ଥୁଆମୂଳ ରାମପୁର, ୨। ୪(ଦୁର୍ଗା କୀର୍ତ୍ତି): ଅସହାୟଙ୍କ ସ୍ୱର ସାଜିଛି ‘ଧରିତ୍ରୀ’। ଖବର ପ୍ରସାରଣର ମାତ୍ର କିଛି ଦିନ ମଧ୍ୟରେ ପ୍ରଶାସନିକ ସ୍ତରରେ ଦେଖାଦେଇଥିବା ତ୍ୱରିତ ପଦକ୍ଷେପ ଏକ ନିରୀହ ପରିବାର ମୁହଁରେ ହସ ଫୁଟାଇଛି। କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକ ଗୁଣୁପୁର ପଞ୍ଚାୟତ ରଣପୁର ଗ୍ରାମର ହାନ୍ଦୁ ମାଝୀଙ୍କ ପରିବାର ପାଇଁ ଏବେ ସରକାରୀ ପକ୍କା ଘର ମିଳିବା ନିଶ୍ଚିତ ହୋଇଛି। ଗତବର୍ଷ ବନ୍ୟାରେ ସର୍ବସ୍ବ ହରାଇ ପଲିଥିନ୍ ତଳେ ଅତି ଦୟନୀୟ ଭାବେ ଜୀବନ ବିତାଉଥିବା ଏହି ପରିବାରର ଦୁଃଖ ଏବେ ପ୍ରଶାସନିକ ହସ୍ତକ୍ଷେପ ଯୋଗୁ ଦୂର ହେବାକୁ ଯାଉଛି।
ଗତ ମାର୍ଚ୍ଚ ୧୮ ତାରିଖରେ ହାନ୍ଦୁ ମାଝୀଙ୍କ ଦୁର୍ଦ୍ଦଶା ସମ୍ପର୍କରେ ‘ଧରିତ୍ରୀ’ରେ ସଚିତ୍ର ଖବର ପ୍ରକାଶ ପାଇବା ପରେ ସରକାରୀ କଳ ସକ୍ରିୟ ହୋଇଉଠିଛି। ବିଡିଓ ଧ୍ରୁବ ଚରଣ ମୁଦୁଲିଙ୍କ ସୁଚିନ୍ତିତ ନିର୍ଦ୍ଦେଶ ଓ ଆର୍.ଏଚ ବିପିସି (RH BPC) ରାଜେନ୍ଦ୍ର ନାରାୟଣ ଦେବଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପ୍ରଶାସନ ଘଟଣାସ୍ଥଳରେ ପହଞ୍ଚିଛି। ସ୍ଥାନୀୟ ସରପଞ୍ଚ ସୁଜାତା ମାଝୀ ନିଜେ ହିତାଧିକାରୀଙ୍କ ଘରେ ପହଞ୍ଚି କାଗଜପତ୍ର ଯାଞ୍ଚ କରିଥିବା ବେଳେ, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ (PEO) ମୁକେଶ କୁମାର ପଟେଲଙ୍କ ନିର୍ଦ୍ଦେଶରେ ଏଡିଇଓ (ADEO) ଫକୀର ବେହେରା ସ୍ଥିତି ଅନୁଧ୍ୟାନ କରି ରିପୋର୍ଟ ପ୍ରଦାନ କରିଛନ୍ତି।
ବିଭାଗୀୟ ଅଧିକାରୀ ରାଜେନ୍ଦ୍ର ନାରାୟଣ ଦେବଙ୍କ ସୂଚନା ଅନୁସାରେ, ହାନ୍ଦୁ ମାଝୀଙ୍କ ପରିବାର ଜଣେ ଅତ୍ୟନ୍ତ ଯୋଗ୍ୟ ହିତାଧିକାରୀ। ସେମାନଙ୍କ ପାଇଁ ‘ଅନ୍ତ୍ୟୋଦୟ ଗୃହ ଯୋଜନା’ (AGJ) ମାଧ୍ୟମରେ ଅନଲାଇନ୍ ଆବେଦନ ପ୍ରକ୍ରିୟା ଶେଷ ହୋଇଛି। “ଆମେ ଏହି ମାସ ସୁଦ୍ଧା ସେମାନଙ୍କୁ ପକ୍କା ଘର ଯୋଗାଇ ଦେବା ସହ ପ୍ରଥମ କିସ୍ତି ଟଙ୍କା ପଠାଇବାର ବ୍ୟବସ୍ଥା କରୁଛୁ,” ବୋଲି ଶ୍ରୀ ଦେବ ପ୍ରକାଶ କରିଛନ୍ତି।
ହାନ୍ଦୁ ମାଝୀଙ୍କୁ ନ୍ୟାୟ ମିଳିଥିବାରୁ ବିଭିନ୍ନ ମହଲରେ ଖୁସି ପ୍ରକାଶ ପାଇଥିଲେ ହେଁ, ଥୁଆମୂଳ ରାମପୁର ବ୍ଲକର ଅନେକ ଦୁର୍ଗମ ଅଞ୍ଚଳ ରେ ଏବେ ବି ଅନେକ ପରିବାର ମୌଳିକ ସୁବିଧାରୁ ବଞ୍ଚିତ ଥିବା ଚର୍ଚ୍ଚା ହେଉଛି। ହାନ୍ଦୁଙ୍କ ଭଳି ଅନେକ ଯୋଗ୍ୟ ହିତାଧିକାରୀ ଆଜି ବି ସରକାରୀ ଯୋଜନାରୁ ବଞ୍ଚିତ ହୋଇ ଅତି କଷ୍ଟରେ କାଳାତିପାତ କରୁଛନ୍ତି। ଏହି ଘଟଣାକୁ ଉଦାହରଣ ଭାବେ ନେଇ ପ୍ରଶାସନ ବ୍ଲକର ପ୍ରତ୍ୟେକ ଦୁର୍ଗମ ଅଞ୍ଚଳରେ ପହଞ୍ଚି ଯୋଗ୍ୟ ପରିବାରଙ୍କୁ ଚିହ୍ନଟ କରନ୍ତୁ ଏବଂ ସେମାନଙ୍କ ପାଖରେ ସରକାରୀ ସହାୟତା ପହଞ୍ଚାନ୍ତୁ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି। ସରକାରଙ୍କ ଜନକଲ୍ୟାଣକାରୀ ଯୋଜନା ଯେଭଳି କେବଳ କାଗଜପତ୍ରରେ ସୀମିତ ନ ରହି ପ୍ରକୃତ ଗରିବଙ୍କ ପାଖରେ ପହଞ୍ଚିବ, ସେଥିପ୍ରତି ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି। ସେପଟେ ନୂତନ ଘରର ଆଶା ପାଇ ହାନ୍ଦୁ ମାଝୀଙ୍କ ପରିବାର ‘ଧରିତ୍ରୀ’ ଏବଂ ବ୍ଲକ ପ୍ରଶାସନକୁ କୃତଜ୍ଞତା ଜଣାଇଛନ୍ତି।
