ନୂଆଦିଲ୍ଲୀ,୬ା୧୧: ପ୍ରଖ୍ୟାତ ଭବିଷ୍ୟବକ୍ତା ବୁଲ୍ଗେରିଆର ସନ୍ଥ ବାବା ଭାଙ୍ଗା ୨୦୨୪ ବର୍ଷ ପାଇଁ ଭବିଷ୍ୟବାଣୀ କରିଯାଇଛନ୍ତି। ଆସନ୍ତାବର୍ଷ ଆତଙ୍କବାଦୀ ଆକ୍ରମଣ ବଢ଼ିବା ସହ ପାଗ ଭୟଙ୍କର ହେବ ବୋଲି ସେ କହିଛନ୍ତି। ୧୯୯୬ରେ ପ୍ରାଣ ହରାଇଥିବା ଏହି ରହସ୍ୟମୟ ବାବା ତାଙ୍କ ମୃତ୍ୟୁର ପରବର୍ତ୍ତୀ ବହୁବର୍ଷ ପର୍ଯ୍ୟନ୍ତ କ’ଣ ଘଟିବ ତା’ର ପୂର୍ବାନୁମାନ କରିଯାଇଛନ୍ତି। ତାଙ୍କର ଅନେକ ଭବିଷ୍ୟବାଣୀ ସତ୍ୟ ପ୍ରମାଣିତ ହୋଇଛି। ଭବିଷ୍ୟତରେ କ’ଣ ସବୁ ଘଟିବ, ତାହା ସେ ବହୁ ପୂର୍ବରୁ କହିଥିଲେ। ବାଲକାନ୍ସର ନୋଷ୍ଟ୍ରାଡମସ୍ ଭାବେ ପରିଚିତ ବାବା ଭାଙ୍ଗା ୯/୧୧ ଆତଙ୍କବାଦୀ ଆକ୍ରମଣ, ପ୍ରିନ୍ସ ଡାଏନାଙ୍କ ମୃତ୍ୟୁ, ଚେନୋବିଲ୍ ବିପର୍ଯ୍ୟୟ ଏବଂ ବ୍ରେକ୍ଜିଟ୍ ସମ୍ପର୍କରେ ପୂର୍ବରୁ ସୂଚନା ଦେଇଥିଲେ ବୋଲି କୁହାଯାଏ।
ବାବା ଭାଙ୍ଗା ୨୦୨୪ ବର୍ଷ ପାଇଁ ୭ଟି ଭବିଷ୍ୟବାଣୀ କରିଛନ୍ତି। ଆସନ୍ତାବର୍ଷ ରୁଷିଆ ରାଷ୍ଟ୍ରପତି ଭ୍ଲାଡିମିର୍ ପୁଟିନ୍ଙ୍କୁ ତାଙ୍କ ନିଜ ଦେଶର ଜଣେ ବ୍ୟକ୍ତି ହତ୍ୟା କରିବ ବୋଲି ଏଥିରେ ଉଲ୍ଲେଖ ରହିଛି। ୟୁରୋପରେ ଆତଙ୍କବାଦୀ ଆକ୍ରମଣ ବୃଦ୍ଧି ପାଇବ ଏବଂ ଏକ ବଡ଼ ଦେଶ ଜୈବିକ ଅସ୍ତ୍ର ପରୀକ୍ଷା କରିବ କିମ୍ବା ଏଥିରେ ଆକ୍ରମଣ କରିବ। ତୃତୀୟରେ ଆସନ୍ତାବର୍ଷ ଗୁରୁତର ଆର୍ଥତ୍କ ସଙ୍କଟ ଦେଖାଦେବ ଏବଂ ଏହା ବିଶ୍ୱ ଅର୍ଥନୀତିକୁ ପ୍ରଭାବିତ କରିବ। ଋଣ ସ୍ତର ବୃଦ୍ଧି ଏବଂ ଭୂରାଜନୈତିକ ଉତ୍ତେଜନା ଯୋଗୁ ଏଭଳି ସ୍ଥିତି ଉପୁଜିବ ବୋଲି ବାବା ଭବିଷ୍ୟବାଣୀ କରିଯାଇଛନ୍ତି। ଆସନ୍ତାବର୍ଷ ଭୟଙ୍କର ପାଗ ସାଙ୍ଗକୁ ପ୍ରାକୃତିକ ବିପର୍ଯ୍ୟୟ ହେବ। ସାଇବର ଆକ୍ରମଣ ବୃଦ୍ଧି ପାଇବ। ହ୍ୟାକରମାନେ ବିଦ୍ୟୁତ୍ ଗ୍ରୀଡ୍, ଜଳ ପରିଚାଳନା ପ୍ଲାଣ୍ଟ ଭଳି ଗୁରୁତ୍ୱପୂର୍ଣ୍ଣ ଭିତ୍ତିଭୂମିକୁ ଟାର୍ଗେଟ କରିବେ ଓ ଜାତୀୟ ସୁରକ୍ଷା ପ୍ରତି ବିପଦ ସୃଷ୍ଟି କରିବେ। ୨୦୨୪ରେ ଆଲଜିମର ଏବଂ କ୍ୟାନ୍ସର ଚିକିତ୍ସାର ନୂଆ ପଦ୍ଧତି ବାହାରିବ। କ୍ୱାଣ୍ଟମ୍ କମ୍ପ୍ୟୁଟିଂରେ ବଡ଼ ପରିବର୍ତ୍ତନ ଆସିବ ବୋଲି ଭବିଷ୍ୟବାଣୀରେ କୁହାଯାଇଛି। ସୂଚନାଯୋଗ୍ୟ, ୧୯୧୧ରେ ବାବା ଭାଙ୍ଗାଙ୍କ ଜନ୍ମ। ୧୨ ବର୍ଷ ବୟସରେ ଏକ ଝଡ଼ ଯୋଗୁ ରହସ୍ୟଜନକ ଭାବେ ତାଙ୍କ ଦୃଷ୍ଟିଶକ୍ତି ଚାଲିଯାଇଥିଲା। କିଛିଦିନ ପରେ ପରିବାର ଲୋକେ ତାଙ୍କୁ ଖୋଜି ପାଇଥିଲେ।
