କେନ୍ଦୁଝର,୯ା୧୦(ନରେଶ ଚନ୍ଦ୍ର ପଟ୍ଟନାୟକ): ସଦର ବ୍ଲକ ଅନ୍ତର୍ଗତ ହାଣ୍ଡିଭଙ୍ଗା ଓ ରାଇକଳା ପଞ୍ଚାୟତ ସଂଯୋଗ କରୁଥିବା ରାସ୍ତା ତଥା ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିଜ ଗ୍ରାମ ଶୋଚନୀୟ ହୋଇ ପଡ଼ିଥିବାବେଳେ ବିଭାଗ ନିଘୋଡ଼ ନିଦ୍ରାରେ ଶୋଇଛି।
ଘଟଣାରୁ ପ୍ରକାଶ ଯେ, ଯେତେବେଳେ ଲୋକଙ୍କ ପାଇଁ ଲୋକମାନଙ୍କ ଦ୍ୱାରା ଲୋକମାନଙ୍କ ନିମନ୍ତେ ସାଢ଼େ ୪ କୋଟି ଓଡ଼ିଆଙ୍କ ଅତି ପ୍ରିୟ ମୁଖ୍ୟମନ୍ତ୍ରୀ ବିଭିନ୍ନ ସ୍ଥାନକୁ ଯାଇଥାନ୍ତି, ପ୍ରବଳ ଜନସମାଗମ ହେଉଛି। ଠିକ୍ ସେହି ଭଳି ନିଜର ଅତି ଆପଣାର ନିର୍ବାଚନମଣ୍ଡଳୀର ମୁଖ୍ୟମନ୍ତ୍ରୀଙ୍କୁ ପାଖରେ ପାଇ କାହାର ବା ଟିକେ ଦେଖିବା ପାଇଁ ମନ ବ୍ୟାକୁଳ ନ ହେବ। ମୁଖ୍ୟମନ୍ତ୍ରୀ ଗାଁକୁ ଆସିଲେ ସମସ୍ତେ ଧାଇଁ ଥାଆନ୍ତି ମୁଖ୍ୟମନ୍ତ୍ରୀଙ୍କ ଗାଁକୁ। ପଦ୍ମପୁର, ଗୋବର୍ଦ୍ଧନ, କାଉଁରୀକଳା, ଶଙ୍କିରୀ,ବାଉରୀପଦା, ବୋଦାପଳଶା,ମହାଦେଇଯୋଡ଼ା, ବରଦାପାଳ, ନୂଆଗାଁ ଆଦି ପଞ୍ଚାୟତ ଲୋକେ ହାଣ୍ଡିଭଙ୍ଗା ପଞ୍ଚାୟତ ରାସ୍ତା ଦେଇ ରାଇକକଳା ଗ୍ରାମକୁ ଯାଇଥାନ୍ତି। ହେଲେ ହାଣ୍ଡିଭଙ୍ଗାଠାରୁ ରାଇକଳା ଭାୟା ସାରିଆପଶି ରାସ୍ତା ମରଣଯନ୍ତା ପାଲଟି ଥିବାରୁ ଲୋକେ ନାହିଁ ନ ଥିବା ଅସୁବିଧା ଭୋଗୁଛନ୍ତି। ମୁଖ୍ୟମନ୍ତ୍ରୀ ଗାଁକୁ ଆସୁଥିବା ସମୟରେ କେତେ ଯେ ବାବୁ ଭାୟାଙ୍କ ଗାଡ଼ି ମୋଟର ଏହି ରାସ୍ତା ଦେଇ ଯାଇଥାଏ କାହାର ନଜର ନ ପଡ଼ିବା ଅତି ଦୁର୍ଭାଗ୍ୟର ବିଷୟ ବୋଲି ସମାଜସେବୀ ସରୋଜ ସାହୁ କହିଛନ୍ତି। ରାସ୍ତାରେ ପାଣି ଜମି ମଝିରେ ମଝିରେ ବିରାଟକାୟ ଗର୍ତ୍ତ ସଷ୍ଟି ହୋଇ ଯାଇଥିବାବେଳେ ରାସ୍ତାଟି ଭାଙ୍ଗି ରୁଜି ଦୁର୍ବିସହ ହୋଇପଡ଼ିଛି। ଆମ୍ବୁଲାନ୍ସ କିମ୍ବା କୌଣସି ଆପଦକାଳୀନ ଗାଡ଼ି ଏ ରାସ୍ତାରେ ଯାତାୟାତ କରିବା ଅସମ୍ଭବ ହୋଇପଡ଼ିଛି।
