ଭୁବନେଶ୍ୱର,୮ା୧୧(ସରୋଜ ଜେନା): ଗୋଆରେ ଅନୁଷ୍ଠିତ ୩୭ ତମ ଜାତୀୟ କ୍ରୀଡାରେ ଓଡ଼ିଶା ଖେଳାଳିଙ୍କ ପ୍ରଭାବୀ ପ୍ରଦର୍ଶନ ଜାରି ରହିଛି। ମଙ୍ଗଳବାର କାନୋଇଂ ଓ କାୟାକିଂରେ ଓଡ଼ିଶା ଖେଳାଳି ଗୋଟିଏ ଲେଖାଏ ରୌପ୍ୟ ଓ ବ୍ରୋଞ୍ଜ ପଦକ ଜିତିଛନ୍ତି। ଏହା ସହିତ ଉଭୟ ପୁରୁଷ ଓ ମହିଳା ଖୋ ଖୋ ଦଳ ଫାଇନାଲରେ ପହଞ୍ଚି ଆହୁରି ଦୁଇଟି ପଦକ ନିଶ୍ଚିନ୍ତ କରିଛନ୍ତି। କାନୋଇଂ ଓ କାୟାକିଂର କେ-୧ ଇଭେଣ୍ଟର ଉଭୟ ପୁରୁଷ ଓ ମହିଳା ବର୍ଗରେ ଓଡ଼ିଶା ଗୋଟିଏ ଲେଖାଏ ପଦକ ହାସଲ କରିଛନ୍ତି। ୨୦୦ମିଟର କେ-୧ରେ ପୁରୁଷ ଦଳ ଏକ ରୌପ୍ୟ ପଦକ ଓ ମହିଳା ଦଳ ବ୍ରୋଞ୍ଜ ପଦକ ହାସଲ କରିଛନ୍ତି। ଏହାକୁ ମିଶାଇ କାନୋଇଂ ଓ କାୟାକିଂରେ ଓଡ଼ିଶା ସମୁଦାୟ ୯ ପଦକ ହାସଲ କରିଛି। ଏହା ମଧ୍ୟରେ ୧ ସ୍ବର୍ଣ୍ଣ, ୪ ରୌପ୍ୟ ଓ ୪ ବ୍ରୋଞ୍ଜ ପଦକ ହାସଲ କରିଛି। ଦେଶବ୍ୟାପୀ ଅଂଶଗ୍ରହଣ କରିଥିବା କାନୋଇଂ ଓ କାୟାକିଂ ଦଳ ମାନଙ୍କ ମଧ୍ୟରେ ଓଡ଼ିଶା ୪ର୍ଥ ସ୍ଥାନରେ ରହିଛି।
ଖୋ ଖୋରେ ଓଡ଼ିଶାର ଉଭୟ ପୁରୁଷ ଓ ମହିଳା ଦଳ ଫାଇନାଲରେ ପ୍ରବେଶ କରିଛି। ମହିଳା ଦଳ କେରଳକୁ ପରାସ୍ତ କରିଥିବା ବେଳେ ପୁରୁଷ ଦଳ ଆନ୍ଧ୍ରପ୍ରଦେଶକୁ ପରାସ୍ତ କରିଥିଲା। ଉଭୟ ଦଳ ଫାଇନାଲରେ ମହାରାଷ୍ଟ୍ରକୁ ଭେଟିବ। ଉଭୟ ପୁରୁଷ ଓ ମହିଳା ଦଳ ଚମତ୍କାର ପ୍ରଦର୍ଶନ କରିଛନ୍ତି ବୋଲି କହିଛନ୍ତି ଓଡ଼ିଶା ଖୋ ଖୋ ଦଳର କୋଚ୍ ସଞ୍ଜୀବ ଶର୍ମା। ଉଭୟ ଦଳ ବର୍ତ୍ତମାନ ଅପରାଜେୟ ରହିଛନ୍ତି। ତେବେ ମହାରାଷ୍ଟ୍ର ଏକ ଶକ୍ତିଶାଳୀ ଦଳ ହୋଇଥିବାରୁ ଆମକୁ ସତର୍କତାର ସହ ଖେଳିବାକୁ ପଡିବ ବୋଲି ସଞ୍ଜୀବ କହିଛନ୍ତି। ବିଜୟକୁ ନେଇ ଚିନ୍ତା ନ କରି ଦଳ ଆରାମରେ ଫାଇନାଲ ଖେଳିବା ଉଚିତ ବୋଲି ସେ ମତ ଦେଇଛନ୍ତି।
ମହାରାଷ୍ଟ୍ରରେ କ୍ଲବ ସର୍କିଟରେ ଖୋ ଖୋ ଏକ ଲୋକପ୍ରିୟ ଖେଳ ହୋଇଥିବାରୁ ଏହା ସେମାନଙ୍କ ପାଇଁ ସୁବିଧାଜନକ ସ୍ଥିତି ସୃଷ୍ଟି କରିବ। ତେବେ ଫଳାଫଳକୁ ନେଇ ଚିନ୍ତିତ ନ ହୋଇ ଖେଳାଳି ମାନେ ପ୍ରଦର୍ଶନ କରିବା ଉଚିତ ବୋଲି କୋଚ୍ କହିଛନ୍ତି।
