କଟକ ଅଫିସ,୧୧।୫: କଟକ ମଙ୍ଗଳାବାଗ ଥାନା ଅଧୀନ ଫ୍ରେଣ୍ଡ୍ସ କଲୋନୀ ଅଞ୍ଚଳରେ ରହୁଥିବା ଜଣେ ୫ବର୍ଷର ଶିଶୁକନ୍ୟାଙ୍କୁ ବଳାତ୍କାର କରିବା ମାମଲାରେ ଅଭିଯୁକ୍ତଙ୍କୁ ୨୫ବର୍ଷ ଜେଲ ଦଣ୍ଡାଦେଶ ଦେଇଛନ୍ତି କଟକ ସ୍ବତନ୍ତ୍ର ପୋକ୍ସୋ କୋର୍ଟ। ଏଥିସହ ଅଭିଯୁକ୍ତଙ୍କୁ ୧୦ହଜାର ଟଙ୍କା ଅର୍ଥ ଦଣ୍ଡରେ ଦଣ୍ଡିତ କରାଯାଇଛି। କ୍ଷତିପୂରଣ ବାବଦକୁ ପୀଡ଼ିତା ଶିଶୁକନ୍ୟାଙ୍କୁ ସିଆର୍ପିସି ୩୫୭ (ଏ) ଧାରା ଅନୁସାରେ ୫ଲକ୍ଷ ଟଙ୍କା ପ୍ରଦାନ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଅଭିଯୁକ୍ତ ଜଣକ ହେଲେ ପତି ଓରଫ ପତିତ ବେହେରା। ତାଙ୍କ ଘର ଢେଙ୍କାନାଳ ଜିଲା ଭୁବନ ଥାନା ଅଞ୍ଚଳରେ ହୋଇଥିବାବେଳେ ସେ ପୀଡ଼ିତାଙ୍କ ପଡ଼ୋଶୀ ଭାବେ ରୁହନ୍ତି।
ମିଳିଥିବା ସୂଚନା ଅନୁସାରେ ୨୦୧୯ ମେ ୧୯ରେ ପୀଡ଼ିତା ଶିଶୁକନ୍ୟାଙ୍କ ବାପା କାମ କରିବାକୁ ବାହାରକୁ ଯାଇଥିବାବେଳେ ମା’ ଘରେ ଥିଲେ। ପୀଡ଼ିତା ଘର ବାହାରେ ଖେଳୁଥିବାବେଳେ ପଡ଼ୋଶୀ ଅଭିଯୁକ୍ତ ପତିତ ତାଙ୍କୁ ଘରକୁ ଡାକି ନେଇ ବଳାତ୍କାର କରିଥିଲେ। ଝିଅ ଘରକୁ ଫେରିବା ବିଳମ୍ବ ହେବାରୁ ମା’ ଡାକ ପକାଇଥିଲେ। ଏହା ପରେ ଝିଅ କାନ୍ଦି କାନ୍ଦି ଅଭିଯୁକ୍ତଙ୍କ ଘରୁ ବାହାରିଥିଲେ। ଏହା ଦେଖି ମା’ ପଚାରିବାରୁ ଶିଶୁ କନ୍ୟା ସମସ୍ତ କଥା କହିଥିଲେ। ଏନେଇ ପରିବାର ପକ୍ଷରୁ ମଙ୍ଗଳାବାଗ ଥାନାରେ ଲିଖିତ ଅଭିଯୋଗ କରାଯାଇଥିଲା। ପୋଲିସ ଅଭିଯୋଗକୁ ଭିତ୍ତିକରି ଏକ ମାମଲା ରୁଜୁ କରିବା ସହ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ମାମଲାର ଶୁଣାଣି ସମୟରେ୧୨ଜଣ ସାକ୍ଷୀଙ୍କ ବୟାନ ଏବଂ ଦସ୍ତାବିଜକୁ ଆଧାର କରି ସ୍ବତନ୍ତ୍ର ଅଦାଲତ ବିଚାରପତି ସୁବାସ କୁମାର ବିହାରୀ ଏହି ରାୟ ଶୁଣାଇଛନ୍ତି। ଏହି ମାମଲାକୁ ସ୍ବତନ୍ତ୍ର ସରକାରୀ ଓକିଲ ରମେଶ କୁମାର ମହାନ୍ତି ପରିଚାଳନା କରୁଥିଲେ।
