ମେଲବୋର୍ନ,୧୧।୧୧: ଭାରତୀୟ କ୍ରିକେଟ ଟିମ୍ ଗୁରୁବାର ଇଂଲଣ୍ଡ ବିପକ୍ଷରେ ଖେଳାଯାଇଥିବା ସେମିଫାଇନାଲ ମୁକାବିଲାରେ ୧୦ ଉଇକେଟରେ ପରାଜିତ ହୋଇ ଫାଇନାଲ ଖେଳିବାରୁ ବଞ୍ଚିତ ହୋଇଛି। ଏହି ଶୋଚନୀୟ ପରାଜୟ ପରେ ଭାରତୀୟ ଟିମ୍କୁ ବିଭିନ୍ନ ମହଲରେ ସମାଲୋଚନା କରାଯାଉଛି। ଏହି କ୍ରମରେ ପାକିସ୍ତାନ କ୍ରିକେଟ ଟିମର ପୂର୍ବତନ ଖେଳାଳି ତଥା ବର୍ତ୍ତମାନର ପିସିବି ଅଧ୍ୟକ୍ଷ ରମିଜ ରାଜା ଭାରତୀୟ ଟିମ ସହ ବିସିସିଆଇକୁ କଟାକ୍ଷ କରିଛନ୍ତି।
ପାକିସ୍ତାନ କ୍ରିକେଟ ଟିମର ଡ୍ରେସିଂ ରୁମ୍ରେ ପହଞ୍ଚି ରମିଜ କହିଛନ୍ତି, ବିଲିୟନ ଡଲାର ରୋଜଗାର କରୁଥିବା ଦଳଗୁଡ଼ିକ ପଛରେ ରହିଗଲେ ଏବଂ ଆମେ ଆଗରେ ପହଞ୍ଚିଛେ। କିଛି ଭଲ କାମ କରିଥିବାରୁ ଏଭଳି ହୋଇଛି। ଦଳ ପାଇଁ ଏହା ଜବରଦସ୍ତ ପ୍ରତ୍ୟାବର୍ତ୍ତନ ବୋଲି କହିପାରିବା। ଏଭଳି ପ୍ରଦର୍ଶନ ଉପରେ ଗର୍ବ ହେବା ଉଚିତ। ଏସବୁ ଏକତା ଯୋଗୁ ସମ୍ଭବ ହୋଇଛି।ଦଳରେ ଏକତା ଥିଲେ ପ୍ରଦର୍ଶନ ଭଲ ହୋଇଥାଏ। ଏଭଳି ଭାବେ ଆଗାମୀ ମ୍ୟାଚ୍ରେ ଯାହା ବି ହେବ ତାହା ଶତ ପ୍ରତିଶତ ଆମ ପାଇଁ ହେବ ବୋଲି ସେ କହିଛନ୍ତି।
ଏହାଛଡ଼ା ରମିଜ ୧୯୯୨ରେ ପାକିସ୍ତାନର ବିଶ୍ୱକପ୍ ବିଜୟ ସ୍ମୃତିକୁ ମନେ ପକାଇ କହିଛନ୍ତି, ଏଭଳି ତୁମ କ୍ୟାରିୟରରେ ବାରମ୍ବାର ଘଟିବ ନାହିଁ। ମଇଦାନକୁ ଯାଇ ସେଠାର ସୁଯୋଗର ଫାଇଦା ଉଠାଇବ। ଅଧିକ କିଛି କରିବାର ଆବଶ୍ୟକତା ନାହିଁ। ମଇଦାନରେ ଶାନ୍ତ ସ୍ବଭାବ, ଆତ୍ମବିଶ୍ୱାସ ସହ ଖେଳିବାକୁ ଚେଷ୍ଟା କରିବ। ସମସ୍ତଙ୍କୁ ଶୁଭକାମନା ବୋଲି ସେ କହିଛନ୍ତି।
ତେବେ ରମିଜ ଭାରତୀୟ ଟିମ୍ର ନାଁ ନେଇ ନ ଥିଲେ ହେଁ ତାଙ୍କ କଥାର ମର୍ମ ବିସିସିଆଇ ଏବଂ ଟିମ୍ ଇଣ୍ଡିଆ ପାଇଁ ଥିଲା। କାହିଁକିନା ଦଳ ଆଇପିଏଲ୍ରୁ କୋଟି କୋଟି ଟଙ୍କା ରୋଜଗାର କରୁଛି।
