କୁଆଁରମୁଣ୍ଡା,୭।୯(ଡି.ଏନ୍.ଏ.): କରୋନା ସଂକ୍ରମଣ ରାଜ୍ୟରେ ହୁ ହୁ ହୋଇ ବଢ଼ି ଚାଲିଛି। ଏହି ସମୟରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସ୍କୁଲ ବନ୍ଦକରାଯାଇଛି। ଛାତ୍ରୀ, ଛାତ୍ରଙ୍କ ମଧ୍ୟାହ୍ନଭୋଜନ ଚାଉଳ,ବହି ଇତ୍ୟାଦି ଶିକ୍ଷୟିତ୍ରୀ/ଶିକ୍ଷକମାନେ ସେମାନଙ୍କ ଘରେ ପହଞ୍ଚାଉଛନ୍ତି । ତେବେ ଶନିବାର ଗୁରୁଦିବସରେ କୌଣସି ଛାତ୍ରୀଛାତ୍ର ଯେପରି ସ୍କୁଲ ଆସି ଏହା ପାଳନ ନ କରନ୍ତି ସେଥିପାଇଁ ସରକାରୀସ୍ତରରେ ବାରଣ କରାଯାଇଥିଲା। ମାତ୍ର ଏହି ନିୟମର ଖୋଲାଖୋଲି ଉଲ୍ଲଘଂନ ହୋଇଛି ସୁନ୍ଦରଗଡ଼ ଜିଲା କୁଆଁରମୁଣ୍ଡା ଶିକ୍ଷା କାର୍ଯ୍ୟାଳୟ ଅଧୀନ ରାଏବୋଗା ଅଞ୍ଚଳର ଏକ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ। ଉକ୍ତ ବିଦ୍ୟାଳୟରେ କୋଭିଡ୍ ନିୟମକୁ ଖୋଲାଖୋଲି ଉଲ୍ଲଘଂନ କରାଯାଇ ଗୁରୁଦିବସ ପାଳନ କରାଯାଇଥିବା ସାମାଜିକ ଗଣମାଧ୍ୟମ(ଫେସବୁକ୍)ରେ ଫଟୋ ଭାଇରାଲ ହୋଇଛି। ଗୁରୁଦିବସ ପାଳନ ସମୟରେ ଉକ୍ତ ବିଦ୍ୟାଳୟରେ ଶିକ୍ଷୟିତ୍ରୀ/ଶିକ୍ଷକମାନଙ୍କ ସହ ଛାତ୍ରୀଛାତ୍ର ଉପସ୍ଥିତ ରହିଛନ୍ତି। ସେଠାରେ ମଧ୍ୟ ସାମାଜିକ ଦୂରତ୍ୱ ପାଳନ ହୋଇ ନ ଥିବା ନେଇ ଅଭିଯୋଗ ହୋଇଛି । ଏ ନେଇ କୁଆଁରମୁଣ୍ଡା ଗୋଷ୍ଠୀ ଶିକ୍ଷା ଅଧୀକାରୀ ସଦାନନ୍ଦ ପଧାନଙ୍କୁ ପଚରାଯିବାରୁ ସେ ଏହାକୁ ନିନ୍ଦା କରିବା ସହ ସମ୍ପୃକ୍ତ ବିଦ୍ୟାଳୟରେ କାହିଁକି ଛାତ୍ରୀଛାତ୍ରମାନଙ୍କୁ ଡକାଯାଇ ଗୁରୁଦିବସ ପାଳନ କରାଗଲା ସେ ନେଇ ଉକ୍ତ ବିଦ୍ୟାଳୟର ପ୍ରଧାନଶିକ୍ଷକଙ୍କୁ କାରଣ ଦର୍ଶାଅ ନୋଟିସ୍ ଜାରି କରିବା ସହ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି କହିଛନ୍ତି ।
