଓ ସାମ୍ପ୍ରଦାୟିକ ରାଜନୀତିରେ ବିଶ୍ୱାସ କରୁଥିବା ଭାଜପାକୁ ହଟାଇବା ଏବଂ ସମ୍ବିଧାନର ସୁରକ୍ଷା ପାଇଁ ଆମ ସମସ୍ତଙ୍କୁ ଏକାଠି ହେବାକୁ ପଡ଼ିବ। ମମତା ବିଭାଜନବାଦୀ ରାଜନୀତିକୁ ପରାଜିତ କରିଥିବାବେଳେ ତାଙ୍କ ସହ ଉତ୍ତରପ୍ରଦେଶ ମଧ୍ୟ ଲଢ଼େଇରେ ସାମିଲ ହୋଇଛି। କେନ୍ଦ୍ରୀୟ ଏଜେନ୍ସି ଓ ନିର୍ବାଚନ କମିଶନଙ୍କ ଦୁରୁପଯୋଗ ଆଉ ଚାଲିବ ନାହଁି। ମୋଦି ସରକାର ଯେକୌଣସି ସମୟରେ ଭାଙ୍ଗିଯିବ ବୋଲି ଅଖିଳେଶ କହିଛନ୍ତି।
