କୁଜଙ୍ଗ,୪।୧୧(ଡି.ଏନ.ଏ.): ଜଗତ୍ସିଂହପୁର ଜିଲା ଏରସମା ତହସିଲ ଢ଼ିଙ୍କିଆବାସୀଙ୍କ ପାଟଣା ପ୍ରବେଶ ଉଦ୍ୟମ ବୁଧବାର ଦ୍ୱିତୀୟ ଦିନରେ ବିଫଳ ହୋଇଛି। ଏହାକୁ ନେଇ ଅଞ୍ଚଳରେ ଚାପା ଉତ୍ତେଜନା ଲାଗି ରହିଛି। ପୋଲିସ୍ ଘଟଣାସ୍ଥଳରେ ମୁତୟନ ରହିଛନ୍ତି।
ସୂଚନାଯୋଗ୍ୟ ଏରସମା ତହସିଲ ଅନ୍ତର୍ଗତ ଢ଼ିଙ୍କିଆ ପଞ୍ଚାୟତର ଢ଼ିଙ୍କିଆ ଗ୍ରାମର ପଡ଼ା ଗ୍ରାମ ପାଟଣା ଓ ମାହାଳ ୨ଟି ନୂତନ ରାଜସ୍ବ ଗ୍ରାମର ମାନ୍ୟତା ପାଇଲା ପରେ ଢ଼ିଙ୍କିଆ ଗ୍ରାମବାସୀ ଏହାକୁ ବିରୋଧ କରିଆସୁଛନ୍ତି। ମାତ୍ର ପାଟଣା ଓ ମାହାଳ ଗଁା ରାଜସ୍ବ ଗ୍ରାମର ମାନ୍ୟତା ପାଇଲା ପରେ ଖୁସିବ୍ୟକ୍ତ କରିଛନ୍ତି। ଅନ୍ୟପକ୍ଷରେ ନୂଆ ରାଜସ୍ବ ଗ୍ରାମର ମୌଳିକ ଆବଶ୍ୟକତା ପୂରଣ ପାଇଁ ପ୍ରଶାସନ ତପତ୍ର ହୋଇଉଠିଛି। ପାଟଣା ଗ୍ରାମକୁ ରାସ୍ତା ନିର୍ମାଣ କରାଯାଉଛି। କିନ୍ତୁ ଢ଼ିଙ୍କିଆ ସମିତିସଭ୍ୟ ଦେବେନ୍ଦ୍ର ସ୍ବାଇଁ ଅଭିଯୋଗ କରୁଛନ୍ତି ଆମେ ଢ଼ିଙ୍କିଆ ଚାରିଦେଶର ଲୋକ ଜଙ୍ଗଲ ଜମି ଅଧିକାରକୁ ନେଇ ଲଢେଇ କରୁଛୁ। ସରକାର ଆମ୍ଭଙ୍କୁ ଉଚ୍ଛେଦ କରି ଶିଳ୍ପ ପ୍ରତିଷ୍ଠା ପାଇଁ ଉଦ୍ୟମ କରୁଛନ୍ତି। ଯାହାକି ଆମର ଜୀବନଜୀବିକା ଅନିଶ୍ଚିତତା ମଧ୍ୟକୁ ଠେଲି ହୋଇଯିବ। ତେଣୁ ପ୍ରଶାସନ ନୂତନ ରାଜସ୍ବ ଗ୍ରାମ ସୃଷ୍ଟି ଆଳରେ ଆମ୍ଭମାନଙ୍କ ମଧ୍ୟରେ ବିଭାଜନ କରାଇ ଶିଳ୍ପପତିଙ୍କୁ ସନ୍ତୁଷ୍ଟ କରିବାକୁ ଉଦ୍ୟମ କରୁଛନ୍ତି। ଅନ୍ୟପକ୍ଷରେ ପାଟଣା ଗ୍ରାମକୁ ହେଉଥିବା ରାସ୍ତା ନିର୍ମାଣ କେଉଁ ଅନୁଦାନରେ ହେଉଛି ବ୍ଲକ ପ୍ରଶାସନ ନ ଜଣାଇବାରୁ ଆମ୍ଭେ ବିରୋଧ କରୁଛୁ। କାହିଁକି ନା ପ୍ରଶାସନ କମ୍ପାନୀ ପଇସାରେ ରାସ୍ତା ନିର୍ମାଣ କରୁଥିବା ସେମାନେ ସନ୍ଦେହ ପ୍ରକାଶ କରୁଛନ୍ତି ବୋଲି ସମିତିସଭ୍ୟ ସ୍ବାଇଁ କହିଥିଲେ। ଆମ୍ଭେ ପ୍ରଶାସନର କମ୍ପାନୀ ସମ୍ପର୍କ ବିଷୟରେ ଜନସାଧାରଣଙ୍କୁ ସଭା କରି ଜଣାଇବାକୁ ଯିବାରେ ପାଟଣାର କେତେଜଣ ଲୋକ ଗଁା ମଧ୍ୟକୁ ଯିବାକୁ ବିରୋଧ କଲେ। ଫଳରେ ଆମ୍ଭେ ରେଡ୍କ୍ରସ୍ ଗୃହଠାରେ ସଭା କରି ଫେରିଲୁ। କେଉଁ ଅନୁଦାନରେ ପାଟଣାରେ ରାସ୍ତା କାମ ହେଉଛି ତାହା କାହିଁକି ସର୍ବସାଧାରଣ ଓ ସମିତି ସଭ୍ୟଙ୍କୁ ଅବଗତ କରାଯାଉନାହିଁ ଏ ସମ୍ପର୍କରେ ପଚାରିବାରେ ଏରସମା ବିଡିଓ କୈଳାସ ଚନ୍ଦ୍ର ବେହେରା କହୁଛନ୍ତି, ପ୍ରଶାସନ ଯେତେବେଳେ ଢ଼ିଙ୍କିଆ ପଞ୍ଚାୟତକୁ ଯାଉଛି ସେତେବେଳେ ସମିତି ସଭ୍ୟ ଜାଣିପାରୁଥିବା ବେଳେ, କେଉଁ ଅନୁଦାନରେ ରାସ୍ତା କାମ ହେଉଛି ତାହା ଜାଣି ପାରୁନାହାନ୍ତି କେମିତି। ସେ ଅନ୍ଧାରରେ ବାଡ଼ି ବୁଲାଇ ଜେଏସ୍ଡବ୍ଲ୍ୟୁ ପଇସାରେ ରାସ୍ତା କାମ ହେଉଛି ବୋଲି କହୁଛନ୍ତି। ବାସ୍ତବରେ ଜିଲାପାଳଙ୍କ ନିର୍ଦ୍ଦେଶରେ ପାରାଦୀପ ବନ୍ଦର, ପିପିଏଲ୍ ଓ ଆଇଓସିଏଲ୍ ଦେଇଥିବା ପଇସାରେ ରାସ୍ତା କାମ ହେଉଛି। ଆଜି ୩ ପ୍ଲାଟୁନ୍ ପୋଲିସ ଫୋର୍ସ ଉପସ୍ଥିତିରେ ରାସ୍ତା କାମ ହୋଇଥିଲା।
