ଲକ୍ଷ୍ନୌ: ବର୍ତ୍ତମାନ ସମୟରେ ଲୋକେ ସରକାରଙ୍କ ନିକଟରେ ତାଙ୍କର ଅନେକ ଦାବି ରଖି ଧାରଣାରେ ବସୁଥିବା ଦେଖିବାକୁ ମିଳୁଛି। ହେଲେ ଉତ୍ତର ପ୍ରଦେଶରେ ଜଣେ ଶିକ୍ଷକ ଜମି ମାଫିଆଙ୍କୁ ବିରୋଧ କରି ୧୯୯୬ ମସିହାରୁ ୨୭ ବର୍ଷ ହେବ ଧାରଣାରେ ବସିଥିବା ଜଣାପଡ଼ିଛି। ଶିକ୍ଷକ ବିଜୟ ସିଂ କହିଛନ୍ତି, ୩୩ ବର୍ଷ ବୟସରେ ସେ ଉତ୍ତର ପ୍ରଦେଶର ଶାମଲି ଜିଲାର ଚଉସିନା ଗଁାରେ ଥିବା ତାଙ୍କର ୪ ହଜାର ବିଘା ଜମିରେ ଚାଷ କରିଥିଲେ। ତେବେ ଜମି ମାଫିଆମାନେ ଏହାକୁ ଜବରଦଖଲ କରିନେଇଥିଲେ। ସେବେଠାରୁ ସେ ମାଫିଆଙ୍କୁ ବିରୋଧ କରି ଧାରଣାରେ ବସି ରହିଛନ୍ତି। ହେଲେ ସବୁ ବୃଥା। ଏହି ୨୭ ବର୍ଷ ଭିତରେ ତାଙ୍କ ଅଭିଯୋଗ ଉପରେ ଅନେକ ତଦନ୍ତ ଆରମ୍ଭ ହୋଇଛି। ହେଲେ ବର୍ତ୍ତମାନର ୭୦୦ କୋଟି ଟଙ୍କା ମୂଲ୍ୟର ତାଙ୍କ ଜମି ମାଫିଆଙ୍କ ନିୟନ୍ତ୍ରଣରେ ରହିଛି। ସେମାନେ ଶକ୍ତିଶାଳୀ ରାଜନେତା । ସେ ଗାନ୍ଧୀ ଏବଂ ବିନୋଭା ଭାବେଙ୍କ ଆଦର୍ଶରେ ଅନୁପ୍ରାଣିତ ହୋଇ ୨୦୧୯ ସେପ୍ଟେମ୍ବର ୧୯ଠାରୁ ମୁଜାଫରନଗରରେ ବିକ୍ଷୋଭ କରିଆସୁଛନ୍ତି। ସେ ନ୍ୟାୟ ପାଇବା ପାଇଁ ଜବରଦଖଲ ହୋଇଥିବା ଜମିକୁ ଫେରାଇ ଆଣିବାକୁ ନିଜ ଜୀବନକୁ ଉତ୍ସର୍ଗ କରିଥିବା କହିଛନ୍ତି। ଭାରତୀୟ କିଷାନ ୟୁନିୟନ ସଭାପତି ନରେଶ ଟିକାୟତ୍ ସୋମବାର ତାଙ୍କର ଏହି ଉତ୍ସର୍ଗୀକୃତକୁ ପ୍ରଶଂସା କରି ଏକ ଟୁଇଟ୍ କରିଛନ୍ତି। ଏହା ଯୁବପିଢି ପାଇଁ ପ୍ରେରଣା ବୋଲି କହିଛନ୍ତି। ବିଜୟ ଏନେଇ ମନ୍ତ୍ରୀଙ୍କୁ ଭେଟି ସ୍ମାରକପତ୍ର ପ୍ରଦାନ କରିଥିଲେ ମଧ୍ୟ କୌଣସି ସମାଧାନ ହୋଇନାହିଁ ବୋଲି କହିଛନ୍ତି।
