ଭୁବନେଶ୍ୱର,୧୯।୧୦(ବ୍ୟୁରୋ)/: ସୋନପୁର (ନି.ପ୍ର)ରାଜ୍ୟରେ ଏବେ ବନ୍ୟଜନ୍ତୁ ଶିକାର ଅବାଧରେ ଚାଲିଛି। କରୋନା ମହାମାରୀଠାରୁ ଶିକାରି ଓ ଚାଲାଣକାରୀ ବେଶ୍ ସକ୍ରିୟ ହୋଇପଡିଛନ୍ତି। ବନ ବିଭାଗ ଓ ପୋଲିସର ଅପାରଗତା ପାଇଁ ମାଫିଆମାନେ ସେମାନଙ୍କ ର଼୍ୟାକେଟକୁ ଆହୁରି ବ୍ୟାପକ କରିଛନ୍ତି। ବନ୍ୟଜନ୍ତୁ ଶିକାର ଓ ଚୋରା ଚାଲାଣକୁ ରୋକିବାକୁ ଏବେ ଏସ୍ଟିଏଫ୍ ଅଣ୍ଟାଭିଡ଼ିଛି। ସୁବର୍ଣ୍ଣପୁରରେ ଏକ ବଡ଼ ବନ୍ୟଜନ୍ତୁ ର଼୍ୟାକେଟକୁ ଧରିଛି। ଗତ ୧୨ ତାରିଖରେ ସୁବର୍ଣ୍ଣପୁରସ୍ଥିତ ସରକାରୀ ଆଇଟିଆଇ କଲେଜ ଅଞ୍ଚଳରେ ଚଢାଉ କରି ଜଣେ ବାଘ ଛାଲ ବେପାରୀଙ୍କୁ ଧରିଥିବାବେଳେ ଶନିବାର ରାତିରେ ରାଜକୋଠି ମହାନଦୀ ବ୍ରିଜ ନିକଟରୁ ଆଉ ଦୁଇଜଣ ବେପାରୀଙ୍କୁ ଗିରଫ କରିଛି। ସେମାନଙ୍କ ନିକଟରୁ ଗୋଟିଏ ଜୀବନ୍ତ ବଜ୍ରକାପ୍ତା ଓ ୫ କେଜି ୬୫ ଗ୍ରାମ୍ କାତି ଜବତ କରାଯାଇଛି। ଗିରଫ ଦୁଇ ବେପାରୀ ହେଲେ ସୁବର୍ଣ୍ଣପୁର ଜିଲା ଉଲୁଣ୍ଡା କପାସିରା ଅଞ୍ଚଳର ସୋମନାଥ ବାଗ ଓ ଗିନ୍ଧିଲମାଲ ଅଞ୍ଚଳର ମାର୍ଶାଲନ ଭେଙ୍ଗ୍ରା। ଏନେଇ ଏସ୍ଟିଏଫ କେସ୍ ନଂ.୨୬/୨୦ ଦଫା ୩୭୯, ୪୧୧ ଏବଂ ବନ୍ୟପ୍ରାଣୀ(ସଂରକ୍ଷଣ) ଆଇନ ୧୯୭୨ ଅନୁସାରେ ୫୧ ଦଫା ଲଗାଇ ସୋନପୁର ଏସ୍ଡିଜେଏମ୍ କୋର୍ଟକୁ ଚାଲାଣ କରିଛି। ଏଥିସହ ଜବତ ବଜ୍ରକାପ୍ତାକୁ ବନ ବିଭାଗକୁ ହସ୍ତାନ୍ତର କରାଯିବା ପରେ ପ୍ରାଣୀ ଚିକିତ୍ସକଙ୍କ ଦ୍ୱାରା ସ୍ବାସ୍ଥ୍ୟ ପରୀକ୍ଷା କରାଯାଇ ଉଲୁଣ୍ଡା ଜଙ୍ଗଲରେ ଛାଡି ଦିଆଯାଇଛି। ଅନ୍ୟପକ୍ଷରେ ଜବତ ୫ଲକ୍ଷରୁ ଊର୍ଦ୍ଧ୍ୱ ଟଙ୍କାର କାତିକୁ ପରୀକ୍ଷଣ ପାଇଁ ଡେରାଡୁନ୍ସ୍ଥିତ ଓ୍ବାଇଲ୍ଡଲାଇଫ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆକୁ ପଠାଯିବ ବୋଲି ଏସ୍ଟିଏଫ୍ ଡିଏସ୍ପି ବିଳାସିନୀ ନାୟକ କହିଛନ୍ତି।