ବିଶେଷକରି ରାଇକଳା ଢିପାସାହିଠାରୁ ସାରିଆପଶି ଗ୍ରାମ ପର୍ଯ୍ୟନ୍ତ ୧ କିମି ରାସ୍ତା ସବୁଠାରୁ ବିପଦପୂର୍ଣ୍ଣ ହୋଇ ପଡ଼ିଛି। ଏହି ରାସ୍ତାର ଦୁରବସ୍ଥା ପାଇଁ ୫ କିମି ପରିବର୍ତ୍ତେ ୩୦ କିମି ଝୁମ୍ପୁରା ଦେଇ କେନ୍ଦୁଝର ମୁଖ୍ୟାଳୟକୁ ଲୋକେ ବିଭିନ୍ନ କାର୍ଯ୍ୟରେ ଯାତାୟାତ କରୁଛନ୍ତି। ଏହି ରାସ୍ତାଟି ଏ ଅଞ୍ଚଳର ଜୀବନ ରେଖା ସଦୃଶ ହୋଇଥିବାବେଳେ ରାଇକଳା, ନାଗରପାଳ, ହରିପଶି, ଫକୀରପୁର, ଆମୁଣି,ସଣ୍ଡିଆପଶି, ଖପରାଖାଇ, ସୁନାପଶି, ତିନିଚତିରିଆ ଆଦି ଗ୍ରାମର ଲୋକେ ପ୍ରତ୍ୟେକ ଦିନ ଏ ରାସ୍ତା ଉପରେ ନିର୍ଭର କରି ଥାଆନ୍ତି। ଦୁଃଖ ଓ ପରିତାପର ବିଷୟ ମାନ୍ୟବର ମୁଖ୍ୟମନ୍ତ୍ରୀଙ୍କ ନିଜ ଗ୍ରାମର ରାସ୍ତାର ଦୁରବସ୍ଥା ପାଇଁ ବିଭାଗ ତରଫରୁ ଆଜି ପର୍ଯ୍ୟନ୍ତ କୌଣସି ପ୍ରକାର ଆଶୁ ସମାଧାନ କରିବା ବଦଳରେ ହାତ ବାନ୍ଧି ବସିଛନ୍ତି। ଏଥିରୁ ବିଭାଗୀୟ ଅଧିକାରୀଙ୍କ ପାରିବାପଣିଆ ଜଣାପଡୁଛି। ଏଣୁ ତୁରନ୍ତ ହାଣ୍ଡିଭଙ୍ଗା ଗ୍ରାମଠାରୁ ରାଇକଳା ଢିପା ସାହି ଭାୟା ସାରିଆପଶି ପର୍ଯ୍ୟନ୍ତ ରାସ୍ତାକୁ ପିଚୁ କିମ୍ବା କଂକ୍ରିଟ କରିବାକୁ ସୁଜନ ଦେହୁରୀ, ଗଣେଶ୍ୱର ଦେହୁରୀ, ହାଡ଼ିବନ୍ଧୁ ନାଏକ, ଚୈତନ୍ୟ ସର୍ଦ୍ଦାର, ରଞ୍ଜିତ ମୁଣ୍ଡା, ଅଜିତ ଆପଟ୍ଟ, ଗୌତମ ମହାନ୍ତ, ଶମ୍ଭୁନାଥ ନାଏକ ପ୍ରମୁଖ ଜିଲାପ୍ରଶାସନଙ୍କୁ ନିବେଦନ କରିଛନ୍ତି।
