ଢେଙ୍କାନାଳ ଅଫିସ, ୨୮।୮: ଦୀର୍ଘ ୨୦ ଘଣ୍ଟା ପରେ ବି ମିଳିଲାନି ରକ୍ତ ନମୁନା ପରୀକ୍ଷା ରିପୋର୍ଟ। ପେଟ ଯନ୍ତ୍ରଣାରେ ଛଟପଟ ହେଉଥିବା ସାନଭାଇକୁ ଦେଖିବାକୁ ନେହୁରା ହେବା ସତ୍ତ୍ୱେ ମୋବାଇଲରେ ବ୍ୟସ୍ତ ଥିବା ଡାକ୍ତର ଶୁଣିଲେ ନାହିଁ। ଓଲଟି କବାଟ କିଳିଦେଲେ। ସକାଳୁ କି ଇଞ୍ଜେକ୍ସନ ଦେଲେ କେଜାଣି, ଟିକେ ପୂର୍ବରୁ ଶୌଚାଳୟକୁ ଯାଇଥିବା ସାନଭାଇର ଜୀବନ ମାତ୍ର ୫ ମିନିଟ୍ ଭିତରେ ଚାଲିଗଲା। ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ଜଣେ ଯୁବକଙ୍କ ମୃତ୍ୟୁକୁ ନେଇ ଏଭଳି ଅଭିଯୋଗ ଆଣିଛନ୍ତି ତାଙ୍କ ବଡ଼ ଭାଇ। ସୁରକ୍ଷା ବ୍ୟବସ୍ଥାରେ ତ୍ରୁଟି ଯୋଗୁ ମେଡିକାଲ କୋଠାରୁ ଡେଇଁ ୨ଜଣ ରୋଗୀ ଆତ୍ମହତ୍ୟା କରିବା ଘଟଣାର ଚର୍ଚ୍ଚା ଥମି ନ ଥିବାବେଳେ ପୁନର୍ବାର ଚିକିତ୍ସା ଅବହେଳାରୁ ରୋଗୀମୃତ୍ୟୁ ଆଲୋଡ଼ନ ସୃଷ୍ଟି କରିଛି।
ଅଭିଯୋଗ ଅନୁଯାୟୀ, ଓଡ଼ାପଡ଼ା ବ୍ଲକ ମହୀଧରପୁର ଗ୍ରାମର ପବିତ୍ର ସେଠ୍ଙ୍କ ସାନପୁଅ ପିଙ୍କୁନ (୨୪) ଶୁକ୍ରବାର ପୂର୍ବାହ୍ନ ୧୦ଟାରେ ପେଟ ଯନ୍ତ୍ରଣା ସାଙ୍ଗକୁ ଜ୍ୱରରେ ଆକ୍ରାନ୍ତ ହୋଇ ଜିଲା ଚିକିତ୍ସାଳୟର ଭେଷଜ ବିଭାଗରେ ଭର୍ତ୍ତି ହୋଇଥିଲେ। ଶୁକ୍ରବାର ପୂର୍ବାହ୍ନରୁ ପରୀକ୍ଷା ପାଇଁ ରକ୍ତ ନମୁନା ନିଆଯାଇଥିବା ବେଳେ ଶନିବାର ଭୋର୍ ଯାଏ ଏହାର ରିପୋର୍ଟ ପ୍ରଦାନ କରାଗଲାନାହିଁ। ରାତିରେ ପିଙ୍କୁନଙ୍କ ସ୍ବାସ୍ଥ୍ୟାବସ୍ଥା ଅଧିକ ଗୁରୁତର ହୋଇପଡ଼ିଥିଲା। ପରିବାର ଲୋକେ ଦାୟିତ୍ୱରେ ଥିବା ଡାକ୍ତର ଓ କର୍ମଚାରୀଙ୍କୁ ଡାକିବାରୁ ସେମାନେ ମୋବାଇଲ୍ରେ ବ୍ୟସ୍ତ ଥିଲେ ବି ଆସି ନ ଥିଲେ। ବାରମ୍ବାର ଡାକିବାରୁ ବିରକ୍ତ ହୋଇ ରୁମ ବନ୍ଦ କରିଦେଇଥିଲେ। ଶନିବାର ଭୋର ସାଢେ ୫ଟାରେ ପିଙ୍କୁନ୍ଙ୍କ ପେଟ ଯନ୍ତ୍ରଣା ଅସହ୍ୟ ହେବାରୁ ଘର ଲୋକ ଡାକ୍ତରଙ୍କୁ ଡାକିଥିଲେ। ଡାକ୍ତର ଆସି ୩ଟି ଇଞ୍ଜେକ୍ସନ ଦେବାକୁ ଲେଖି ଦେଇଥିଲେ। ଏଥିପୂର୍ବରୁ ପିଙ୍କୁନ ୱାର୍ଡ ନିକଟ ଶୌଚାଳୟକୁ ଶୌଚ ହେବା ପାଇଁ ଯାଇଥିଲେ। ସେ ଫେରିବା ପରେ ତାଙ୍କୁ ଇଞ୍ଜେକ୍ସନ ଦିଆଯାଇଥିଲା। ତେବେ ଠିକ୍ ୫ ମିନିଟ୍ ମଧ୍ୟରେ ତାଙ୍କର ପ୍ରାଣବାୟୁ ଉଡ଼ିଯାଇଥିଲା। ଚିକିତ୍ସାରେ ଗୁରୁତ୍ୱର ତ୍ରୁଟି ଯୋଗୁ ପିଙ୍କୁନଙ୍କ ମୃତ୍ୟୁ ଘଟିଥିବା ତାଙ୍କ ବଡଭାଇ ମନୋରଞ୍ଜନ ସେଠ୍ ଏବଂ ଅନ୍ୟ ପରିବାର ସଦସ୍ୟ ଗଣମାଧ୍ୟମ ଆଗରେ କହିଛନ୍ତି। ବାରମ୍ବାର ଏଭଳି ଘଟଣା ଘଟୁଥିବାବେଳେ ଜିଲା ସ୍ବାସ୍ଥ୍ୟକେନ୍ଦ୍ର ଉପରୁ ଲୋକଙ୍କ ଭରସା ତୁଟିଯାଉଛି ବୋଲି ସେମାନେ ଅଭିଯୋଗ କରିଥିଲେ। ଯୁବକଙ୍କ ମୃତ୍ୟୁକୁ ନେଇ ଚିକିତ୍ସାଳୟରେ ଚାପା ଉତ୍ତେଜନା ପ୍ରକାଶ ପାଇଥିଲା। ପରିବାର ସଦସ୍ୟ ମୃତଦେହ ଗ୍ରାମକୁ ନେଇ ପଳାଇଥିଲେ।
ଏ ସଂକ୍ରାନ୍ତରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ କୁହନ୍ତି, ସେ ଦିନତମାନ ଜିଲା ଚିକିତ୍ସାଳୟର ବିଭିନ୍ନ ୱାର୍ଡ ପରିଦର୍ଶନ କରିଥିଲେ। ଏ ସଂକ୍ରାନ୍ତରେ ତାଙ୍କ ନିକଟରେ କୌଣସି ଅଭିଯୋଗ ହୋଇନାହିଁ। ଏଭଳି ଏକ ସମ୍ବେଦନଶୀଳ ଘଟଣା ସମ୍ପର୍କରେ ସିଡିଏମ୍ଓଙ୍କ ନିକଟରେ ସୂଚନା ନ ଥିବା ଆଲୋଚନାର ବିଷୟ ପାଲଟିଛି।
