ସାକ୍ଷୀଗୋପାଳ,୬ା୩(ଡି.ଏନ୍.ଏ.): ଭୁବନେଶ୍ୱର-ପୁରୀ ୩୧୬ ନଂ. ଜାତୀୟ ରାଜପଥର ସାକ୍ଷୀଗୋପାଳ ବଡ଼କାଞ୍ଜିଆଛକ ନିକଟରେ ପୁରୀ ଯାଉଥିବା ଏକ କାର୍ ରବିବାର ଦୁର୍ଘଟଣାର ସମ୍ମୁଖୀନ ହୋଇଛି।
ଭୁବନେଶ୍ୱରରୁ ୪ଜଣ ଯାତ୍ରୀଙ୍କୁ ନେଇ ପୁରୀ ଯାଉଥିବା ଓଡି ୦୨ ବି.ଜି ୭୭୪୪ ନମ୍ବର କାର୍ଟି ଭାରସାମ୍ୟ ହରାଇ ପ୍ରଥମେ ରୋଡ୍ ଡିଭାଇଡର ଉପରକୁ ମାଡ଼ିଯାଇ ବିପରୀତ ରାସ୍ତା ଉପରେ ଓଲଟି ପଡ଼ିଥିଲା। ଦ୍ରୁତଗତିରେ ଆସୁଥିବାରୁ ରାସ୍ତାପାର୍ଶ୍ୱ ଲୁହାର ସୁରକ୍ଷାବାଡ଼ରେ ପିଟିହୋଇ ହୋଇଥିଲା। ଦୁର୍ଘଟଣାରେ ଆହତ ଯାତ୍ରୀଙ୍କୁ ସ୍ଥାନୀୟ ଲୋକେ ଉଦ୍ଧାର କରି ସାକ୍ଷୀଗୋପାଳ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ। ସେମାନଙ୍କ ମଧ୍ୟରୁ ପୂଜା ତ୍ରିପାଠୀ ୨୧ ବର୍ଷ ଓ ଅବିନାଶ ଦାଶ ୨୨ ବର୍ଷଙ୍କୁ ଗୁରୁତର ଅବସ୍ଥାରେ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଅନ୍ୟ ଦୁଇଜଣ ଯାତ୍ରୀ ଶ୍ରୀତେଷ ପାତ୍ର ଓ ଅଭିଷେକ ବଳିୟାରସିଂହଙ୍କୁ ଚିକିତ୍ସା କରି ଛାଡ଼ି ଦିଆଯାଇଛି। ସତ୍ୟବାଦୀ ପୋଲିସ ଦୁର୍ଘଟଣାଗ୍ରସ୍ତ କାର୍ଟି ଜବତ କରି ତଦନ୍ତ ଚଳାଇଛି।
