ମହବୁବାବାଦ୍,୨୦ା୨: ତେଲଙ୍ଗାନାକୁ ଆଫଗାନିସ୍ତାନ ଓ ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ (କେସିଆର୍)ଙ୍କୁ ତାଲିବାନ ସହ ତୁଳନା କରି ବିବାଦୀୟ ହୋଇଛନ୍ତି ଯୁବଜନ ଶ୍ରମିକ ରାଇଥୁ ତେଲଙ୍ଗାନା ପାର୍ଟି (ଓ୍ବାଇଏସ୍ଆର୍ଟିପି) ମୁଖ୍ୟ ଓ୍ବାଇ.ଏସ୍. ଶର୍ମିଲା। ତେଲଙ୍ଗାନା ପୋଲିସ ତାଙ୍କୁ ଗିରଫ କରି ମାମଲା ରୁଜୁ କରିଛି। ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଓ୍ବାଇ.ଏସ୍ ଜଗନ୍ମୋହନ୍ ରେଡ୍ଡୀଙ୍କ ଭଉଣୀ ଶର୍ମିଲା ଓ୍ବାଇଏସ୍ଆର୍ଟିପି ନାମରେ ଦଳ ଗଢ଼ି ତେଲଙ୍ଗାନାର ଶାସକ ଭାରତ ରାଷ୍ଟ୍ର ସମିତି (ବିଆର୍ଏସ୍)ଠାରୁ କ୍ଷମତା ଛଡ଼ାଇବା ପାଇଁ ଉଦ୍ୟମ ଚଳାଇଛନ୍ତି।
ଶର୍ମିଲା ରବିବାର ମହବୁବାବାଦରେ ପଦଯାତ୍ରା ବେଳେ ତେଲଙ୍ଗାନା ହେଉଛି ଭାରତର ଆଫଗାନିସ୍ତାନ୍ ଏବଂ ମୁଖ୍ୟମନ୍ତ୍ରୀ କେସିଆର୍ ଏହାର ତାଲିବାନ୍ ବୋଲି କହିଥିଲେ। କେସିଆର୍ ଜଣେ ଏକଚ୍ଛତ୍ରବାଦୀ, ସ୍ବେଚ୍ଛାଚାରୀ ଶାସକ। ତେଲଙ୍ଗାନାରେ ଭାରତୀୟ ସମ୍ବିଧାନ କାମ କରୁନାହିଁ। ଏଠାରେ କେବଳ କେସିଆର୍ଙ୍କ ସମ୍ବିଧାନ ପ୍ରଚଳିତ। ମହବୁବାବାଦ ବିଧାୟକ ତଥା ବିଆର୍ଏସ୍ ନେତା ବନୋଥ ଶଙ୍କର ନାଏକ ଲୋକଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିନାହାନ୍ତି। ସ୍ଥାନୀୟ ବିଧାୟକ ଜଣେ ଚ୍ଛିନ୍ନ ମୁଷ୍କ। ଶର୍ମିଲାଙ୍କ ଏହି ଆପତ୍ତିଜନକ ମନ୍ତବ୍ୟ ପରେ ବିଆର୍ଏସ୍ ପକ୍ଷରୁ ଧାରଣା ଦିଆଯାଇଛି। ଆଇନଶୃଙ୍ଖଳା ପରିସ୍ଥିତି ଉପୁଜିବା ଆଶଙ୍କାରେ ପୋଲିସ ଶର୍ମିଲାଙ୍କୁ ଗିରଫ କରି ହାଇଦ୍ରାବାଦକୁ ଉଠାଇନେଇଛି।
