ବାରିପଦା ଅଫିସ,୨୬ ।୨ କୌଳିକ ବୃତ୍ତିିକୁ ଆପଣାଇ ପରିବାର ଭରଣ ପୋଷଣ କରୁଥିବା କୁମ୍ଭକାର ପରିବାର ଏବେ ଚିନ୍ତାରେ। ଏହି କାରିଗରଙ୍କ ପ୍ରତି ସରକାରୀ ଅଧିକାରୀମାନେ ଅବହେଳା କରୁଥିବାରୁ ସେମାନେ ଦୁର୍ଦ୍ଦିନରେ କାଳ କାଟୁଛନ୍ତି। କରୋନା କଟକଣା ପାଇଁ ଦୁଇ ବର୍ଷ ହେଲା ଦୀପାବଳି, ଜାଗର ସମେତ ଅନ୍ୟାନ୍ୟ ପୂଜାପାର୍ବଣ ସ୍ବାଭାବିକ ଭାବେ ପାଳନ ହେଉ ନ ଥିବାରୁ କୁମ୍ଭକାର ପରିବାର ବହୁ ଅସୁବିଧାରେ ଚଳୁୁଛନ୍ତି। ତେବେ ବର୍ଷରେ ଦୁଇଥର ଦୀପାବଳି ଓ ଶିବରାତ୍ରୀରେ ମାଟି ଦୀପ ବହୁଳ ବ୍ୟବସାୟ ହେଉଥିବା ବେଳେ ଚଳିତ ବର୍ଷ ଜାଗର ସମୟରେ ମନ୍ଦିରରେ ଦୀପ ଜାଳିବା ପାଇଁ ପ୍ରଶାସନ ଅନୁମତି ଦେଉ ନ ଥିବାରୁ ମାଟି ଦୀପ ବେପାର ମାନ୍ଦା ପଡ଼ିଛି।
ପ୍ରସ୍ତୁତ ସାମଗ୍ରୀ ବିକ୍ରି ପାଇଁ କାରିଗରମାନେ ବାରିପଦା ସ୍ଥିତ ଷ୍ଟେଶନ ବଜାର ହାଟରେ ପସରା ମେଲାଇଛନ୍ତି।
ଯୁଗ ବଦଳିବା ସହିତ ମାଟି ସାମଗ୍ରୀର ଚାହିଦା ବଢ଼ିବାରେ ଲାଗିଛି। ମାଟିକୁ ସୁନ୍ଦର ଆକୃତି ଦେଇ କାରିଗରମାନେ ବିଭିନ୍ନ ସାମଗ୍ରୀ ପ୍ରସ୍ତୁତ କରୁଛନ୍ତି। ଜାଗର ପାଇଁ ଆବଶ୍ୟକ ମାଟିଦୀପ ପ୍ରସ୍ତୁତି ପାଇଁ କୁମ୍ଭକାର ପରିବାର ୩/୪ ମାସ ପୂର୍ବରୁ ପ୍ରସ୍ତୁତି ଆରମ୍ଭ କରିଥାନ୍ତି।
ତେବେ ୫ଦିନ ପରେ ଶିବରାତ୍ରୀ ବା ଜାଗର ଅନୁଷ୍ଠିତ ହେବାକୁ ଥିବା ବେଳେ ପ୍ରଶାସନ ତରଫରୁ ଅଦ୍ୟାବଧି କୌଣସି ନିୟମାବଳୀ ପ୍ରକାଶ ପାଇ ନ ଥିବାରୁ ବ୍ରତୀମାନେ ଅନିଶ୍ଚିତତା ମଧ୍ୟରେ ରହିଛନ୍ତି ା ଶୈବ ପୀଠରେ ଦୀପ ଜାଳିବା ନେଇ ଅନୁମତି ମିଳି ନ ଥିବାରୁ ମାଟିଦୀପ ବିକ୍ରି ମାନ୍ଦା ପଡ଼ିଛି ବୋଲି କୁମ୍ଭକାର ରାଜେନ୍ଦ୍ର ପ୍ରଜାପତି ପ୍ରକାଶ କରିଛନ୍ତି।
ସେହିପରି ୫୦ବର୍ଷ ଧରି କୌଳିକ ବୃତ୍ତିିକୁ ଆପଣାଇଥିବା ୧୧ନଂ. ୱାର୍ଡ ଢିପାସାହିର ବାସିନ୍ଦା ସାବିତ୍ରୀ ପ୍ରଜାପତି କୁହନ୍ତି, ଷ୍ଟିଲ, ଲୁହା ଓ ପ୍ଲାଷ୍ଟିକ ପାତ୍ରରେ ରନ୍ଧା ଖାଦ୍ୟ ଖାଇ ଲୋକେ ରୋଗାକ୍ରାନ୍ତ ହେଉଥିବାରୁ ମାଟିପାତ୍ର ଉପରେ ଭରସା ବୃଦ୍ଧି ପାଇଛି। ଆବଶ୍ୟକ କଞ୍ଚାମାଲ ଓ ଜାଳେଣି କାଠର ଦରବୃଦ୍ଧି ପାଇଁ ମାଟିପାତ୍ରରୁ ଉଚିତ ମୂଲ୍ୟ ମିଳିପାରୁ ନାହିଁ। ସେହିପରି ଉପଯୁକ୍ତ ବଜାର ବ୍ୟବସ୍ଥା ଓ ଗୋଦାମଗୃହ ଅଭାବରୁ କାରିଗରମାନେ କ୍ଷତି ସହୁଛନ୍ତି ବୋଲି ଦ୍ୱାରିକା ଦାସ ପ୍ରଜାପତି କହିଛନ୍ତି। ମହିଳା କାରିଗର ଆଶା ରାମ କୁହନ୍ତି, ଦୀର୍ଘ ୩୫ବର୍ଷ ଧରି ମାଟି ସାମଗ୍ରୀ ବିକ୍ରି କରି ଦିନକୁ ୨/୩ଶହ ଟଙ୍କା ରୋଜଗାର କରି ୬ପ୍ରାଣୀ କୁଟୁମ୍ବଙ୍କୁ ଚଳାଇ ଆସୁଛି। ସରକାରୀ ସ୍ତରରେ ସୁବିଧା ସୁଯୋଗ ଯୋଗାଇ ଦିଆଗଲେ ମାଟିପାତ୍ରର ଚାହିଦା ବୃଦ୍ଧି ହେବା ସହ କୌଳିକ ବୃତ୍ତିି ବଞ୍ଚିରହିବ ବୋଲି ସେ କହିଛନ୍ତି।
