ଖଇରା,୨୭ା୪(ଉତ୍କଳବନ୍ଧୁ ପଣ୍ଡା): ବାଲେଶ୍ୱର ଜିଲା ଖଇରା ଥାନା ମାଖନପୁର ପଞ୍ଚାୟତ ଅଧୀନ ସାଉଣ୍ଡିଆ କୁତୁପୁର ଗାଁରେ ଜଙ୍ଗଲୀ ଦନ୍ତା ଅଟକି ରହିଥିବା ବେଳେ ଗ୍ରାମବାସୀ ଆତଙ୍କିତ ହୋଇ ରହିଛନ୍ତି। ହାତୀଟି ଗ୍ରାମର ବୃଦ୍ଧ ରତ୍ନାକର ମହାନ୍ତିଙ୍କୁ ଗୋଡ଼ାଇବାରୁ ବୃଦ୍ଧ ଜଣକ ତଳେ ପଡ଼ିଯାଇ ଖଣ୍ଡିଆ ଖାବରା ହୋଇଛନ୍ତି। ହାତୀଟି ଗାଁରେ ଥିବା ଏକ କିଆବୁଦା ଜଙ୍ଗଲ ଭିତରେ ପଶି ରହିଥିବା ବେଳେ ଅଞ୍ଚଳବାସୀ ବାହାରକୁ ବାହାରି ପାରୁନାହାନ୍ତି। ଖବର ପାଇ କୁପାରି ବନବିଭାଗର ଏକ ଟିମ୍ ଘଟଣାସ୍ଥଳରେ ପହଞ୍ଚି ହାତୀଟିକୁ ଜଙ୍ଗଲକୁ ଘଉଡ଼ାଇବାକୁ ଚେଷ୍ଟା ଚଳାଇଛନ୍ତି।
ଅନ୍ୟପଟେ ବନବିଭାଗ ପକ୍ଷରୁ ଗ୍ରାମବାସୀଙ୍କୁ ଘର ବାହାରକୁ ନ ବାହାରିବାକୁ ସତର୍କ କରାଇଛନ୍ତି। ଉକ୍ତ ହାତୀଟି ରବିବାର ରାତିରେ କୁପାରି ଶାରୀଶୁଆ ପାହାଡ଼ରୁ ଆସି ଗଡ଼ପୋଖରୀ ପଞ୍ଚାୟତର ଗଗୁଆ,ସିମୁଳିଆ,ବଡଦାଣ୍ଡ ଇତ୍ୟାଦି ଗାଁରେ ଥିବାବେଳେ ଆଜି ସକାଳେ ଖଇରା, ବଟେଶ୍ୱର,ମହତୀପୁର,କୁରୁଣ୍ଟା, ବାଗଡିଆ ଦେଇ ମାଖନପୁର ପଞ୍ଚାୟତର କୁତୁପୁରରେ ଗାଁରେ ପହଞ୍ଚିଛି।
