ଯାଜପୁର ଅଫିସ/ରଗଡ଼ି (ଡି.ଏନ.ଏ.),୫।୭: ଯାଜପୁର ଜିଲାର ବ୍ୟାସନଗର ତହସିଲରେ ମୋରମ ଏବଂ ଧର୍ମଶାଳା ତହସିଲରେ ବାଲି ଲୁଟ୍ ନିତିଦିନିଆ ହୋଇଛି। ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଏସ୍ପିସିବି)ଠାରୁ ପରିଚାଳନା ଅନୁମତି ବା କନସେଣ୍ଟ ଟୁ ଅପରେଟ୍ (ସିଟିଓ) ଏବଂ ପରିବେଶଗତ ଅନୁମତି ବା ଏନ୍ଭାଇରନମେଣ୍ଟ କ୍ଲିୟରାନ୍ସ (ଇସି) ନ ଥାଇ ଜିଲାର ବିଭିନ୍ନ ନଦୀନାଳରୁ ବାଲି ଉତ୍ତୋଳନ କରାଯାଉଛି। ବିଶେଷକରି ଧର୍ମଶାଳା ତହସିଲ ଅଞ୍ଚଳର ବ୍ରାହ୍ମଣୀ ନଦୀରୁ ବେଆଇନ ବାଲି ଉତ୍ତୋଳନ ସୀମା ଲଂଘିଛି। ଅନୁରୂପ ଭାବେ ବ୍ୟାସନଗର ତହସିଲ ଅଞ୍ଚଳରେ ମୋରମ ଲୁଟ ଅଭିଯୋଗ ହେଉଥିଲେ ହେଁ କିଛି ସୁଫଳ ମିଳିପାରୁ ନାହିଁ। ଏହି ବେଆଇନ କାର୍ଯ୍ୟ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ବଦଳରେ ସମ୍ପୃକ୍ତ ଅଧିକାରୀ ବିପୁଳ ପରିମାଣର ଚାନ୍ଦା ନେଇ ମାଲାମାଲ ହେଉଛନ୍ତି। ଏପରିକି ସେହି କଳାଧନରେ ସମ୍ପୃକ୍ତ ଅଧିକାରୀ ଧରାଧରି କରି ପଦୋନ୍ନତି ପାଇଥିବା ଚର୍ଚ୍ଚା ହେଉଛି।
୫୩ ନମ୍ବର ଜାତୀୟ ରାଜପଥର ଧର୍ମଶାଳା ତହସିଲ ଅନ୍ତର୍ଗତ କବାଟବନ୍ଧ ବ୍ରିଜ ନିକଟରେ ଥିବା ରାଇଚନ୍ଦା ବାଲିଘାଟର ୪୮୧ ପ୍ଲଟ ନମ୍ବରରୁ ୨୦ ଏକର ପରିମିତ ଅଞ୍ଚଳରୁ ବାଲି ଉତ୍ତୋଳନ କରିବାକୁ ଲିଜଧାରୀଙ୍କୁ ଅନୁମତି ମିଳିଥିଲା। ଏହି ଅନୁମତି ୨୦୧୬-୧୭ରୁ ୨୦୨୦-୨୧ ମାର୍ଚ୍ଚ ପର୍ଯ୍ୟନ୍ତ ବୈଧ ଥିଲା। କିନ୍ତୁ ଏଯାଏ ବିନା ସିଟିଓ ଓ ଇସିରେ ଏହି ବାଲିଘାଟର ପ୍ରାୟ ୫୦ ଏକର ଅଞ୍ଚଳରୁ ବାଲି ଉତ୍ତୋଳନ ହେଉଥିବା ଅଭିଯୋଗ ହୋଇଛି। ଚିନ୍ତାଜନକ ବିଷୟ ଯେ, ବ୍ରାହ୍ମଣୀ ନଦୀର ବ୍ରିଜ୍ଠାରୁ ମାତ୍ର ୨୦୦ ମିଟର ମଧ୍ୟରେ ଏହି ବାଲି ଘାଟ ଏକାଧିକ ମେଶିନ ଜରିଆରେ ଚାଲିଛି, ଯାହାକି ବ୍ରିଜ୍ ପ୍ରତି ବିପଦ ଆଶଙ୍କା ରହିଛି। ପୂର୍ବରୁ ଏହାର ବିଭିନ୍ନ ସ୍ଥାନରେ ଭାଙ୍ଗି ଯାଇଥିବା ଦେଖିବାକୁ ମିଳିଛି। ନିକଟରୁ ବିପୁଳ ପରିମାଣର ବାଲି ଉତ୍ତୋଳନ ହୋଇଥିବାରୁ ଯେତେ ଯାହା ମରାମତି କରାଗଲେ ମଧ୍ୟ ବ୍ରିଜ୍ର ସ୍ଥିତି ଠିକ୍ ହୋଇପାରୁନାହିଁ।
ଅନ୍ୟପକ୍ଷରେ ବ୍ୟାସନଗର ତହସିଲ ଅନ୍ତର୍ଗତ ପଛିକୋଟ ରାଜସ୍ବ ନିରୀକ୍ଷକଙ୍କ ଅଧୀନ ପରମାନନ୍ଦପୁର ନିକଟରେ ଥିବା ଏକ ଆକାଶିଆ ଜଙ୍ଗଲ କଡ଼ ସରକାରୀ ଜମିରୁ ବିପୁଳ ପରିମାଣର ମୋରମ ଲୁଟ୍ ଚାଲିଛି। ଏହି ମୋରମ ଖନନ ପାଇଁ କୌଣସି ଅନୁମତି ନ ଥିବା ବ୍ୟାସନଗର ତହସିଲଦାର ସ୍ପଷ୍ଟ କରୁଥିବାବେଳେ କିଭଳି ମାଫିଆ ମାନେ ଶହ ଶହ ଟ୍ରିପ୍ ମୋରମ ଚୋରାଚାଲାଣ କରୁଛନ୍ତି ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। ପଛିକୋଟ ରାଜସ୍ବ ନିରୀକ୍ଷକଙ୍କ ଅଧୀନ ମଞ୍ଜୁରୀ, ଖମିଗାଁ ଓ କୋରବନ୍ଦୀ ମୌଜାରୁ ବାରମ୍ବାର ବେଆଇନ ମୋରମ ଉତ୍ତୋଳନ ହେଉଥିବା ଅଭିଯୋଗ ହୋଇ ଆସୁଛି। ପୋଖରୀ ଖନନ ନାମରେ ନିର୍ଦ୍ଧାରିତ ପରିମାଣଠାରୁ ଶତାଧିକ ଗୁଣ ଅଧିକ ମୋରମ ଲୁଟ୍ କରାଯାଉଛି। ଏନେଇ ବ୍ୟାସନଗର ଅତିରିକ୍ତ ତହସିଲଦାର ବିକ୍ରମ କୁମାର ମଲ୍ଲିକଙ୍କୁ ପଚାରିବାରୁ ଖୁବଶୀଘ୍ର ଏହି ମାଫିଆମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
