ଗଞ୍ଜାମ,୧୩।୧୨(ବିଦ୍ୟାଧର ସାହୁ ): ଗଞ୍ଜାମ ଜିଲା ୧୬ନଂ ଜାତୀୟ ରାଜପଥ ରାଜପଥ ଜୟଶ୍ରୀ ଛକ ଏବଂ ଶନି ମନ୍ଦିର ଛକଠାରେ ଓଭର ବ୍ରିଜ ନିର୍ମାଣ ଦାବି ଜୋର ଧରିଛି । ଏହି ଦୁଇ ଛକ ଦେଇ ଦୈନଦିନ ଶହ ଶହ ସ୍କୁଲ ଛାତ୍ରୀଛାତ୍ର ଯାତାୟାତ କରୁଛନ୍ତି । ଏଥିସହ ଗଞ୍ଜାମ ବାଇପାସ ଦେଇ ଗ୍ରାସୀମ କମ୍ପାନୀକୁ ଶହ ଶହ କର୍ମଚାରୀ ଯିବା ଆସିବା କରନ୍ତି । ଉଭୟ ପଟରୁ ହଜାର ହଜାର ଟ୍ରକ୍ ବସ୍ ଯିବା ଆସିବା କରୁଛନ୍ତି । ଏଥିପାଇଁ ଅଧିକାଂଶ ସମୟରେ ଉଭୟ ଛକ ଠାରେ ଛୋଟ ବଡ଼ ଦୁର୍ଘଟଣା ଘଟୁଥିବା ନାଜିର ରହିଛି । ଗତ କିଛି ଦିନ ତଳେ ଜୟଶ୍ରୀ ଛକଠାରେ ଗୋଟେ ଅଟୋ ରୋଡ଼ ପାସ୍ କରୁଥିବା ସମୟରେ ଟ୍ରକ ଧକ୍କା ଦେଇଥିଲା । ସେହିପରି ଶନି ମନ୍ଦିର ଛକଠାରେ ମଧ୍ୟ ଜଣେ ବାଇକ ଆରୋହୀକୁ ଟ୍ରକ୍ ଧକ୍କା ଦେଇ ଦ୍ରୁତ ଗତିରେ ଚାଲି ଯାଇଥିଲା । ଏଥିପାଇଁ ଦୁଇ ଛକରେ ଓଭର ବ୍ରିଜ ନିର୍ମାଣ ପାଇଁ ବରିଷ୍ଠ ନାଗରିକ ମଞ୍ଚ ସମ୍ପାଦକ ବିନୋଦ ମହାପାତ୍ର ଜିଲା ପ୍ରଶାସନକୁ ଅନୁରୋଧ କରିଛନ୍ତି । ଗଞ୍ଜାମ ସହର ବାସୀଙ୍କ ବୃହତ ସ୍ବାର୍ଥ ଦୃଷ୍ଟିରୁ ଏଠାରେ ଓଭର ବ୍ରିଜ ନିର୍ମାଣ ହେବାର ଆବଶ୍ୟକତା ରହିଛି ବୋଲି ଯୁବ ସ୍ବେଚ୍ଛାସେବୀ ସୁଧୀର କୁମାର ପାଢ଼ୀ ଦାବି କରିଛନ୍ତି । ପ୍ରଶାସନ ଯଦି ଏଥିପ୍ରତି ଦୃଷ୍ଟି ନ ଦିଅନ୍ତି ତା’ହେଲେ ସହରବାସୀଙ୍କ ପକ୍ଷରୁ ଶାନ୍ତି ପୂର୍ଣ୍ଣ ଆନ୍ଦୋଳନ କରାଯିବ ବୋଲି ମଧ୍ୟ ଶୁଣିବାକୁ ମିଳିଛି । ଅନ୍ୟପଟେ ଉଭୟ ଛକରେ ଓଭର ବ୍ରିଜ ନିର୍ମାଣ ପାଇଁ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ଯୁବ ସ୍ବେଚ୍ଛାସେବୀ ପାଢ଼ୀ ଗଣମାଧ୍ୟମକୁ କହିଛନ୍ତି ।
