ରାଉରକେଲା,୪।୧୨(ଦିନେଶ ମିଶ୍ର): ରାସ୍ତାକଡ ଉଠା ବ୍ୟବସାୟୀମାନଙ୍କୁ ଥଇଥାନ କରିବା ପାଇଁ ଆରଏମ୍ସି ପକ୍ଷରୁ ବିଭିନ୍ନ ସ୍ଥାନରେ ଭେଣ୍ଡିଂ ଜୋନ ନିର୍ମାଣ କରାଯାଇଛି। ଏହି ଭେଣ୍ଡିଂ ଜୋନରେ ବ୍ୟବସାୟ କରି ବ୍ୟବସାୟୀ କିଭଳି ଆତ୍ମନିର୍ଭରଶୀଳ ହୋଇପାରିବେ ସେଥିପାଇଁ ସରକାରଙ୍କ ପକ୍ଷରୁ ସହାୟତା ଯୋଗାଇ ଦିଆଯାଇଛି। ଏହାର ସୁଯୋଗ ନେଇ ସହରର କିଛି ଅସାଧୁ ବ୍ୟବସାୟୀ ପାନ ଓ ଚା’ ଦୋକାନ କରି ସେଠାରେ ବିଭିନ୍ନ ନିଶାଦ୍ରବ୍ୟ ବିକ୍ରି କରୁଛନ୍ତି। ରାଉରକେଲା ଜେଲ୍ ରୋଡ୍ ସ୍ଥିତ ଉତ୍କଳମଣି ଗୋପବନ୍ଧୁ ଭେଣ୍ଡିଂଜୋନରେ ଏଭଳି ଦେଖିବାକୁ ମିଳିଛି।
ଏହି ଭେଣ୍ଡିଂ ଜୋନରେ ସମୁଦାୟ ୧୩୦ଟି ଦୋକାନ ଓ ପିଣ୍ଡି ରହିଛି। ଏହି ମାର୍କେଟ ନିର୍ମାଣ ହେବା ପରେ ସ୍ଥାନୀୟ ଅଞ୍ଚଳର ବହୁ ରାସ୍ତାକଡ ବ୍ୟବସାୟୀ ଭେଣ୍ଡିଂ ଜୋନରେ ଦୋକାନ ପାଇ ବ୍ୟବସାୟ କରିବେ ବୋଲି ଆଶା କରାଯାଇଥିଲା। ମାତ୍ର ଅଧିକାଂଶ ବ୍ୟବସାୟୀ ଭେଣ୍ଡିଂ ଜୋନରେ ଦୋକାନ ହାତେଇବା ପରେ ପୂର୍ବଭଳି ରାସ୍ତାକଡରେ ବସି ବ୍ୟବସାୟ କରୁଛନ୍ତି। ସେମାନଙ୍କୁ ମିଳିଥିବା ଦୋକାନ ନ ଖୋଲି ଏହାକୁ ୩ ହଜାର ଟଙ୍କାରେ ଭଡା ଦେଉଛନ୍ତି। ୧୦ ଜଣ ଦୋକାନୀ ଭେଣ୍ଡିଂ ଜୋନରେ ବ୍ୟବସାୟ କରୁଥିବାବେଳେ ଅଧିକାଂଶ ପାନ ଓ ଚା’ ଦୋକାନ ରହିଛି। ଏହି ଦୋକାନରେ ଗଞ୍ଜେଇ, ଗୋଗୋ ସିଗାରେଟ ସାଙ୍ଗକୁ ଧଳାପାଉଡର ବିକ୍ରି ହେଉଥିବା ଅଭିଯୋଗ ହୋଇଛି। ସେହିପରି ଅଧିକାଂଶ ଦୋକାନ ବନ୍ଦ ପଡିଥିବାରୁ ଏଠାରେ ବିଭିନ୍ନ ସମୟରେ ଅସାମାଜିକ ଯୁବକଙ୍କ ଆଡ୍ଡା ଜମୁଛି । ଏହି ଭେଣ୍ଡିଂ ଜୋନ ପାଖରେ ବହୁ ଶିକ୍ଷାନୁଷ୍ଠାନ ରହିଛି। ବିଭିନ୍ନ ସମୟରେ କଲେଜ ବିଦ୍ୟାର୍ଥୀମାନେ ଏହି ମାର୍କେଟକୁ ଆସି ନିଶାଦ୍ରବ୍ୟ ନେଉଥିବା ଦେଖାଯାଉଛି। ଗଞ୍ଜେଇ ସିଗାରେଟ ଗୋଟା ପିଛା ୧୫ରୁ ୨୦ ଟଙ୍କା ଓ ଗୋଗୋ ସିଗାରେଟ୍ ୫୦ ଟଙ୍କାରେ ବିକ୍ରି ହେଉଛି। ସେହିପରି ସିଲଭର ପେପର ଖଣ୍ଡକୁ ୧୦ଟଙ୍କାରେ ବିକ୍ରି କରାଯାଉଛି। ସେହିପରି ମାର୍କେଟ ପରିସରରେ ଅସାମାଜିକ ଯୁବକମାନେ ମଦ୍ୟପାନ କରି ମଦବୋତଲ ପକାଉଛନ୍ତି। ଅଧିକାଂଶ ସମୟରେ ବିଦ୍ୟାର୍ଥୀମାନେ ନିଶାଦ୍ରବ୍ୟ ଖାଇ ଉକ୍ତ ଭେଣ୍ଡିଂ ଜୋନରେ ଗଣ୍ଡଗୋଳ କରିଥିବା ରଘୁନାଥପାଲି ଥାନାରେ ଅଭିଯୋଗ ହୋଇଛି। ତଥାପି ପୋଲିସ ପକ୍ଷରୁ ଉକ୍ତ ମାର୍କେଟ ଉପରେ ସେଭଳି ଆଖିଦୃଷ୍ଟିଆ ଚଢାଉ କରାଯାଇ ନ ଥିବା କିଛି ବ୍ୟବସାୟୀ କହିଛନ୍ତି। ଏ ନେଇ ଗୋପବନ୍ଧୁ ଭେଣ୍ଡିଂଜୋନ ମାର୍କେଟର ଯୁଗ୍ମ ସମ୍ପାଦକ ଲୁନା ଜେନାଙ୍କୁ ପଚାରିବାରୁ ସେ କହିଥିଲେ, ଏଠାରେ ବହୁ ବ୍ୟବସାୟୀ ନିଜ ଦୋକାନ ପାଇଥିଲେ ମଧ୍ୟ ଖୋଲୁ ନ ଥିବାରୁ ଏଭଳି ପରିସ୍ଥିତି ହୋଇଛି। ଦୋକାନ ଗୁଡିକ ଅଧିକାଂଶ ସମୟ ବନ୍ଦ ରହୁଥିବାରୁ ଏଠାରେ ଅସାମାଜିକ ଯୁବକଙ୍କ ପାଇଁ ଆଡ୍ଡା ଜମାଇବାକୁ ସୁବିଧା ହେଉଛି। ଏଥିପ୍ରତି ସ୍ଥାନୀୟ ଆରଏମ୍ସି କର୍ତ୍ତୃପକ୍ଷ ଦୃଷ୍ଟିଦେଲେ ଏହାର ସମାଧାନ ହେବ ବୋଲି ଜେନା କହିଥିଲେ। ଏ ନେଇ ରଘୁନାଥପାଲି ଥାନାଧିକାରୀ ରାଜେନ୍ଦ୍ର କୁମାର ସ୍ବାଇଁଙ୍କୁ ପଚାରିବାରୁ ସେ କହିଥିଲେ, ଗୋପବନ୍ଧୁ ଭେଣ୍ଡିଂ ଜୋନରେ ଅସାମାଜିକ ଯୁବକଙ୍କ ଆଡ୍ଡା ଜମୁଥିବା ନେଇ ଆମ ପାଖରେ କୌଣସି ଅଭିଯୋଗ ହୋଇନାହିଁ। ତଥାପି ଆମେ ଉକ୍ତ ମାର୍କେଟକୁ ପ୍ରତିଦିନ ପୋଲିସ ପାଟ୍ରୋଲିଂ ଗାଡି ପଠାଇ ଯାଞ୍ଚ କରିବୁ। ସେଠାରେ କୌଣସି ଅପ୍ରୀତିକର ପରିସ୍ଥିତି ଦେଖିଲେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯିବ ବୋଲି ସ୍ବାଇଁ କହିଥିଲେ।
