ବାଲେଶ୍ୱର ଅଫିସ, ୨୦।୧: ବାଲେଶ୍ୱର ଜିଲା ରେମୁଣା ବ୍ଲକ ବଡ଼ପାଳ ପଞ୍ଚାୟତ ମଧ୍ୟ ଦେଇ ପ୍ରବାହିତ ଗଙ୍ଗାହାର ନଦୀ ଅଞ୍ଚଳବାସୀଙ୍କ ଗମନାଗମନରେ ବାଧକ ସାଜିଛି। କାହିଁ କେଉଁ ଆବାହମାନ କାଳରୁ ବରବାଙ୍କ ଗ୍ରାମର ଶତାଧିକ ପରିବାର ନଦୀ ଉପରେ ଏକ ବାଉଁଶ ପୋଲ ନିର୍ମାଣ କରି ଯା’ଆସ କରୁଛନ୍ତି। ବର୍ଷାଦିନେ ସେମାନଙ୍କୁ ଜଳବନ୍ଦୀରେ ରହିବାକୁ ପଡ଼ିଥାଏ। ରାଜନେତା, ପ୍ରଶାସନିକ ଅଧିକାରୀଙ୍କ ଇଛାଶକ୍ତି ଅଭାବରୁ ନଦୀ ଉପରେ ପୋଲ ନିର୍ମାଣ ହୋଇପାରୁ ନ ଥିବାରୁ ଗ୍ରାମବାସୀ ଦୁର୍ଦ୍ଦଶାରେ କାଳ କାଟୁଛନ୍ତି। ଏପରିକି ଗ୍ରାମରେ ବିବାହ ଉତ୍ସବ ଅନୁଷ୍ଠିତ ହେଲେ ଯାନବାହନ ଯାଇ ପାରୁ ନ ଥିବାରୁ ବର କନ୍ୟା ଚାଲି ଚାଲି ଯାଇଥାନ୍ତି। ନିର୍ବାଚନ ପୂର୍ବରୁ ନେତାମାନେ ପୋଲ ନିର୍ମାଣର ପ୍ରତିଶ୍ରୁତି ଦେଇ ପରେ ଏହାକୁ ଭୁଲି ଯାଆନ୍ତି। ଅନେକ ସମୟରେ ପ୍ରଶାସନିକ ଅଧିକାରୀଙ୍କ ନିକଟରେ ଅଭିଯୋଗ, ଆନ୍ଦୋଳନ ଓ ବିକ୍ଷୋଭ କରାଯାଇଛି। କୌଣସି ସୁଫଳ ମିଳିନାହଁି। ପୋଲ ସମସ୍ୟା ନ ସୁଧୁରିଲେ ଆସନ୍ତା ପଞ୍ଚାୟତ ନିର୍ବାଚନ ବର୍ଜନ ପାଇଁ ଗ୍ରାମବାସୀ ଚେତାବନୀ ଦେଇଛନ୍ତି।
ମୌଳିକ ସୁବିଧା ପାଇବା ପାଇଁ ୧୦୦ରୁ ଊର୍ଦ୍ଧ୍ୱ ପରିବାର ବହୁତ ହଇରାଣ ହେଉଛନ୍ତି। ରାସ୍ତା ଓ ପାଣି ସମସ୍ୟା ମୁଖ୍ୟ ସମସ୍ୟା ଭାବେ ଉଭା ହୋଇଛି। ବନ୍ୟା ହେଲେ ଗ୍ରାମବାସୀ ଦିନ ଦିନ ଧରି ଜଳବନ୍ଦୀ ହୋଇ ରହୁଛନ୍ତି। ଘରୁ ପଦାକୁ ବାହାରିବା ଠପ୍ ହୋଇଯାଏ। ବଜାରକୁ ଆସିବା ପାଇଁ ପାଣି ଭିତରେ ପଶି ଆସିବାକୁ ପଡ଼େ। ଗଙ୍ଗାହାର ନଦୀ ପାଖରେ ରହିଥିବା ଏହି ଉପାନ୍ତ ଗାଁକୁ ଆମ୍ବୁଲାନ୍ସ ଯାଇପାରେ ନାହିଁ । ଫଳରେ ରୋଗୀଙ୍କୁ ଖଟିଆରେ ବୋହି ଆଣିବାକୁ ପଡ଼ିଥାଏ। ବର୍ଷା କିମ୍ବା ବନ୍ୟା ସମୟରେ ପିଲାମାନେ ସ୍କୁଲକୁ ଯିବା ସମ୍ଭବପର ହୁଏନାହିଁ। ବନ୍ୟା ପାଣିରେ ଅଧିକାଂଶ ନଳକୂଅ ବୁଡ଼ିଯାଏ। ପିଇବା ପାଣି ପାଇଁ ଗ୍ରାମବାସୀ ଭାରି କଲବଲ ହୁଅନ୍ତି। ଗାଁରେ କାହାର ଝିଅ ବାହାଘର ହେଲେ ପୋଲ ଆରପଟ ଥିବା କାକବରେଇ ଗାଁରେ ଗାଡ଼ି ରଖି ବର ଓ ବରଯାତ୍ରୀ ଚାଲି ଚାଲି ଆସିଥାନ୍ତି। ଗାଁକୁ ରାସ୍ତା ଓ ନଦୀ ଉପରେ ପୋଲ ନିର୍ମାଣ ପାଇଁ ରାଜନେତାଙ୍କ ଠାରୁ ଆରମ୍ଭ କରି ଜିଲାପାଳଙ୍କ ପର୍ଯ୍ୟନ୍ତ ଦୃଷ୍ଟି ଆକର୍ଷଣ କରିଛନ୍ତି ଗ୍ରାମବାସୀ। ହେଲେ ବିଡ଼ମ୍ବନା, କେହି ଗୁରୁତ୍ୱ ଦେଇନାହାନ୍ତି। ଶେଷରେ ଭାଗ୍ୟକୁ ଆଦରି ନଦୀ ଉପରେ ନିଜସ୍ବ ଶ୍ରମଦାନ ଓ ଟଙ୍କା ଖର୍ଚ୍ଚ କରି ବାଉଁଶ ପୋଲ ତିଆରି କରିଛନ୍ତି ଗ୍ରାମବାସୀ। ସେପଟେ ନଦୀବନ୍ଧରେ ପଥରପ୍ୟାକିଂ କରାଯାଇ ନ ଥିବାରୁ ଅତଡ଼ା ଧସିବା ସହ କୂଳ ଖାଉଛି। ଗ୍ରାମବାସୀଙ୍କ ପାଇଁ ବର୍ତ୍ତମାନ ଏହା ବଡ଼ ବିପଦ ସାଜିଛି। ଏପରି ପରିସ୍ଥିତିରେ ୫ରୁ ୭ପରିବାର ଗ୍ରାମ ଛାଡ଼ି ଅନ୍ୟତ୍ର ବସବାସ କରିଲେଣି। ଏପରିି ହେଲେ ଆଗାମୀ ଦିନରେ ଉକ୍ତ ଗ୍ରାମ ଜନଶୂନ୍ୟ ହେବାର ଆଶଙ୍କା ଦେଖାଦେଇଛି। ଏହାର ପ୍ରତିବାଦରେ ଆଗାମୀ ପଞ୍ଚାୟତ ନିର୍ବାଚନ ବର୍ଜନ କରିବେ ବୋଲି ଗ୍ରାମବାସୀ ପ୍ରଭାକର ପ୍ରଧାନ, ସନ୍ତୋଷ ସାନ୍ତରା, ମଧୁ ପ୍ରଧାନ, ଅରୁଣ ପ୍ରଧାନ, ବାବୁଲି ସାନ୍ତରା, ରଘୁନାଥ ପ୍ରଧାନ, ଗଜେନ୍ଦ୍ର ଜେନା, ରମାକାନ୍ତ ଜେନା, ବୃନ୍ଦାବନ ଜେନା, ଚୈତନ୍ୟ ସାନ୍ତରା, ହରିଶ୍ଚନ୍ଦ୍ର ପ୍ରଧାନ ପ୍ରମୁଖ ଚେତାବନୀ ଦେଇଛନ୍ତି।
ଏନେଇ ରେମୁଣା ବିଧାୟକ ସୁଧାଂଶୁ ଶେଖର ପରିଡ଼ା କହନ୍ତି, ଗତ ୬ମାସ ପୂର୍ବରୁ ହୋଇଥିବା ଜିଲା ପରିଷଦ ବୈଠକରେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଉକ୍ତ ଅଞ୍ଚଳକୁ ସାମିଲ୍ କରାଯାଇଛି। ଗୁଡ୍ଦା ପଞ୍ଚାୟତରୁ ଗଣ୍ଡର୍ଦା, କାନପୁର, ବରବାଙ୍କରୁ ପଦ୍ମପୁର ଦେଇ ପିଏମ୍ଜିଏସ୍ୱାଇ ରାସ୍ତା ନିର୍ମାଣ ହେଲେ ବରବାଙ୍କ ପୋଲ ନିର୍ମାଣ ହେବ। ଚଳିତବର୍ଷ ସୁଦ୍ଧା ପୋଲ ନିର୍ମାଣ କାର୍ଯ୍ୟ ହେବା ନେଇ ପ୍ରକାଶ କରିଛନ୍ତି।
