ବମ୍ବେ: ଭଜନ ସମ୍ରାଟ ଅନୁପ ଜଲୋଟାଙ୍କୁ କିଏ ବା ନଜାଣେ। ଗାୟକ ହିସାବରେ ବେଶ ଖ୍ୟାତି ଅର୍ଜନ କରିଥିଲେ ହେଁ ବ୍ୟକ୍ତିଗତ ଜୀବନରେ ସେ ସେତିକି ଅସଫଳ। ଥରେ କି ଦୁଇଥର ନୁହେଁ ତିନି ଥର ସେ ବିବାହ କରିଛନ୍ତି। ହେଲେ କେଉଁଟିବି ଚାଲିନାହିଁ।
୬୯ ବର୍ଷୀୟ ଅନୁପ ସୋନାଲୀ ସେଠଙ୍କୁ ପ୍ରଥମ ବିବାହ କରିଥିଲେ। ଦୁହେଁ ପରିବାରର ଅସହମତି ସୁଦ୍ଧା ପରସ୍ପରକୁ ଜୀବନସାଥୀ ରୂପେ ବାଛିଥିଲେ। ହେଲେ ବିବାହର କିଛି ଦିନ ପରେ ଅନୁପଙ୍କ ଛାତ୍ରଙ୍କ ପ୍ରେମରେ ପଡ଼ିଥିଲେ ସୋନାଲୀ। ଏଣୁ ସେ ଗାୟକଙ୍କଠାରୁ ଅଲଗା ହୋଇଥିଲେ। ପରେ ଅନୁପ ବିନା ଭାଟ୍ଟିଆଙ୍କୁ ଦ୍ୱିତୀୟ ବିବାହ କରିଥିଲେ। ଏହି ବିବାହ ବେଶି ଦିନ ଚାଲି ନ ଥିଲା। ସେମାନେ ଅଲଗା ହୋଇଥିଲେ। ଶେଷରେ ସେ ପୂର୍ବତନ ପ୍ରଧାନମନ୍ତ୍ରୀ ଆଇ କେ ଗୁଜରାଲଙ୍କ ଭାଣେଜୀ ମେଧା ଗୁଜରାଲଙ୍କୁ ତୃତୀୟ ବିବାହ କରିଥିଲେ। ହେଲେ ରୋଗରେ ପୀଡ଼ିତ ହୋଇ ୨୦୧୪ରେ ସେ ଆଖି ବୁଜିଥିଲେ।
ଅନୁପଙ୍କ ଜୀବନ ବିବାହ ବ୍ୟତିତ ପ୍ରେମ ସମ୍ପର୍କକୁ ନେଇ ମଧ୍ୟ ବିବାଦରେ ରହିଛି। ବିଗ୍ ବସ୍ ୧୨ରେ ପ୍ରତିଯୋଗୀ ଭାବେ ଭାଗ ନେବା ବେଳେ ସେ ଜସଲିନ ମଥାରୁଙ୍କ ସହ ସମ୍ପର୍କକୁ ନେଇ ଚର୍ଚ୍ଚାରେ ଆସିଥିଲେ। ହେଲେ ଶୋ’ରୁ ବାହାରିବା ପରେ ଏହା ମିଛ ସମ୍ପର୍କ ବୋଲି ଜଣାପଡ଼ିଥିଲା।
ତେବେ ଆଜି ଏହି ବିବାଦୀୟ ଭଜନ ସମ୍ରାଟଙ୍କ ଜନ୍ମଦିନ ହୋଇଥିବା ବେଳେ ପ୍ରଶଂସକ ତଥା ଶୁଭେଚ୍ଛୁମାନେ ତାଙ୍କୁ ଅଭିନନ୍ଦନ ଜଣାଉଛନ୍ତି।
