ବରଗଡ଼ ଅଫିସ,୨୭ା୨: ବରଗଡ଼ ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ଭୋଟ ଗଣତି ଶନିବାର ବିଳମ୍ବିତ ରାତ୍ରି ପର୍ଯ୍ୟନ୍ତ ଚାଲିଥିଲା । ତେବେ ଗଣତି ସରିବା ପରେ ବରଗଡ଼ ବିଧାନସଭା ନିର୍ବାଚନମଣ୍ଡଳୀ ୨ ଜିଲା ପରିଷଦ ଜୋନ୍ରେ ବିଜେଡି ପ୍ରାର୍ଥି ବିଜୟୀ ହୋଇଥିବା ଜଣପଡ଼ିଛି। ଏହି ନିର୍ବାଚନମଣ୍ଡଳୀ ଅଧୀନ ବରଗଡ଼ ବ୍ଲକ ଜୋନ୍-୧ରେ ବିଜେଡି ପ୍ରାର୍ଥିନୀ ପୁଷ୍ପା ଭୋଇ ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ଭାଜପାର ମୁକ୍ତା ସାହୁଙ୍କୁ ୧୪୯୯ ଭୋଟ୍ରେ ହରାଇଛନ୍ତି। ପୁଷ୍ପାଙ୍କୁ ୧୦ ହଜାର ୭୦୦ ଭୋଟ୍ ମିଳିଥିବାବେଳେ ମୁକ୍ତାଙ୍କ ସପକ୍ଷରେ ୯୨୦୧ ଭୋଟ୍ ପଡ଼ିଛି। ଗତ ୨୦୧୭ରୁ ଏହି ଆସନ ଭାଜପା ଦଖଲରେ ରହିଥିଲା। ସେହିପରି ବରଗଡ଼ ବିଧାନସଭା ନିର୍ବାଚନମଣ୍ଡଳୀ ଅଧୀନ ବରପାଲି ବ୍ଲକ ଜୋନ୍-୧କୁ ମଧ୍ୟ ବିଜେଡି କବ୍ଜା କରି ନେଇଛି। ଏହି ଆସନରେ ବିଜେଡି ପ୍ରାର୍ଥୀ ଗୋବିନ୍ଦ ସାହୁ ନିକଟତମ ପ୍ରାର୍ଥୀ ଭାଜପାର ସଂଗ୍ରାମ କେଶରୀ ବାରିକଙ୍କୁ ୨୧୨୭ ଭୋଟ୍ରେ ହରାଇଛନ୍ତି। ଗୋବିନ୍ଦଙ୍କ ସପକ୍ଷରେ ୧୦ ହଜାର ୯୧୦ ଭୋଟ୍ ପଡ଼ିଥିବାବେଳେ ସଂଗ୍ରାମଙ୍କୁ ୮୭୮୩ ଖଣ୍ଡ ଭୋଟ୍ ମିଳିଛି। ୨୦୧୭ରୁ ଏହି ଆସନ ମଧ୍ୟ ଭାଜପା ଦଖଲରେ ରହିଥିଲା।
