ବରଗଡ଼ ଅଫିସ୍,୧୩।୧୧: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର ବରଗଡ଼ ଜିଲା ଗସ୍ତରେ ଆସୁଛନ୍ତି । ଏହି କ୍ରମରେ ମୁଖ୍ୟମନ୍ତ୍ରୀ ପୂର୍ବାହ୍ନ ୧୦ଟା ୧୫ ମିନିଟରେ ନବୀନ ନିବାସ ଛାଡ଼ି ୧୦ଟା ୨୦ମିନିଟରେ ଭୁବନେଶ୍ୱର ବିଜୁ ପଟ୍ଟନାୟକ ଇଣ୍ଟରନ୍ୟାସନାଲ ଏୟାରପୋର୍ଟକୁ ଯିବେ। ସେ ଦିନ ୧୦ଟା ୨୫ମିନିଟରେ ଏୟାରକ୍ରାଫ୍ଟରେ ବାହାରି ଦିନ ୧୧ଟା ୫ମିନିଟରେ ବରଗଡ଼ ଜିଲା ପଦ୍ମପୁର ନିକଟ ସତୀଭଟା ଏୟାରଷ୍ଟ୍ରିପ୍ରେ ପହଞ୍ଚିବେ। ସେଠାରୁ ମୁଖ୍ୟମନ୍ତ୍ରୀ ହେଲିକପ୍ଟର ଯୋଗେ ପୂର୍ବାହ୍ନ ୧୧ଟା ୧୫ମିନିଟରେ ବାହାରି ୧୧ଟା ୩୦ ମିନିଟ୍ ସୁଦ୍ଧା ବିଜେପୁରର ଅସ୍ଥାୟୀ ହେଲିପ୍ୟାଡ୍ରେ ଓହ୍ଲାଇବେ ଏବଂ ୧୧ଟା ୫୯ ମିନିଟରେ ବିଜେପୁରରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ସ୍ମାର୍ଟ କାର୍ଡ଼ ବଣ୍ଟନ ଏବଂ ବିଭିନ୍ନ ପ୍ରକଳ୍ପର ଉଦ୍ଘାଟନ ସମାରୋହରେ ଯୋଗଦେବା କାର୍ଯ୍ୟକ୍ରମ ରହିଛି। ମୁଖ୍ୟମନ୍ତ୍ରୀଙ୍କ ଏହି କାର୍ଯ୍ୟକ୍ରମ ପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ଏଥିପାଇଁ ୧୮ପ୍ଲାଟୁନ ଫୋର୍ସ, ୮ଜଣ ଡିଏସ୍ପି, ୧୫ଜଣ ଇନ୍ସପେକ୍ଟର, ୨୫ଜଣ ସବ୍ଇନ୍ସପେକ୍ଟର, ୪୦ଜଣ ଆସିଷ୍ଟାଣ୍ଟ ସବ୍ଇନ୍ସପେକ୍ଟରଙ୍କ ସହିତ ଏସଓଜି, ଡିଭିଏଫ, ସିଆରପିଏଫ୍ ଟିମ୍କୁ ମୁତୟନ କରାଯିବ ବୋଲି ଏସ୍ପି ରାହୁଲ ଜୈନ କହିଛନ୍ତି । ଏହାସହିତ ବିଭିନ୍ନ ଛକ ସ୍ଥାନରେ ଯାଞ୍ଚ କରାଯିବ ଏବଂ ଯେଉଁମାନଙ୍କ କରୋନା ଆରଟିପିସିଆର ରିପୋର୍ଟ ନେଗେଟିଭ ଅଛି, ସେମାନଙ୍କୁ ଯାଞ୍ଚ ପରେ କାର୍ଯ୍ୟକ୍ରମ ସ୍ଥଳୀକୁ ପ୍ରବେଶ ପାଇଁ ଅନୁମତି ଦିଆଯିବ ବୋଲି ଏସ୍ପି ଜୈନ ସୂଚନା ଦେଇଛନ୍ତି। ଅନ୍ୟପଟେ ମୁଖ୍ୟମନ୍ତ୍ରୀଙ୍କ ଏହି ଗସ୍ତକୁ ବିରୋଧ କରିବା ପାଇଁ ବିରୋଧୀ ଭାଜପା ଓ କଂଗ୍ରେସ ସଜବାଜ ହେଉଥିବା ସୂଚନା ମିଳିଛି ।
