ଭୁବନେଶ୍ୱର, ୨୯।୨(ବ୍ୟୁରୋ): ରାଜଧାନୀ ଭୁବନେଶ୍ୱରର ସ୍ମାର୍ଟ ଜନପଥକୁ ଅଧିକ ସୁନ୍ଦର କରିବା ଉଦ୍ଦେଶ୍ୟରେ ମେଡିଆନ୍ରେ ପରିବେଶ ଅନୁକୂଳ ବାଉଁଶ ବ୍ୟାରିକେଟ୍ ଲଗାଯାଇଥିଲା। ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ (ବିଏସ୍ସିଏଲ୍) ପକ୍ଷରୁ ଶିଶୁ ଭବନ ଛକଠାରୁ ବାଣୀବିହାର (୩.୯ କିଲୋମିଟର) ପର୍ଯ୍ୟନ୍ତ ବ୍ୟାରିକେଡ୍ କରାଯାଇଥିଲା। ମାତ୍ର ରକ୍ଷଣାବେକ୍ଷଣ ଅଭାବରୁ ଅଳ୍ପ କିଛିଦିନ ମଧ୍ୟରେ ଏଗୁଡିକ ନଷ୍ଟ ହେବାକୁ ବସିଲାଣି। କେଉଁଠି ବାଉଁଶ ଭାଙ୍ଗି ରାସ୍ତାକୁ ନଇଁଯାଇଛି ତ ଆଉ କେଉଁଠି ଭାଙ୍ଗି ତଳେ ପଡିଛି। ବିଶେଷକରି ରୁପାଲି ଛକ ପାଖରେ ବ୍ୟାରିକେଡ୍ ନାହିଁ କହିଲେ ଚଳେ। ଏଠାରେ ଖଣ୍ଡେ କି ଦୁଇଖଣ୍ଡ ବାଉଁଶ ନୁହେଁ ବରଂ ପୂରା ବ୍ୟାରିକେଡ୍ ହିଁ ଉଭାନ୍ ହୋଇଯାଇଛି। ଫଳରେ ଲୋକେ ମନଇଚ୍ଛା ଏହିବାଟ ଦେଇ ରାସ୍ତା ପାର ହେଉଛନ୍ତି। ସେହିପରି ବାଉଁଶ ବାଡ଼ ହୋଇଥିବାରୁ କେତେକ ବ୍ୟକ୍ତି ଏହାକୁ ଭାଙ୍ଗିଦେଇ ରାସ୍ତା ପାର ହେଉଥିବା ଦେଖିବାକୁ ମିଳୁଛି। ମାଷ୍ଟରକ୍ୟାଣ୍ଟିନ ଛକରୁ ବାଣୀବିହାର ପର୍ଯ୍ୟନ୍ତ ରାସ୍ତା ମୁଖ୍ୟତଃ ବ୍ୟସ୍ତବହୁଳ ଅଞ୍ଚଳ ହୋଇଥିବାରୁ ଏଭଳି ଭାବେ ରାସ୍ତା ପାର ହେବା ପଥଚାରୀଙ୍କ ପାଇଁ ବିପଜ୍ଜନକ ହେବାର ଯଥେଷ୍ଟ ଆଶଙ୍କା ରହିଛି।
ମେଡିଆନ୍ରେ ଲୁହା ଗ୍ରୀଲ ଲଗାଇବା ଦ୍ୱାରା ଏହା ଚୋରି ହୋଇଯାଉଥିଲା। ଅନେକ ସମୟରେ ଦୁର୍ଘଟଣା ଘଟୁଥିବାବେଳେ ଲୋକେ ଏହି ଲୁହାଗ୍ରୀଲ୍ରେ ମାଡ଼ ହୋଇ ଅଧିକ ଆହତ ହେଉଥିଲେ। ସେହିପରି ଲୁହାଗ୍ରୀଲ ମହଙ୍ଗା ଏବଂ କଳଙ୍କି ରୋକିବା ପାଇଁ ଅତ୍ୟଧିକ ରକ୍ଷଣାବେକ୍ଷଣ ଆବଶ୍ୟକ କରିଥାଏ। ତେଣୁ ଏଥିରୁ ବର୍ତ୍ତିବା ପାଇଁ ୨୦୨୧ରେ ବିଏସ୍ସିଏଲ୍ ପକ୍ଷରୁ ବାଉଁଶ ବ୍ୟାରିକେଡ ଲଗାଯାଇଥିଲା। କୋଲକାତାର ଅନେକ ସ୍ଥାନରେ ଏଭଳି ବାଉଁଶ ବ୍ୟବହାର କରାଯାଇଛି। ତେଣୁ ସେଠାକାର ମଡେଲକୁ ଦୃଷ୍ଟିରେ ରଖି ଏହି ଯୋଜନା ହାତକୁ ନିଆଯାଇଥିଲା। ଏହାଦ୍ୱାରା କମ୍ ବଜେଟ୍ରେ ବ୍ୟାରିକେଡ୍ ଲଗାଯିବା ସହ ଏହା ଇକୋ-ଫ୍ରେଣ୍ଡ୍ଲି ମଧ୍ୟ ହୋଇପାରିବ ବୋଲି ବିଏସ୍ସିଏଲ୍ ପକ୍ଷରୁ କୁହାଯାଇଥିଲା। ତେବେ ବାଉଁଶରେ କଳଙ୍କି ନ ଲାଗିଲେ ବି ଏହାର ମଧ୍ୟ ରକ୍ଷଣାବେକ୍ଷଣ ଆବଶ୍ୟକ ବୋଲି କର୍ତ୍ତୃପକ୍ଷ ଭୁଲିଗଲେ। ଫଳରେ ଏଗୁଡ଼ିିକ ନଷ୍ଟ ହେବାକୁ ବସିଲାଣି। ଅପରପକ୍ଷେ ଅଳ୍ପ କିଛିଦିନ ମଧ୍ୟରେ ୬୮ ଲକ୍ଷ ଟଙ୍କାରୁ ଅଧିକ ବଜେଟ୍ରେ ପ୍ରସ୍ତୁତ ହୋଇଥିବା ଏହି ବ୍ୟାରିକେଡ୍ ନଷ୍ଟ ହେବାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ତେବେ ଏନେଇ ବିଏସ୍ସିଏଲ୍ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରିନାହିଁ।
