ଭୁବନେଶ୍ୱର, ୨୮।୧୨ (ବ୍ୟୁରୋ): ବାହାର ରାଜ୍ୟରୁ ଓଡ଼ିଶାକୁ ବ୍ୟାପିଛି ନକଲି ଔଷଧ ର଼୍ୟାକେଟ। ବ୍ୟବସାୟୀମାନେ ଅଧିକ ଲାଭ ପାଇଁ ଏସବୁ ଔଷଧ ଆମଦାନୀ କରି ଲୋକଙ୍କ ଜୀବନ ସହ ଖେଳ ଖେଳୁଛନ୍ତି। ପୂର୍ବରୁ ଭୁବନେଶ୍ୱର, କଟକ, ରାଉରକେଲାରୁ ବିପୁଳ ନକଲି ଔଷଧ ଜବତ ହେବା ସହ ଏସବୁ ମାମଲାରେ କାର୍ଯ୍ୟାନୁଷ୍ଠାନ ଜାରି ରହିଛି। ତେବେ ନିକଟରେ ଝାରସୁଗୁଡ଼ା ଓ ବରଗଡ଼ରୁ ଜବତ ହୋଇଥିବା ନକଲି ଔଷଧ ଉତ୍ତରପ୍ରଦେଶରୁ ଆସିଥିବା ଜଣାପଡିଛି। ସେଠାରେ ଏକାଧିକ ଫାର୍ମା କମ୍ପାନୀ ନକଲି ଔଷଧ ତିଆରି କରୁଥିବାବେଳେ ବଡ଼ ବଡ଼ ଗୋଦାମ ମଧ୍ୟ ରହିଛି। ଓଡ଼ିଶା ସରକାରଙ୍କ ସୂଚନା ଆଧାରରେ ଉତ୍ତରପ୍ରଦେଶ ସରକାର ମଧ୍ୟ କାର୍ଯ୍ୟାନୁଷ୍ଠାନ ଆରମ୍ଭ କରିଥିବା ସୂଚନା ମିଳିଛି। ଝାରସୁଗୁଡ଼ାର ଅମିତ ମେଡିକାଲ ଏଜେନ୍ସି ଏବଂ ବରଗଡ଼ର ବିକାଶ ଆଣ୍ଡ୍ କୋରୁ ୧ଲକ୍ଷ ୭୦ ହଜାର ଟଙ୍କାର ନକଲି ମେଡିସିନ୍ ଜବତ ହୋଇଥିଲା। ଜବତ ସମସ୍ତ ମେଡିସିନ୍ ଉତ୍ତର ପ୍ରଦେଶ ବାରାଣସୀର ୩ଟି ଫାର୍ମରୁ ପ୍ରସ୍ତୁତ ହୋଇଥିବା ମୁଖ୍ୟ କମ୍ପାନୀ ପକ୍ଷରୁ ସ୍ପଷ୍ଟ କରାଯାଇଛି। ତେବେ ମେଡ଼ିସିନ ପ୍ରସ୍ତୁତ କରୁଥିବା ସମ୍ପୃକ୍ତ ଫାର୍ମର ଡ୍ରଗ୍ ଲାଇସେନ୍ସ ରଦ୍ଦ ହୋଇଥିବା ଉତ୍ତରପ୍ରଦେଶ ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି। ତେବେ ଏସବୁ ନକଲି ଔଷଧ ରାଜ୍ୟର ଅନ୍ୟ ଅଞ୍ଚଳରେ ବିକ୍ରି ହେଉଥିବା ଆଶଙ୍କା କରାଯାଉଥିବାରୁ ସେସବୁକୁ ଜବତ ସହ ରାଜ୍ୟରୁ ଏହି ବେଆଇନ କାରବାରକୁ ବନ୍ଦ କରିବା ପାଇଁ ଚଢ଼ାଉକୁ ଜୋର୍ଦାର କରାଯିବାକୁ ପ୍ରସ୍ତୁତି ଚାଲିଛି।
ସୂଚନାଯୋଗ୍ୟ, ଗତ ୨୩ ତାରିଖରେ କଟକ ଓ ବରଗଡ଼ର ଦୁଇଟି ଗୋଦାମରୁ ନକଲି ଔଷଧ ଜବତ କରାଯାଇଥିଲା। କଟକ ପୁରୀଘାଟସ୍ଥିତ ଏମ୍ଏଚ୍ ଫାର୍ମାସ୍ୟୁଟିକାଲ୍ ଷ୍ଟୋର୍ରୁ ୧୧ ପ୍ରକାରର ସନ୍ଦେହାତ୍ମକ ଔଷଧ ଜବତ କରାଯାଇଥିଲା। ଏସବୁର ମୂଲ୍ୟ ପ୍ରାୟ ୨୩.୨୩ଲକ୍ଷ ଟଙ୍କା ହେବ। ଏହି ନକଲି ଔଷଧଗୁଡ଼ିକ ମଧ୍ୟ ଉତ୍ତର ପ୍ରଦେଶରୁ ଆସିଥିବା ଜଣାପଡ଼ିଥିଲା। ତେଣୁ ନକଲି ଔଷଧ ଆମଦାନୀରେ ଉତ୍ତରପ୍ରଦେଶ ରାଜ୍ୟର ଏକ ବଡ଼ ର଼୍ୟାକେଟ ସକ୍ରିୟ ଥିବା ସନ୍ଦେହ କରାଯାଉଛି। ନକଲି ଔଷଧର ଆମଦାନୀ ଏବଂ ଯୋଗାଣକୁ ବନ୍ଦ କରିବା ଏବଂ ଧରାପଡ଼ିଥିବା ନକଲି ଔଷଧ ପ୍ରସ୍ତୁତକାରୀଙ୍କ ବିରୋଧରେ କଠୋର ଆଇନ୍ଗତ କାର୍ଯ୍ୟାନୁଷ୍ଠାନ ପାଇଁ ପ୍ରକ୍ରିୟା ତ୍ୱରାନ୍ବିତ କରିବାକୁ ଦାବି ହେଉଛି।
