କୋରୁକୋଣ୍ଡା,୯।୧(ଡି.ଏନ୍.ଏ.) : ବାହାରେ ବସି ଖୋଲା ଆକାଶ ତଳେ ପାଠ ପଢୁଛନ୍ତି ୧୦ମ ଶ୍ରେଣୀ ଛାତ୍ରୀଛାତ୍ର। ଶିକ୍ଷାର ଏଭଳି ଅଭାବନୀୟ ଦୃଶ୍ୟ ମାଲକାନଗିରି ଜିଲା କୋରୁକୋଣ୍ଡା ବ୍ଲକ ଅନ୍ତର୍ଗତ ନୀଳାକାମ୍ବେରୁ ପଞ୍ଚାୟତର ସରକାରୀ ଉଚ୍ଚ ବିଦ୍ୟାଳୟରେ ଦେଖିବାକୁ ମିଳିଛି। କରୋନା କଟକଣାକୁ ମାନି ରାଜ୍ୟ ସରକାର ବିଦ୍ୟାଳୟ ଖୋଲିବାକୁ ନିର୍ଦ୍ଦେଶ ଦେଇଥିବା ସହ ଯେଉଁ ସ୍କୁଲଗୁଡ଼ିକ କରୋନା ମହାମାରୀ ସମୟରେ କ୍ୱାରାଣ୍ଟାଇନ ସେଣ୍ଟର ହୋଇଥିଲା ସେସବୁ ଶ୍ରେଣୀ ଗୃହଗୁଡ଼ିକୁ ବିଦ୍ୟାଳୟକୁ ହସ୍ତାନ୍ତର କରିବା ନିମନ୍ତେ ନିର୍ଦ୍ଦେଶ ଦିଆଯାଇଥିଲା। ମାଲକାନଗିରି ଜିଲାପାଳ ଜିଲା ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଚିଠି ନଂ ୨୪୫୧/୨୦ ରେ ୧୮/୦୯/୨୦ ଅନୁଯାୟୀ ଜିଲାର ସମସ୍ତ ବିଡିଓଙ୍କୁ ନିର୍ଦ୍ଦେଶ ଦେଇଥିଲେ। କିନ୍ତୁ ଆଜକୁ ଦୀର୍ଘ ୩ ମାସର ଊଦ୍ଧର୍ବ ସମୟ ବିତିଯାଇଥିଲେ ମଧ୍ୟ ଏଯାଏ ଶ୍ରେଣୀ ଗୃହ ପ୍ରଧାନଶିକ୍ଷକଙ୍କୁ ହସ୍ତାନ୍ତର କରାଗଲାନାହିଁ। ଏହାସହ ରୁମଗୁଡ଼ିକ ସାନିଟାଇଜ୍ ମଧ୍ୟ ହୋଇପାରିଲା ନାହିଁ। ଏନେଇ ପ୍ରଧାନଶିକ୍ଷକ ରମେଶ ଚନ୍ଦ୍ର ପରିଡ଼ାଙ୍କୁ ପଚାରିବାରୁ ସେ ୧୭.୦୯.୨୦ରେ ସ୍ଥାନୀୟ ସରପଞ୍ଚ, କୋରୁକୋଣ୍ଡା ବିଡିଓ ଏବଂ ୧୮.୧୧.୨୦ରେ କୋରୁକୋଣ୍ଡା ବିଡିଓ ଏବଂ ମାଲକାନଗିରି ଜିଲାପାଳଙ୍କୁ ଚିଠି ଲେଖି ଜଣାଇଥିଲେ ବି ଏଯାଏ କୌଣସି ସୁଫଳ ମିଳି ନ ଥିବା କହିଥିଲେ। ଯାହାଫଳରେ ଛାତ୍ରୀଛାତ୍ର ବାଧ୍ୟହୋଇ ଖୋଲା ଆକାଶ ତଳେ ପାଠ ପଢୁଥିବା ଦେଖିବାକୁ ମିଳିଥିଲା। ଏନେଇ କୋରୁକୋଣ୍ଡା ବିଡିଓ ଅଂଶୁମାନ ମହାପାତ୍ରଙ୍କୁ ପଚରାଯିବାରୁ ସେ ଆଜି ବିଦ୍ୟାଳୟ ଛୁଟି ଥିବା କହିଥିଲେ। ଏହାସହ ସୋମବାର ସୁଦ୍ଧା ଶ୍ରେଣୀ ଗୃହ ଖୋଲିବା ନିମନ୍ତେ ପଞ୍ଚାୟତକୁ ନିର୍ଦ୍ଦେଶ ଦେବେ ବୋଲି ସୂଚନା ଦେଇଥିଲେ।
