ଟିମ ଇଣ୍ଡିଆର ୨୦୧୧ ବିଶ୍ୱକପ ବିଜୟ ପ୍ରଶଂସକଙ୍କ ମନରେ ଏବେ ବି ସତେଜ। ୨୮ବର୍ଷ ପରେ ଭାରତ ୨୦୧୧ରେ ଶ୍ରାଲଙ୍କାକୁ ହରାଇ ବିଶ୍ୱ ଚାମ୍ପିୟନ ହୋଇଥିଲା। ଏହି ମୁହୂର୍ତ୍ତ ଅନେକ ଖେଳାଳିଙ୍କ ପାଇଁ ଆହୁରି ସ୍ବତନ୍ତ୍ର ଥିଲା। କାରଣ ସେମାନଙ୍କ ପାଇଁ ଏହା ଶେଷ ବିଶ୍ୱକପ ଥିଲା । ସେମାନଙ୍କ ମଧ୍ୟରୁ ଜଣେ ଥିଲେ ସଚିନ ତେନ୍ଦୁଲକର। ଦୁଇ ଦଶନ୍ଧି ଧରି ତେନ୍ଦୁଲକର ଭାରତୀୟ କ୍ରିକେଟରେ ନିଜ ଯୋଗଦାନ ଦେଇଥିଲେ। ଏହି ସମୟରେ ସେ ଅନେକ ରେକର୍ଡ କରିଥିଲେ। କିନ୍ତୁ ଅନ୍ତର୍ଜାତୀୟ କ୍ରିକେଟରେ ଡେବ୍ୟୁ କରିବାର ୨୨ ବର୍ଷ ପରେ ବିଶ୍ୱକପ ଜିତିବାର ତାଙ୍କ ସ୍ବପ୍ନ ସାକାର ହୋଇଥିଲା। ତେଣୁ ଏହି ବିଜୟ ତାଙ୍କ ପାଇଁ ସ୍ବତନ୍ତ୍ର ଥିଲା । ସାଥୀ ଖେଳାଳିମାନେ ମଧ୍ୟ ସଚିନଙ୍କ ପାଇଁ ଏହାକୁ ସ୍ବତନ୍ତ୍ର କରିବା ପାଇଁ କୌଣସି ସୁଯୋଗ ହାତଛଡା କରି ନ ଥିଲେ।
ବିଶ୍ୱକପ ଫାଇନାଲରେ ଭାରତର ବିଜୟ ପରେ ବିରାଟ କୋହଲି, ସୁରେଶ ରାଇନା ଏବଂ ୟୁସୁଫ ପଠାନ ସଚିନଙ୍କୁ କାନ୍ଧରେ ନେଇଥିଲେ। ନିକଟରେ ଏକ ୟୁଟ୍ୟୁବ ଶୋ’ରେ ତେନ୍ଦୁଲକର ସେହି ଐତିହାସିକ ମୁହୂର୍ତ୍ତକୁ ମନେ ପକାଇଲେ ଏବଂ ତା’ପରେ ସେ କୋହଲି ଏବଂ ପଠାନଙ୍କୁ ଯାହା କହିଥିଲେ ତାହା ପ୍ରକାଶ କରିଥିଲେ। ସଚିନ କହିଛନ୍ତି ଯେ, ବିଶ୍ୱକପ ଜିତିବା ପରେ ବିରାଟ ଏବଂ ୟୁସୁଫ ମୋତେ କାନ୍ଧରେ ବସାଇଥିଲେ। ଆଜି ବି ମୋର ମନେ ଅଛି ସେତେବେଳେ ମୁଁ ଦୁହିଁଙ୍କୁ ଏକ ନିବେଦନ କରିଥିଲି। ସେମାନେ ମୋତେ କାନ୍ଧରେ ବସାଇବା ପୂର୍ବରୁ ମୁଁ ଉଭୟଙ୍କୁ କହିଥିଲି ମୋତେ ପକାଇଦେବ ନାହିଁ। ଆମେ କେବଳ ଏହି ବିଶ୍ୱକପ ଜିତିଲୁ ନାହିଁ, ବରଂ ଏହା ସମଗ୍ର ଦେଶ ପାଇଁ ଏକ ବିଜୟ ଥିଲା। ଏହି ଦିନ ସମସ୍ତଙ୍କ ସ୍ବପ୍ନ ସାକାର ହୋଇଥିଲା ବୋଲି ସଚିନ କହିଛନ୍ତି। ସଚିନ ଆହୁରି ମଧ୍ୟ କହିଛନ୍ତି ଯେ ଯେତେବେଳେ ମୁଁ ୧୯୮୩ ରେ କପିଲ ଦେବ ବିଶ୍ୱକପ ଉଠାଉଥିବାର ଦେଖିଥିଲି, ଏହା ମୋ ପାଇଁ ଏକ ସ୍ମରଣୀୟ ଅନୁଭୂତି ଥିଲା। ମୁଁ ସେହି ସଫଳତାକୁ ମୋର ସାଙ୍ଗମାନଙ୍କ ସହିତ ପାଳନ କରିଥିଲିି । ମୁଁ ମଧ୍ୟ ଦେଶ ପାଇଁ ବିଶ୍ୱକପ ଜିତିବାକୁ ଚାହୁଁଥିଲି। ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ଯାହା ଘଟିଥିଲା ତାହା ଅବିଶ୍ୱସନୀୟ ଥିଲା। ମୋ କ୍ୟାରିୟରରେ ଏହା ଏକ ଭଲ ଦିନ ଥିଲା।
ସଚିନ ଏହି ଟୁର୍ଣ୍ଣାମେଣ୍ଟରେ ସର୍ବାଧିକ ରନ ସଂଗ୍ରହ କରିଥିବା ଭାରତୀୟ ବ୍ୟାଟ୍ସମ୍ୟାନ ଥିଲେ। ସେ ୯ଟି ମ୍ୟାଚରେ ୫୩ରୁ ଅଧିକ ଆଭ୍ରେଜ୍ରେ ମୋଟ ୪୮୨ ରନ ସ୍କୋର କରିଥିଲେ। ସେ ଦୁଇ ଶତକ ଏବଂ ଦୁଇ ଅର୍ଦ୍ଧଶତକ ହାସଲ କରିଥିଲେ।
