ରସୁଲପୁର,୧୦ା୩(ଡି.ଏନ.ଏ.):ରସୁଲପୁର ବ୍ଲକ ଅନ୍ତର୍ଗତ ଶ୍ରୀବନ୍ତପୁର ପଞ୍ଚାୟତ ଦିଆନଚକ ଗ୍ରାମର ଲୋକନାଥ ସ୍ବାଇଁଙ୍କ ପରିବାର ପଲିଥିନ ତଳେ ବାସ କରୁଛନ୍ତି। ଲୋକନାଥ ଆବାସ ପାଇଁ ୨ବର୍ଷ ହେଲା ବ୍ଲକ୍ କାର୍ଯ୍ୟାଳୟରେ ଟଙ୍କା ଫେରସ୍ତ କରି ଆସିଛନ୍ତି। ହେଲେ ପକ୍କା ଘର ନିର୍ମାଣ ପାଇଁ କାର୍ଯ୍ୟାଦେଶ ମିଳି ପାରୁନାହିଁ। ବାରମ୍ବାର ବ୍ଲକ କାର୍ଯ୍ୟାଳୟକୁ ଦୌଡ଼ାଦୌଡ଼ି କରି ସେ ନିରାଶ ହେଉଛନ୍ତି। ଘର ଖଣ୍ଡିଏ ନିର୍ମାଣ କରିବାକୁ ସାମର୍ଥ୍ୟ ନ ଥିବାରୁ ଲୋକନାଥ ପରିବାର ସରକାରଙ୍କ ହାତଟେକାକୁ ଚାହିଁ ବସିଛନ୍ତି। ତେଣେ ସରକାରୀ ଆବାସକୁ ନେଇ ଲାଗି ରହିଥିବା ଦ୍ୱନ୍ଦ୍ୱ ଦୂର ହୋଇପାରୁ ନ ଥିବାରୁ ବ୍ଲକ ଅଞ୍ଚଳରେ ୪୦ରୁ ଅଧିକ ହିତାଧିକାରୀ ଆବାସ ପାଇଁ ଚାହିଁ ବସିଛନ୍ତି।
୨୦୦୪/୦୫ ଆର୍ଥିକ ବର୍ଷରେ ଲୋକନାଥଙ୍କୁ ଇନ୍ଦିରା ଆବାସ ପାଇଁ କାର୍ଯ୍ୟାଦେଶ ମିଳିଥିଲା, ଯାହାର ମୂଲ୍ୟ ୩୫ହଜାର ଟଙ୍କା ଥିଲା। ସେତେବେଳ ପ୍ରଥମ କିସ୍ତିରେ ହିତାଧିକାରୀଙ୍କୁ ୫ହଜାର ଟଙ୍କା ମିଳିଥିଲା। ଉକ୍ତ ଟଙ୍କାକୁ ବ୍ୟୟକରି ସେ ଘର ନିର୍ମାଣ କାର୍ଯ୍ୟ ଆରମ୍ଭ କରିଥିଲେ। ପରେ ତାଙ୍କୁ ଆଉ ୧୦ହଜାର ଟଙ୍କା ମିଳିଥିଲା। ତେବେ ପରିବାରରେ ମେଡିକାଲ ସମସ୍ୟା ଯୋଗୁ ସେ ପାଇଥିବା ୧୦ହଜାର ଟଙ୍କାକୁ ଘର କାମରେ ଖର୍ଚ୍ଚ ନ କରି ଔଷଧ କିଣିବା ବାବାଦକୁ ଖର୍ଚ୍ଚ କରିଦେଲେ। ଘର କାମ ଭୁଇଁରୁ ଉଠି ପାରିଲା ନାହିଁ। ଏହାରି ଭିତରେ ୧୮ବର୍ଷ ବିତି ସାରିଲାଣି। ସରକାରଙ୍କ ଘୋଷଣା ମୁତାବକ, ଘର ପାଇଁ ଟଙ୍କା ଫେରସ୍ତ କରିସାରିଛନ୍ତି। ଟଙ୍କା ଫେରାଇଲେ ସେମାନଙ୍କୁ ନୂଆ ଦରରେ ଆବାସ ପାଇଁ କାର୍ଯ୍ୟାଦେଶ ମିଳିବ। ଏହାଜାଣି ସେ ୨ବର୍ଷ ତଳେ ଧାରକରଜ କରି ବ୍ଲକକୁ ଟଙ୍କା ଫେରସ୍ତ କରି ଆସିଛନ୍ତି। ହେଲେ ଏଯାଏ ତାଙ୍କୁ ଆବାସ ମିଳି ପାରିନାହିଁ। ଲୋକନାଥଙ୍କ ପରିବାରର ୪ଜଣ ଭଙ୍ଗା କୁଡ଼ିଆରେ ଜୀବନ ବିତାଉଛନ୍ତି। ପରିବାରର ଆର୍ଥତ୍କ ସ୍ଥିତି ଅତ୍ୟନ୍ତ ଦୁର୍ବଳ ଥିବାରୁ ଲୋକନାଥ ଓ ତାଙ୍କ ପୁଅ ଉଭୟ ସୁଦୂର ବାଙ୍ଗାଲୋରସ୍ଥିତ ଏକ ସପିଂ ମହଲରେ କାମ କରୁଛନ୍ତି। ସେଥିରୁ ଯାହାକିଛି ରୋଜଗାର ହେଉଛି କେବଳ ଘର ଚଳିବା ସମ୍ଭବପର ହୋଇପାରୁଛି। ଘର ଖଣ୍ଡିଏ କରିବାକୁ ସକ୍ଷମ ଓ ସମ୍ବଳ ନ ଥିବା ଲୋକନାଥଙ୍କ ସ୍ତ୍ରୀ ପ୍ରକାଶ କରିଛନ୍ତି। ଏ ସମ୍ପର୍କରେ ବ୍ଲକ୍ ପ୍ରଶାସନର ପ୍ରତିକ୍ରିୟା ମିଳି ପାରିନାହିଁ।
