ପୁରୀ ଅଫିସ,୧୧ା୩:ଶ୍ରୀମନ୍ଦିର ଓ ଚତୁଃପାର୍ଶ୍ୱ ଉନ୍ନତି ପାଇଁ ଚଳିତବଷର୍ର୍(୨୦୨୧-୨୨)ର ବଜେଟ ପ୍ରସ୍ତୁତ ହୋଇଯାଇଛି। ଏଥିପାଇଁ ଅର୍ଥ ସବକମିଟି ପକ୍ଷରୁ ଆକଳନ କରାଯାଇ ୨୦୧ କୋଟି ୭୦ ଲକ୍ଷ ଟଙ୍କାର ବଜେଟ ହୋଇଛି। ଏହି ଚିଠା ପ୍ରସ୍ତାବକୁ ଶ୍ରୀମନ୍ଦିର ପରିଚାଳନା କମିଟି ଅନୁମୋଦନ କରିବା ପରେ ବିଧିବଦ୍ଧ ଭାବେ ଚଳିତବର୍ଷର ବଜେଟ୍ ଉପରେ ମୋହର ବାଜିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷ୍ଣନ କୁମାର ବୁଧବାର ଶ୍ରୀମନ୍ଦିର କାର୍ଯ୍ୟାଳୟରେ ଏ ନେଇ ଅନୁଷ୍ଠିତ ବୈଠକରେ ସୂଚନା ଦେଇଛନ୍ତି। ବୈଠକ ପରେ ସେ କହିଛନ୍ତି, ଜୁନରେ ହେବାକୁ ଯାଉଥିବା ରଥଯାତ୍ରା ପାଇଁ ୧୧ କୋଟି, ସେବାୟତମାନଙ୍କ ସ୍ବାସ୍ଥ୍ୟ ସୁବିଧା ପାଇଁ ୫୦ଲକ୍ଷ, ସେବାୟତଙ୍କୁ ଆର୍ଥିକ ଓ ସାମାଜିକ କ୍ଷେତ୍ରରେ ସହାୟତା ପାଇଁ ୫ କୋଟି ଓ ଗୁରୁକଳ ବିଦ୍ୟାଳୟ ପ୍ରତିଷ୍ଠା ନେଇ ସ୍ବତନ୍ତ୍ର ବ୍ୟୟବରାଦ ହୋଇଛି। ଜେଲରୋଡ୍ସ୍ଥିତ ଭକ୍ତନିବାସ ଓ ହବିଷିଆଳିମାନଙ୍କ ରହଣି ପାଇଁ ଗୋଟିଏ ଧର୍ମଶାଳା ନିର୍ମାଣ କାର୍ଯ୍ୟ ଶେଷ ହୋଇଥିବା ବେଳେ ଆହୁରି ଏକ ଭକ୍ତନିବାସ ନିର୍ମାଣ ନେଇ ପ୍ରସ୍ତୁତି ଚାଲିଛି। ସେହିଭଳି ଖଣିଖାଦନରୁ ୧୦କୋଟି ଅର୍ଥ ସଂଗ୍ରହ ନେଇ ଲକ୍ଷ୍ୟ ଧାର୍ଯ୍ୟ ହୋଇଥିବା ବେଳେ ଭକ୍ତଙ୍କ ଦାନାର୍ଥକୁ କିଭଳି ବଢ଼ାଯିବ, ସେଥିପ୍ରତି ଅଧିକ ଗୁରୁତ୍ୱ ଦିଆଯାଇଥିବା କୁମାର କହିଛନ୍ତି। ବଜେଟରେ ଶ୍ରୀମନ୍ଦିର ପ୍ରଶାସନ ରାଜସ୍ବ ଆୟ ବାବଦକୁ ୯୦ କୋଟି ୮୭ ଲକ୍ଷ ଓ ରାଜସ୍ବ ବ୍ୟତୀତ ଅନ୍ୟ ଆୟ ବାବଦକୁ ୯୦ କୋଟି ୨୬ ଲକ୍ଷ ଟଙ୍କା ମିଳିବା ନେଇ ଉଲ୍ଲେଖ କରିଛି। ତେବେ ଶ୍ରୀମନ୍ଦିର ପ୍ରଶାସନିକ ଖର୍ଚ୍ଚ ରାଜସ୍ବ ବାବଦକୁ ୮୮ କୋଟି ୯୪ ଲକ୍ଷ ଓ ଅନ୍ୟ ବ୍ୟୟ ୧୧୨ କୋଟି ୭୬ ଲକ୍ଷରେ ପହଞ୍ଚିଛି। ଅର୍ଥାତ୍ ମୋଟାମୋଟି ଭାବେ କହିବାକୁ ଗଲେ ପ୍ରଶାସନ ଚଳିତବର୍ଷ ୨୦ କୋଟି ୫୭ ଲକ୍ଷର ଅର୍ଥ ରାଶି ନିଅଣ୍ଟରେ ରହିଛି। କର୍ପସ ଫଣ୍ଡ ସୁଧ ବାବଦକୁ ଶ୍ରୀମନ୍ଦିର ପ୍ରଶାସନକୁ ଚଳିତବର୍ଷ ୧୮ କୋଟି ୭୦ ଲକ୍ଷ, ଶ୍ରୀମନ୍ଦିର ହୁଣ୍ଡି ସୁଧ ବାବଦକୁ ୧୪ କୋଟି ୨୦ ଲକ୍ଷ ଓ ସରକାରଙ୍କ ଗ୍ରାଣ୍ଟ ବାବଦକୁ ୧୬ କୋଟି ୩୭ ଲକ୍ଷ ଟଙ୍କା ଆୟ ହେବା ନେଇ ଅନୁମାନ କରାଯାଇଛି। ଅନ୍ୟପକ୍ଷରେ ଜମି ବିକ୍ରି ବାବଦକୁ ୬୦କୋଟି, ହୁଣ୍ଡି ଅର୍ଥ ଆଦାୟ ବାବଦକୁ ୧୩ କୋଟି ୫୦ ଲକ୍ଷ ଓ ହୁଣ୍ଡି ବ୍ୟତୀତ ଅନ୍ୟାନ୍ୟ ଅର୍ଥ ଆଦାୟ ମୂଲ୍ୟ ୩ କୋଟି ୪୦ ଲକ୍ଷ ଟଙ୍କା ହେବ ବୋଲି କୁହାଯାଇଛି। ବୈଠକରେ ଜିଲାପାଳ ସମର୍ଥ ବର୍ମା, ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ ଓ ଅର୍ଥ ସବକମିଟିର ସଦସ୍ୟମାନେ ଉପସ୍ଥିତ ଥିଲେ।
