ପୁରୀ,୨୮।୭(ଅଜିତ ମହାନ୍ତି): ମହାପ୍ରଭୁଙ୍କ ବନକ ଲାଗି ନୀତିକୁ ନେଇ ଦିନକୁ ଦିନ ବିବାଦ ଥମିବା ପରିବର୍ତ୍ତେ ଅଧିକ ଘନେଇବାରେ ଲାଗିଛି। ଶ୍ରୀମନ୍ଦିର ପ୍ରଶାସନ ଏବଂ ଦତ୍ତ ମହାପାତ୍ର ସେବକ ମଧ୍ୟରେ ସମନ୍ବୟର ଅଭାବ କାରଣରୁ ବନକ ଲାଗି ନୀତି ହୋଇପାରୁ ନାହିଁ। କେଉଁ ବାରରେ ମହାପ୍ରଭୁଙ୍କ ବନକଲାଗି ହେବ ତାହାକୁ ନେଇ ଶ୍ରୀମନ୍ଦିର ପ୍ରଶାସନ ଏବଂ ଦତ୍ତ ମହାପାତ୍ର ନିଯୋଗ ନିଜ ନିଜ ଜିଦିରେ ଅଟଳ ରହିବା କାରଣରୁ ନୀଳାଦ୍ରି ବିଜେଠାରୁ ଏଯାବତ ବନକଲାଗି ହୋଇପାରିନାହିଁ। ଯାହାକୁ ନେଇ ଭକ୍ତମାନଙ୍କ ମଧ୍ୟରେ ଏକ ପ୍ରକାର ଅସନ୍ତୋଷ ପରିଲିଖିତ ଦେଖିବାକୁ ମିଳୁଥିବା ବେଳେ ସେବାୟତମାନେ ମଧ୍ୟ ଏପରି କାର୍ଯ୍ୟକୁ ନାପସନ୍ଦ କରୁଛନ୍ତି। ତେବେ ମହାପ୍ରଭୁଙ୍କ ବନକଲଗି ଗୁରୁବାର ମଧ୍ୟ ହୋଇପାରିନାହିଁ। ଅପରପକ୍ଷେ ବୁଧବାର ହିଁ ବନକଲାଗି ନୀତି କରାଯିବ ବୋଲି ଶ୍ରୀମନ୍ଦିର ପ୍ରଶାସନ ପୁଣି କହିଛି। ତେବେ ଆସନ୍ତା ବୁଧବାର ନକ୍ଷତ୍ର ବନ୍ଦାପନା ନୀତି ରହିଥିବାରୁ ମହାପ୍ରଭୁଙ୍କ ବନକଲାଗି ଆଶା କ୍ଷୀଣ। ଶୁକ୍ରବାର ନୀତି ସବ୍କମିଟିର ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ନୀତି ସବ୍କମିଟି ବୈଠକରେ ବିସ୍ତୃତ ଭାବେ ଆଲୋଚନା ହୋଇ ସମାଧାନର ରାସ୍ତା ବାହାର କରିବାକୁ ଉଦ୍ୟମ ହେବ। ଅପରପକ୍ଷେ ଗୁରୁବାର ମହାପ୍ରଭୁଙ୍କ ବନକଲାଗି ପାଇଁ ପ୍ରସ୍ତୁତ ହୋଇ ଦତ୍ତ ମହାପାତ୍ର ସେବାୟତ ଶ୍ରୀମନ୍ଦିର ଭିତରକୁ ଯାଇ ବନକ ଘରେ ପ୍ରସ୍ତୁତି ଆରମ୍ଭ କରିଥିଲେ। ତେବେ ଶ୍ରୀମନ୍ଦିର କମାଣ୍ଡର ମନା କରିଥିଲେ। ବୁଧବାର ବନକ ଲାଗି କରିବାକୁ କହିଥିଲେ। ଏହାପରେ ଦତ୍ତ ମହାପାତ୍ରମାନେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଭେଟିଥିଲେ। ବନକ ଲାଗି ନୀତି ପାଇଁ ଅନୁମତି ଦେବାକୁ ଅନୁରୋଧ କରିଥିଲେ। ତେବେ ଆଜି ନୁହେଁ ବରଂ ଆସନ୍ତା ବୁଧବାର ମହାପ୍ରଭୁଙ୍କ ବନକ ଲାଗି ନୀତି ପାଇଁ ନିର୍ଦ୍ଦେଶ ଦେଇଥିଲେ।
