ବାରାଣସୀ,୨୦।୫:ଅଯୋଧ୍ୟା ରାମ ଜନ୍ମଭୂମି-ବାବ୍ରି ମସ୍ଜିଦ ବିବାଦ ମାମଲାରେ ରାୟ ମନ୍ଦିର ସପକ୍ଷରେ ଯିବା ପରେ ଏବେ ଅନ୍ୟାନ୍ୟ ମନ୍ଦିର-ମସ୍ଜିଦ ବିବାଦ ଜୋର୍ଦାର ହୋଇଛି। ବାରାଣସୀର ପ୍ରସିଦ୍ଧ କାଶୀ ବିଶ୍ୱନାଥ ମନ୍ଦିର ନିକଟରେ ରହିଥିବା ଜ୍ଞାନବାପି ମସ୍ଜିଦ ଏବଂ ମଥୁରାର କୃଷ୍ଣ ଜନ୍ମଭୂମି ନିକଟରେ ଥିବା ଇଦ୍ଗା ମସ୍ଜିଦକୁ ନେଇ ବିବାଦ କୋର୍ଟରେ ପହଞ୍ଚତ୍ଛି।
ବାରାଣସୀର ଜ୍ଞାନବାପି ମସ୍ଜିଦ ପରିସରରେ ଶିବଲିଙ୍ଗ ରହିଥିବା ସର୍ଭେରୁ ଜଣାପଡ଼ିବା ପରେ ଏହାକୁ ସୁରକ୍ଷିତ ରଖିବା ଲାଗି ସ୍ଥାନୀୟ ଅଦାଲତ ଏବଂ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ଉକ୍ତ ମସ୍ଜିଦରେ ଶେଷନାଗଙ୍କ ଫଣା, ତ୍ରିଶୂଳ, ଡମ୍ବରୁ ଏବଂ ପଦ୍ମ ରହିଥିବା ସ୍ବତନ୍ତ୍ର କୋର୍ଟ କମିଶନର ବିଶାଳ ସିଂ ଏବଂ ପୂର୍ବତନ କୋର୍ଟ କମିଶନର ଅଜୟ ମିଶ୍ରା କହିଛନ୍ତି। ଗୁରୁବାର ହିନ୍ଦୁ ଆବେଦନକାରୀଙ୍କ ପକ୍ଷରୁ ଆଇନଜୀବୀ ଅଜୟ ବାରାଣସୀ କୋର୍ଟରେ ହାଜର ହୋଇ ଉପରୋକ୍ତ ମତ ରଖିଛନ୍ତି। ମନ୍ଦିର ଭଗ୍ନାବଶେଷ ଭଳି ଜଣାପଡ଼ୁଥିବା ପଥର ଖଣ୍ଡଗୁଡ଼ିକରୁ ଶେଷନାଗଙ୍କ ଫଣା ରହିଥିବା ଜଣାପଡ଼ିଛି। ଏହି ଭଗ୍ନାବଶେଷ ୫୦୦ରୁ ୬୦୦ ବର୍ଷର ପୁରୁଣା ବୋଲି କୋର୍ଟରେ ସର୍ଭେ ରିପୋର୍ଟ ଦାଖଲ କରିବା ପରେ ଅଜୟ ଗଣମାଧ୍ୟମକୁ କହିଛନ୍ତି। ଜ୍ଞାନବାପି-ଶ୍ରୀଙ୍ଗାର ଗୌରୀ ମାମଲାର ପରବର୍ତ୍ତୀ ଶୁଣାଣି ମେ’ ୨୩କୁ ଧାର୍ଯ୍ୟ କରାଯାଇଛି। ଗୁରୁବାର ଉଭୟ ପକ୍ଷ ସ୍ଥାନୀୟ ଅଦାଲତରେ ସେମାନଙ୍କ ଯୁକ୍ତି ଉପସ୍ଥାପନ କରିଥିଲେ। ତେବେ ସୁପ୍ରିମକୋର୍ଟଙ୍କ ରାୟ ଦୃଷ୍ଟିରୁ ତଳ କୋର୍ଟ ଏହି ମାମଲାରେ ଶୁକ୍ରବାର ପର୍ଯ୍ୟନ୍ତ ଆଗେଇ ପାରିବେ ନାହିଁ। ତେଣୁ ମାମଲାର ପରବର୍ତ୍ତୀ ଶୁଣାଣି ୨୩କୁ ଧାର୍ଯ୍ୟ କରାଗଲା ବୋଲି ହିନ୍ଦୁ ପକ୍ଷ ଓକିଲ କହିଛନ୍ତି। ଅନ୍ୟପକ୍ଷରେ ମୁସଲମାନ ପକ୍ଷ ଓକିଲ ଅଭୟ ଯାଦବ କହିଛନ୍ତି, ପ୍ରତିପକ୍ଷ ମସ୍ଜିଦ ପରିସରରେ ଥିବା ଏକ କାନ୍ଥ ଭାଙ୍ଗିବା ପାଇଁ କୋର୍ଟ କମିଟି ଗଠନ କରିବାକୁ ଆବେଦନ କରିଥିଲେ। ତାହାକୁ ସେ ବିରୋଧ କରିଥିବା କହିଛନ୍ତି।
ଜ୍ଞାନବାପି ମସ୍ଜିଦକୁ ନେଇ ବିବାଦ ଦେଖାଦେବା ପରେ ଅଦାଲତଙ୍କ ନିର୍ଦ୍ଦେଶକ୍ରମେ ଏହାର ୩ ଦିନିଆ ଭିଡିଓ ସର୍ଭେ କରାଯାଇଥିଲା, ଯେଉଁଥିରେ ଅଜୟ ମିଶ୍ରା ସାମିଲ ଥିଲେ। ମସ୍ଜିଦ ପରିସରରେ ଗମ୍ବୁଜାକୃତି ଢାଞ୍ଚା ରହିଥିଲେ ମଧ୍ୟ ସେ ରିପୋର୍ଟରେ ଏହା ଉଲ୍ଲେଖ କରିନାହାନ୍ତି। ଉକ୍ତ ଢାଞ୍ଚା ହିନ୍ଦୁମାନଙ୍କ ଦ୍ୱାରା ସ୍ଥାପନ ହୋଇଥିବା ଶିବ ଲିଙ୍ଗ ବୋଲି ଦାବି ହେଉଥିବାବେଳେ ମସ୍ଜିଦ କମିଟି ଏହାକୁ ଖଣ୍ଡନ କରିଛି।
