ବ୍ରହ୍ମପୁର ଅଫିସ,୩୦।୧୧: ଶିଶୁପୁତ୍ରକୁ ନ୍ୟାୟ ଓ ନିଜର ଅଧିକାର ଦାବିରେ ବ୍ରହ୍ମପୁର ଦେଶୀବେହେରାସାହିସ୍ଥିତ ପ୍ରେମିକ କେ.ଦିନେଶଙ୍କ ଘର ସମ୍ମୁଖରେ ଯୁବତୀ ଜଣଙ୍କ ଜୁଲାଇ ୨ରୁ ଧାରଣା ଜାରି ରଖିଛନ୍ତି। ପୁଅକୁ ବାପାଙ୍କ ପରିଚୟ ଦେଇ ଦିନେଶ ତାଙ୍କୁ ବିବାହ କରିବାକୁ ସେ ଦାବିକରି ଏଭଳି ଧାରଣା ଦେଇଆସୁଛନ୍ତି। ଧାରଣାସ୍ଥଳରେ ଲଗାଯାଇଥିବା ଟେଣ୍ଟ ପୋଡ଼ିଦେବାକୁ କେନ୍ଦ୍ରକରି ମଙ୍ଗଳବାର ପୂର୍ବାହ୍ନରେ ଦେଶୀବେହେରା ସାହିରେ ଉତ୍ତେଜନା ଦେଖାଦେଇଛି। ଯୁବତୀ ଜଣଙ୍କ ଅଭିଯୋଗ କରିଛନ୍ତି, ତାଙ୍କ ଶ୍ୱଶୁର ଘର ଲୋକ ଉକ୍ତ ଟେଣ୍ଟଟିକୁ ପୋଡ଼ି ଦେଇଛନ୍ତି। ଉଭୟ ଯୁବତୀ ଓ ଦିନେଶଙ୍କ ପରିବାର ମଧ୍ୟରେ ଘଟଣା ସ୍ଥଳରେ କଥା କଟାକଟି ହେବା ସହ ଉଭୟେ ଉଭୟଙ୍କୁ ଗାଳିଗୁଳଜ କରିଛନ୍ତି। ହେଲେ ଖବର ଲେଖାହେବା ଯାଏ ଟେଣ୍ଟପୋଡ଼ାକୁ ନେଇ ଥାନାରେ କୌଣସି ଅଭିଯୋଗ ହୋଇ ନ ଥିବା ଥାନାଧିକାରୀ ପ୍ରଶାନ୍ତ ଭୂପତି ସୂଚନା ଦେଇଛନ୍ତି।
ଯୁବତୀଙ୍କ ଅଭିଯୋଗକ୍ରମେ, ପ୍ରାୟ ୨ ବର୍ଷ ତଳେ ଦିନେଶଙ୍କ ସହ ତାଙ୍କର ପ୍ରେମସମ୍ପର୍କ ଗଢ଼ି ଉଠିଥିଲା। ବିବାହ ପ୍ରଲୋଭନ ଦେଖାଇ ଦିନେଶ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଦୀପିକା ଗର୍ଭବତୀ ହେବା ଜାଣିବା ପରେ ବିବାହ କରିବାକୁ କହିବାରୁ ଦିନେଶ ରାଜି ହୋଇ ନ ଥିଲେ। ଏନେଇ ସେ ଟାଉନ୍ ଥାନାରେ ଅଭିଯୋଗ କରିଥିଲେ। ଦିନେଶଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଥିଲା। ମାମଲା କୋର୍ଟରେ ବିଚାରାଧୀନ ଥିବା ବେଳେ ଦିନେଶ ସର୍ତ୍ତମୂଳକ ଜାମିନରେ ମୁକୁଳିଛନ୍ତି। ଏହାମଧ୍ୟରେ ଦୀପିକାଙ୍କ ଏକ ପୁତ୍ର ସନ୍ତାନ ଜନ୍ମ ହୋଇଛି। ସେ ଶିଶୁପୁତ୍ରକୁ ନ୍ୟାୟ ଦାବି କରିଥିଲେ। କିନ୍ତୁ ଦିନେଶଙ୍କ ପରିବାର ଲୋକେ ତାଙ୍କୁ ଘରୁ ବାହାର କରି ଦେଇଥିଲେ। ତେଣୁ ସେ ନ୍ୟାୟ ଦାବିରେ ତାଙ୍କ ଘର ସମ୍ମୁଖରେ ଧାରଣାରେ ବସିଛନ୍ତି।
