ଦାରିଙ୍ଗବାଡ଼ି,୧୪ା୬(ଅରୁଣ ସାହୁ): ଦୈନିକ ଶହଶହ ପର୍ଯ୍ୟଟକ ଦାରିଙ୍ଗବାଡ଼ି ବୁଲୁଛନ୍ତି। ଗ୍ରୀଷ୍ମ ପ୍ରବାହ ସତ୍ତ୍ୱେ ଖରାଛୁଟିରେ ଛାତ୍ରୀଛାତ୍ର ପରିବାର ସହ ଦାରିଙ୍ଗବାଡ଼ିର ବିଭିନ୍ନ ପର୍ଯ୍ୟଟନକ୍ଷେତ୍ର ଏହି ପରିପ୍ରେକ୍ଷୀରେ ଉକ୍ତ ବ୍ଲକର ପର୍ଯ୍ୟଟନକ୍ଷେତ୍ର ହିଲ୍ଭିୟୁ ପାର୍କ ସମେତ ନେଚର ପାର୍କ, କଫି ବଗିଚା, ମିଡିୟୁବାନ୍ଦା ଜଳପ୍ରପାତ, କିସୁବାଡ଼ି ଜଳପ୍ରପାତ, ଲଭର୍ସ ପଏଣ୍ଟ ଆଦି ଅଞ୍ଚଳରେ ପର୍ଯ୍ୟଟକଙ୍କ ଭିଡ଼ ଜମିଛି। ତେବେ ଡୁଲୁରୀ ପାଇନବଣରେ ବଣଭୋଜି କରି ମଜା ନେଉଛନ୍ତି ପର୍ଯ୍ୟଟକ। ତେବେ ଶୀତଦିନ ଅକ୍ଟୋବରଠାରୁ ଜାନୁଆରୀ ପର୍ଯ୍ୟନ୍ତ ପର୍ଯ୍ୟଟକଙ୍କଠାରୁ ଟିକେଟ୍ ସଂଗ୍ରହ କରାଯାଉଥିବା ବେଳେ ତା’ ପରଠାରୁ ଡୁଲୁରୀ ପାଇନବଣର ମୁଖ୍ୟ ଫାଟକ ଖୋଲା ରହୁଛି। ଫଳରେ ଉକ୍ତ ବଣ ମଧ୍ୟରେ ଅସାମାଜିକ କାର୍ଯ୍ୟକଳାପ ବୃଦ୍ଧି ହେବା ସହ ଖାଲି ମଦ ବୋତଲ ଏଣେ ତେଣେ ପଡ଼ିବା ସହ ପ୍ଲାଷ୍ଟିକ, ପଲିଥିନ୍, ଅଇଁଠା ଖଲିପତ୍ର ଏଣେତେଣେ ପଡ଼ିଛି ଫଳରେ ପୁତ୍ତିମୟ ଗନ୍ଧ ହେଉଛି। ଶୀତଦିନରେ ସ୍ଥାନୀୟ ପ୍ରଶାସନ ପକ୍ଷରୁ ମହିଳା ସ୍ବୟଂ ସହାୟିକା ଗୋଷ୍ଠୀକୁ ଏହାର ତଦାରଖ ଦାୟିତ୍ୱ ସହ ଟିକେଟ ସଂଗ୍ରହର ଦାୟିତ୍ୱ ଦିଆଯାଇଛି। ପ୍ରଶାସନ ସହ ସହାଭାଗିତାରେ ଏସ୍ଏଚ୍ଜି ମହିଳାମାନେ ମୁଖ୍ୟ ଫାଟକରେ ଟିକେଟ୍ ସଂଗ୍ରହ କରିବା ସହ ସଫେଇ କରି ପାଇନ ବଣକୁ ସ୍ବଚ୍ଛତା ରଖୁଥିଲେ। ଏବେ ଖୋଲା ଛାଡ଼ିଦେଇ ଥିବାରୁ ଲକ୍ଷ ଲକ୍ଷ ଟଙ୍କା ରାଜସ୍ବ ହାନି ହେଉଛି ବୋଲି ଜଣାପଡ଼ିଛି। ହିଲଭିୟୁ ମେ’ ମାସରେ ୯୦ ହଜାର ଟିକେଟ୍ ବାବଦକୁ ରୋଜଗାର କରିଥିବା ବେଳେ ଡୁଲୁରୀ ପାଇନ ବଣ ଶୂନ ରୋଜଗାର ହୋଇଛି। ଏବେ ବ୍ଲକ ପ୍ରଶାସନ ଉକ୍ତ ପାଇନବଣରେ ୮୫ ଲକ୍ଷ ଟଙ୍କା ଅନୁଦାନରେ ଶିଶୁ ଉଦ୍ୟାନ, ସେଲ୍ଫି ପଏଣ୍ଟ, ଗୋଷ୍ଠୀ ଶୌଚାଳୟ, ଭୋଜି ରାନ୍ଧିବା ପାଇଁ ପିଣ୍ଡି ବ୍ୟବସ୍ଥା ସହ ପର୍ଯ୍ୟଟକଙ୍କ ପାଇଁ ଆଶ୍ରୟ ସ୍ଥଳ, ମୁଖ୍ୟ ଫାଟକ, ସିମେଣ୍ଟ ବେଞ୍ଚ ବ୍ୟବସ୍ଥା ଆଦି କରିଥିବା ଜଣାପଡ଼ିଛି। କିନ୍ତୁ ମେକୁକା ଯୋଗୁ ଏବେ ସବୁ ଭଙ୍ଗାରୁଜା ହେବା ଆଶଙ୍କା ବୃଦ୍ଧି ପାଇଛି ଅସାମାଜିକ ଲୋକଙ୍କ ଆଡ୍ଡାସ୍ଥଳୀ ପାଲଟିଛି। ଏହାକୁ ହିଲଭିୟୁ ଦାୟିତ୍ୱ ନେଇଥିବା ସାଂଜାସରୁ ଉନ୍ନୟନ ଟ୍ରଷ୍ଟକୁ ରକ୍ଷଣାବେକ୍ଷଣ ଦାୟିତ୍ୱ ଦେବାକୁ ବିଭିନ୍ନ ସଂଗଠନ ପକ୍ଷରୁ କନ୍ଧମାଳ ଜିଲାପାଳଙ୍କ ନିକଟରେ ଦାବି ହୋଇଛି।
ଏନେଇ ବିଡିଓ ପ୍ରୀତିରଞ୍ଜନ ରଥଙ୍କୁ ପଚାରିବାରୁ ସେ କହିଛନ୍ତି, ଶୀତଦିନରେ ଡୁଲୁରୀରୁ ବ୍ଲକ ପ୍ରଶାସନ ଆକାଉଣ୍ଟକୁ ୭୦ ହଜାର ଆସିଛି ଏସ୍ଏଚ୍ଜି ଓ ପ୍ରଶାସନର ଭାଗ ଅଂଶରେ ସେତିକି ରୋଜଗାର ଆସିଛି ଯଦି ନିୟମିତ ଟିକେଟ ସଂଗ୍ରହ କରାଗଲେ ଅଧିକ ରାଜସ୍ବ ଆସିପାରିଥାନ୍ତା ବୋଲି ସେ କହିଛନ୍ତି। ଏନେଇ ଜିଲାପାଳ ଅମ୍ରିତ ଋତୁରାଜଙ୍କ ସହ ଯୋଗାଯୋଗ କରାଯିବାରୁ ସେ ଜୁନ୍ ପହିଲାରୁ ସାଂଜାସରୁ ଉନ୍ନୟନ ଟ୍ରଷ୍ଟକୁ ଦାୟିତ୍ୱ ଦିଆଯିବ। ଏନେଇ ସେ ବିଡିଓଙ୍କ ସହ ଆଲୋଚନା କରିଥିବା କହିଥିଲେ ସୁଦ୍ଧା ଆଜି ପର୍ଯ୍ୟନ୍ତ ମାସର ଅଧା ଦିନ ବିତିଯାଇଥିଲେ ମଧ୍ୟ ଡୁଲୁରୀ ପାଇନବଣ ମୁକୁଳା ପଡ଼ିଛି ତୁରନ୍ତ ଟ୍ରଷ୍ଟକୁ ଦାୟିତ୍ୱ ପ୍ରଦାନ ପାଇଁ ବିଭିନ୍ନ ମହଲରୁ ଦାବି ଉଠୁଛି।
