କେନ୍ଦୁଝର, ୧୬ା୪ (ସ୍ବ.ପ୍ର.): କେନ୍ଦୁଝର ସଦର ବ୍ଲକ ରଘୁନାଥପୁର ପଞ୍ଚାୟତର କାଳିଆବେଡ଼ା ଗଁା ନିକଟରେ କାନଝରୀ ଡ୍ୟାମ୍ର ୨୫ଫୁଟ୍ କେନାଲ ଆଡ଼ିବନ୍ଧ ଭୁଶୁଡି ପଡିଛି। ଫଳରେ ସ୍ଥାନୀୟ ଅଞ୍ଚଳର ଚାଷଜମିରେ ପାଣି ପଶି ଫସଲ କ୍ଷତି ହୋଇଛି। ମରାମତି ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଉଥିଲେ ହେଁ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଏହି କେନାଲ ବନ୍ଧ ଭୁଶୁଡ଼ିପଡ଼ିଥିବା ଚାଷୀମାନେ ଅଭିଯୋଗ କରିଛନ୍ତି। ଏହା ପୂର୍ବରୁ ୨୦୧୬ରେ ମଧ୍ୟ ଏଠାରେ କେନାଲ ବନ୍ଧ ଭାଙ୍ଗିଥିଲା। ଗୁରୁବାର ସାରେ ପୁଣି ଏହି ଆଡ଼ିବନ୍ଧ ଭାଙ୍ଗିଯାଇଛି। ପୂର୍ବରୁ ଆଡ଼ିବନ୍ଧରେ ସାମାନ୍ୟ ଗର୍ତ୍ତ ହୋଇଥିବା ସ୍ଥାନୀୟ ଲୋକେ କହିଛନ୍ତି।
ଏହି କେନାଲ ଉପରେ ତଳମୁଣ୍ଡରେ ପ୍ରାୟ ୮ରୁ ୧୦ଖଣ୍ଡ ଗଁାର ଚାଷୀ ନିର୍ଭରଶୀଳ। ଆଡ଼ିବନ୍ଧ ଭାଙ୍ଗିବା ଫଳରେ ହଳଧରପୁର, ଚେମୁଡିବିଲ, ଦେବନ୍ଧ, ଜମୁନାଳିଆ, କଦଳୀପଶି, ବେଲଦୁମା, ପାଟନାଳି ଆଦି ଗ୍ରାମର ଚାଷୀ ବିଶେଷ ପ୍ରଭାବିତ ହୋଇଛନ୍ତି। ଏହି ଗ୍ରାମର ଚାଷୀମାନେ ମୁଖ୍ୟତଃ ଧାନ ଚାଷ କରିଥାନ୍ତି। ଶୀଘ୍ର ଏହି ବନ୍ଧ ମରାମତି କରା ନ ଗଲେ ବିଲଗୁଡ଼ିକରେ ପାଣି ଶୁଖି ଯାଇ ଧାନ ଗଛ ନଷ୍ଟ ହୋଇଯିବ ବୋଲି ପ୍ରକାଶ କରିଛନ୍ତି। ଆଗକୁ ଖରାଟିଆ ଚାଷ କରିବା ପାଇଁ ପ୍ରସ୍ତୁତ ହେଉଥିବାରୁ ତୁରନ୍ତ କେନାଲ ମରାମତି ସହ କ୍ଷତିପୂରଣ ପାଇଁ ସେମାନେ ଦାବି କରିଛନ୍ତି। କେନ୍ଦୁଝର ସଦର ଓ ପାଟଣା ଅଞ୍ଚଳର ହଜାର ହଜାର ଚାଷୀ ଏହି ଡ୍ୟାମ୍ ଉପରେ ନିର୍ଭର କରିଥାନ୍ତି। କେନାଲ ମରାମତି ପାଇଁ କୋଟି କୋଟି ଟଙ୍କା ଖର୍ଚ୍ଚ ହୋଇଥିଲେ ହେଁ ନିମ୍ନମାନର ଯୋଗୁ ଅନେକ ସମୟରେ ଭାଙ୍ଗୁଛି। ଏହାର ସ୍ଥାୟୀ ମରାମତି ଦାବି କରିଛନ୍ତି ଚାଷୀ। ଏ ସମ୍ପର୍କରେ ସଦର ତହସିଲଦାର ଆଶିଷ ମହାପାତ୍ର କହିଛନ୍ତି, ଅଭିଯୋଗ ମିଳିନାହିଁ। କୌଣସି କ୍ଷୟକ୍ଷତି ହୋଇଥିଲେ ଆର୍ଆଇଙ୍କ ସହାୟତାରେ ଅନୁଧ୍ୟାନ କରି ପଦକ୍ଷେପ ନିଆଯିବ।
