ନୂଆଦିଲ୍ଲୀ,୨୬ା୮:ଇସ୍ରାଏଲ୍ର ଏନ୍ଏସ୍ଓ ଗ୍ରୁପ୍ ପକ୍ଷରୁ ବିକଶିତ ପେଗାସସ୍ ସ୍ପାଏଓ୍ବେର ଜରିଆରେ ଗୁପ୍ତଚରଗିରି କରାଯାଇଥିବା ନେଇ ଅଭିଯୋଗର ତଦନ୍ତ ପାଇଁ ସୁପ୍ରିମକୋର୍ଟ ଏକ କମିଟି ଗଠନ କରିଛନ୍ତି। ଏହି ବୈଷୟିକ ତଥା ଅନୁଧ୍ୟାନକାରୀ କମିଟିକୁ ତଦନ୍ତରେ କେନ୍ଦ୍ର ସରକାର ସହଯୋଗ କରୁ ନ ଥିବାରୁ ଗୁରୁବାର ସିଜେଆଇ ଏନ୍.ଭି. ରମନାଙ୍କ ଅଧ୍ୟକ୍ଷତାରେ ଗଠିତ ତିନିଜଣିଆ କମିଟି ଅସନ୍ତୋଷ ବ୍ୟକ୍ତ କରିଛନ୍ତି।
ପ୍ରଧାନ ବିଚାରପତି ରମନା କହିଛନ୍ତି, ସର୍ବୋଚ୍ଚ ଅଦାଲତଙ୍କ ଦ୍ୱାରା ନିଯୁକ୍ତ କମିଟି ୨୯ଟି ମୋବାଇଲ ଫୋନ୍ ଯାଞ୍ଚ କରିଛି। ସେଥିରୁ ୫ଟି ମୋବାଇଲରେ ମାଲ୍ଓ୍ବେର ଠାବ କରାଯାଇଛି। ଉକ୍ତ ପ୍ୟାନେଲ ତିନୋଟି ଭାଗରେ ବିସ୍ତୃତ ରିପୋର୍ଟ ଦାଖଲ କରିଛି। ନାଗରିକଙ୍କ ବ୍ୟକ୍ତିଗତ ଅନ୍ତରଙ୍ଗ ତଥ୍ୟ (ପ୍ରିଭେସି) ସୁରକ୍ଷା ଅଧିକାର ଏବଂ ଦେଶର ସାଇବର ସିକ୍ୟୁରିଟିକୁ ସୁନିଶ୍ଚିତ କରିବା ସକାଶେ ଆଇନରେ ସଂଶୋଧନ କରିବା ଲାଗି ଏହାର ଗୋଟିଏ ଭାଗରେ ପରାମର୍ଶ ଦିଆଯାଇଛି। ୪ ସପ୍ତାହ ପରେ ଏହି ପ୍ରସଙ୍ଗରେ ଶୁଣାଣି ପାଇଁ ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ହିମା କୋହିଲ ସାମିଲ ଥିବା ଖଣ୍ଡପୀଠ ଧାର୍ଯ୍ୟ କରିଛନ୍ତି। ଦେଶର ଖବରଦାତା, ବିଚାରପତି, ମାନବାଧିକାର କର୍ମୀ ଓ ବିରୋଧୀ ନେତାମାନଙ୍କ ଗୁପ୍ତଚରଗିରି କରିବା ପାଇଁ କେନ୍ଦ୍ର ପେଗାସସ୍ ସ୍ପାଏଓ୍ବେରକୁ ବ୍ୟବହାର କରିଥିବା ଅଭିଯୋଗ ଆସିବା ପରେ ଗତ ଅକ୍ଟୋବର ୨୭ରେ ସୁପ୍ରିମକୋର୍ଟ ତଦନ୍ତ ନିର୍ଦ୍ଦେଶ ଦେଇଥିଲେ।
