ଦାରିଙ୍ଗବାଡ଼ି,୧୬ା୭(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ପଞ୍ଚାୟତର ଦୁର୍ଗମ ଗବାଟବାଡ଼ି ଗ୍ରାମରେ ଗୁରୁବାର ରଥଯାତ୍ରା ବହୁ ଆଡ଼ମ୍ବର ତଥା ଜନଜାତିଙ୍କ ସଂସ୍କୃତି ପରମ୍ପରାରେ ପାଳିତ ହୋଇଯାଇଛି। ଏହି ଯାତ୍ରାରେ କନ୍ଧମାଳ ଏମ୍ପି ସୁକାନ୍ତ କୁମାର ପାଣିଗ୍ରାହୀ ଯୋଗଦେଇ ରଥରେ ରୀତିନୀତି ପୂଜାର୍ଚ୍ଚନା କରିବା ସହ ଛେରାପହଁରା କରିଥିଲେ। ପରେ ସେ ରଥ ଟାଣିଥିଲେ। ତାଙ୍କ ସହ ଏମ୍ପିଙ୍କ କନ୍ଧମାଳ ନିର୍ବାଚନ ମଣ୍ଡଳୀର ପ୍ରତିନିଧି ଦୁର୍ଗା ଆଚାର୍ଯ୍ୟ, ବିଡିଓ ପ୍ରୀତିରଞ୍ଜନ ରଥ, ତହସିଲଦାର ଧୀରଜ ପାତ୍ର ପ୍ରମୁଖ ଯୋଗଦେଇ ରଥ ଟାଣିଥିଲେ।
ପ୍ରକାଶ ଯେ, ଗବାଟବାଡ଼ି ଜନଜାତି ସମ୍ପ୍ରଦାୟର ଲୋକ ବାସ କରୁଛନ୍ତି। ପ୍ରତ୍ୟେକ ବର୍ଷ ବିଭିନ୍ନ ପର୍ବପର୍ବାଣିକୁ ପାଳନ କରିଆସୁଥିବା ବେଳେ ଜଗନ୍ନାଥଙ୍କ ଏହି ରଥଯାତ୍ରାକୁ ନିଆରା ଢଙ୍ଗରେ ପାଳନ କରୁଛନ୍ତି। ଜନଜାତି ସମ୍ପ୍ରଦାୟର ମହିଳାମାନେ ପ୍ରଥମେ ଗାଁରେ ସୁଦର୍ଶନ ଚକ୍ର ସମେତ ଶ୍ରୀ ଜଗନ୍ନାଥ, ବଳଭଦ୍ର ଏବଂ ସୁଭଦ୍ରାଙ୍କ ଚତୁର୍ଦ୍ଧାମୂର୍ତ୍ତି ଓ କଳସକୁ ମୁଣ୍ଡରେ ବୋହି ଗାଁ ପରିକ୍ରମା କରନ୍ତି। ତାଙ୍କ ସହ ସଂକୀର୍ତ୍ତନ ଦଳର ମୃଦଙ୍ଗ, ଘଣ୍ଟା, ଗିନି ବାଦ୍ୟଯନ୍ତ୍ରରେ ଗାଁ ପ୍ରକମ୍ପିତ ହୁଏ। ପରେ ଚତୁର୍ଦ୍ଧାମୂର୍ତ୍ତିଙ୍କୁ ରଥାରୂଢ଼ କରାଯାଇଥିଲା। ସେଠାରେ କନ୍ଧମାଳ ଏମ୍ପି ଛେରା ପହଁରା ସହ ପୂଜାର୍ଚ୍ଚନା କରିବା ପରେ ରଥଟଣା କାର୍ଯ୍ୟକ୍ରମ ଆରମ୍ଭ ହୋଇଥିଲା। ସବୁଠାରୁ ସୁନ୍ଦର ଓ ଭାଇଚାରା ସୃଷ୍ଟି ପାଇଁ ରଥକୁ ପ୍ରାୟ ୨ କିମି ଦୂର ପଡ଼ୋଶୀ ଗ୍ରାମ ଲାରିବାଡ଼ି ପର୍ଯ୍ୟନ୍ତ ଟଣାଯାଇଛି।
ଏନେଇ ଏମ୍ପି ତାଙ୍କ ପ୍ରତିକ୍ରିୟାରେ କହିଛନ୍ତି, ଗବାଟବାଡ଼ି ଗ୍ରାମରେ ବନବାସୀଭାଇ ଓ ଭଉଣୀଙ୍କ ସହ ଏହି ଯାତ୍ରାରେ ମହାପ୍ରଭୁଙ୍କ ସେବା କରିବାର ସୁଯୋଗ ପାଇଲି। ଏହି ଗବାଟବାଡ଼ି ଗ୍ରାମକୁ ମୁଁ ଆଦର୍ଶ ଗ୍ରାମ ଭାବେ ଘୋଷଣା କରୁଛି। ଆସନ୍ତା ୩ ବର୍ଷ ମଧ୍ୟରେ ଗବାଟବାଡ଼ି ଗ୍ରାମର ବିକାଶ ପାଇଁ ସ୍ବତନ୍ତ୍ର ଦୃଷ୍ଟି ଦିଆଯିବ ବୋଲି ସେ ଘୋଷଣା କରିଛନ୍ତି।