ସୂଚନା ଅନୁଯାୟୀ, ବାଘ ଛାଲ ବେପାରୀଙ୍କୁ ପଚରାଉଚରାବେଳେ ସୁବର୍ଣ୍ଣପୁରରେ ବନ୍ୟଜନ୍ତୁ ଚୋରା ଚାଲାଣ ର଼୍ୟାକେଟ ସମ୍ପର୍କରେ ସୁଚନା ପାଇଥିଲା। ଏହାପରେ ର଼୍ୟାକେଟରେ ସମ୍ପୃକ୍ତ ଅନ୍ୟମାନଙ୍କୁ ଧରିବା ପାଇଁ ଯୋଜନା କରିଥିଲା। ଏସ୍ଟିଏଫ୍ର ୩ଜଣିଆ ଟିମ୍ ଦୁଇଦିନ ହେବ ସୁବର୍ଣ୍ଣପୁରରେ ଡେରା ପକାଇଥିଲା। ଅଧିକାରୀମାନେ ନିଜେ ଗ୍ରାହକ ସାଜି ସୋମନାଥ ଓ ଗିନ୍ଧିଲାମାଳଙ୍କ ସହ ଯୋଗାଯୋଗ କରି ବଜ୍ରକାପ୍ତା କିଣିବାକୁ ଚାହିଁଥିଲେ। କଥା ଅନୁସାରେ, ଶନିବାର ଅପରାହ୍ନ ୩ରୁ ୪ଟା ମଧ୍ୟରେ ସେମାନେ ବଜ୍ରକାପ୍ତା ଓ କାତି ବିକ୍ରି ପାଇଁ ରାଜକୋଠି ମହାନଦୀ ବ୍ରିଜ ନିକଟରେ ଅପେକ୍ଷା କରିଥିଲେ। ଏହି ସମୟରେ ପୂର୍ବରୁ ସେଠାରେ ଗ୍ରାହକ ବେଶରେ ଛକି ରହିଥିବା ଏସ୍ଟିଏଫ୍ ଅଧିକାରୀମାନେ ଚାରିଆଡୁ ଘେରିଯାଇଥିଲେ। ସେମାନେ ଖସି ଯିବାକୁ ଉଦ୍ୟମ କରିବାବେଳେ ସବ୍ଇନ୍ସପେକ୍ଟର ନଳିନୀ କାନ୍ତ ଦାସ ଓ କନଷ୍ଟେବଲ ଆଲୋକ ବାରିକଙ୍କ ସହ ୧୦ ମିନିଟ୍ ଧରି ଧସ୍ତାଧସ୍ତି ହୋଇଥିଲା। ଶେଷରେ ସେମାନଙ୍କୁ କାବୁ କରାଯାଇ ଧରିଥିବା ୨ଟି ପ୍ଲାଷ୍ଟିକ୍ ବ୍ୟାଗ୍ ଯାଞ୍ଚ କରାଯିବାରୁ ଗୋଟିଏରେ ଜୀବନ୍ତ ବଜ୍ରକାପ୍ତା ଓ ଅନ୍ୟଟିରେ କାତି ଥିବା ଜଣାପଡିଥିଲା। ତେବେ ସେମାନେ ସେମାନେ କେଉଁ ଜଙ୍ଗଲରୁ ବଜ୍ରକାପ୍ତାକୁ ଧରିଲେ ଓ ଜବତ ବଜ୍ରକାପ୍ତାର କାତିକୁ କେଉଁଠୁ ଆଣିଲେ? ସୂବର୍ଣ୍ଣପୁର ଜଙ୍ଗଲରୁ ଏସବୁ ବଜ୍ରକାପ୍ତା ଧରାଯାଇଥିବା ବା ଶିକାର କରାଯାଇଥିବା ଅନୁମାନ କରୁଛି ଏସ୍ଟିଏଫ୍। ଏହା ପଛରେ ଆଉ କେଉଁମାନଙ୍କର ହାତ ରହିଛି ତାହା ଜାଣିବା ପାଇଁ ଏସ୍ଟିଏଫ୍ ଦୁଇ ଅଭିଯୁକ୍ତଙ୍କୁ ରିମାଣ୍ଡରେ ଆଣିବ ବୋଲି ଜଣାପଡ଼ିଛି। ଓଡ଼ିଶା ବଜ୍ରକାପ୍ତାର ଚାହିଦା ବିଦେଶରେ ଅଧିକ ରହୁଥିବାରୁ ଏଥିରେ ଅନ୍ତର୍ଜାତୀୟ ବନ୍ୟଜନ୍ତୁ ଚୋରା ଚାଲାଣ ର଼୍ୟାକେଟ ସମ୍ପୃକ୍ତ ଥିବା ସନ୍ଦେହ କରି ଏସ୍ଟିଏଫ୍ ଅଧିକ ଖୋଳତାଡ଼ ଚଳାଇଛି।