ଏ ନେଇ ଦତ୍ତ ମହାପାତ୍ର ସେବକ ସଞ୍ଜୟ ଦାସ ମହପାତ୍ର କହିଛନ୍ତି, ଗୁରୁବାର ମହାପ୍ରଭୁଙ୍କ ବନକଲାଗି ପାଇଁ ମୁଖ୍ୟ ପ୍ରଶାସକଙ୍କ ସହ ଦେଖା ହେଇ ନୀତି କରିବା ପାଇଁ କହିଥିଲୁ। ତେବେ ବୁଧବାର ବନକଲାଗି ପାଇଁ ନିଷ୍ପତ୍ତି ହେଲା। ବୁଧବାର ବନକଲାଗି ହେବା ପରେ ଗୁରୁବାର ବନକଲାଗି କରାଯିବ କି ନାହିଁ ତାହା ବିଚାର କରାଯିବ। ଆର ସପ୍ତାହରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିର୍ଦ୍ଦେଶ ଆସିବା ପରେ ବୁଧବାର ବନକଲାଗି କରାଯିବ କି ନାହିଁ ତାହା ବିଚାର କରାଯିବ। ଶ୍ରୀମନ୍ଦିର ପ୍ରଶାସନ ପକ୍ଷରୁ ନିର୍ଦ୍ଦେଶ ଦେବା ପରେ ଏ ନେଇ ନିଯୋଗର ସଭାପତି, ସମ୍ପାଦକମାନଙ୍କ ସହ ଆଲୋଚନା କରାଯାଇ ଯାହା ନିଷ୍ପତ୍ତି ନିଆଯିବ । ତେବେ ବୁଧବାର ବନକ ଲାଗି କରିବା ପାଇଁ ନିଯୋଗ ପକ୍ଷରୁ ଲିଖିତ ଶ୍ରୀମନ୍ଦିର ପ୍ରଶାସନକୁ ଜଣାଇବା ପାଇଁ କହିଛନ୍ତି। ସେହିପରି ଦତ୍ତ ମହାପାତ୍ର ନିଯୋଗର ସମ୍ପାଦକ ମଦନମୋହନ ଦତ୍ତ ମହାପାତ୍ର କହିଛନ୍ତି, ଗୁରୁବାର ମହାପ୍ରଭୁଙ୍କ ବନକଲାଗି ନୀତି ନିମନ୍ତେ ଶ୍ରୀମନ୍ଦିର କୁ ଯାଇଥିଲୁ। କିନ୍ତୁ ବନକଲାଗି ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିର୍ଦ୍ଦେଶ ନଥିବା କମାଣ୍ଡର କହିଥିଲେ। ଅପରପକ୍ଷେ ଶ୍ରୀମନ୍ଦିର ପ୍ରଶାସନ ଯଦି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବ ତାକୁ ସ୍ବାଗତ କରିବୁ। ତେବେ ପ୍ରଶାସନ ଦମନ ଲୀଳା କରୁଛି। ମହାପ୍ରଭୁ୍ଙ୍କ ନୀତିକୁ ଧ୍ୟାନ ଦେଉନାହାନ୍ତି। ଏ ସମ୍ପର୍କରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ କହିଛନ୍ତି, ଦତ୍ତ ମହାପାତ୍ର ସେବକମାନେ ଗୁରୁବାର ବନକ ଲାଗି କରିବାକୁ ଜିଦ୍ ଧରିଛନ୍ତି। ତେବେ ଶ୍ରୀମନ୍ଦିର ପ୍ରଶାସନର ନିର୍ଦ୍ଦେଶ ଅନୁପାଳନ କରିବା ଆବଶ୍ୟକ। ଶୁକ୍ରବାର ଗୁରୁତ୍ୱପୂର୍ଣ୍ଣ ସବ୍କମିଟି ବୈଠକ ହୋଇ ଆଲୋଚନା କରାଯିବ। ମହାପ୍ରଭୁଙ୍କ ସେବା ଗୁରୁତ୍ୱପୂର୍ଣ୍ଣ ବ୍ୟକ୍ତିବିଶେଷ ଗୁରୁତ୍ୱପୂର୍ଣ୍ଣ ନୁହନ୍ତି। ତେଣୁ ବ୍ୟକ୍ତି ବିଶେଷଙ୍କ ଉପରେ ଗୁରୁତ୍ୱ ଦେବା ଆବଶ୍ୟକ ନାହିଁ। ଯେତେବେଳ ନୀତିକୁ ବିଭ୍ରାଟ ହେଉଛି ଘଟଣାକୁ ଗୁରୁତ୍ୱର ସହ ନିଆଯାଉଛି। ଆବଶ୍ୟକ ପଡ଼ିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଦତ୍ତ ମହାପାତ୍ର ସେବାୟତ ଲିଖିତ ଭାବେ ବୁଧବାର ବନକ ଲାଗି କରି ଜଣାଇବେ ପରେ ଏବି ଦ୍ୱନ୍ଦ୍ୱର ସମାଧାନ ହେବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି।
