ଲୋଇସିଂହା,୧୭।୪(ସୁଶାନ୍ତ ବାରିକ): ସରକାରଙ୍କ ନିର୍ଦ୍ଦେଶକ୍ରମେ ପ୍ରଥମ ଡିଜିଟାଲ ଜନଗଣନା ପ୍ରକ୍ରିୟା ଆରମ୍ଭ ହୋଇଯାଇଛି । ହେଲେ ବିନା ଉପକରଣରେ ଶିକ୍ଷକ ଜନଗଣନାକୁ ଓହ୍ଲାଇ ଥିବାରୁ ସାଧାରଣରେ ଚିନ୍ତା ବ୍ୟକ୍ତ ହେଉଛି। ଅଭିଯୋଗ ହେଉଛି, ବଲାଙ୍ଗୀର ଜିଲା ଲୋଇସିଂହା ଏନଏସି ଓ ଲୋଇସିଂହା ବ୍ଲକର ଶିକ୍ଷକମାନେ କିଟ (ଡିଜିଟାଲ ସାଧନ) ବିନା ଜନଗଣନା କାମ କରିବାକୁ ବାଧ୍ୟ ହେଉଛନ୍ତି। ସରକାର ଏହାକୁ ଡିଜିଟାଲ ଜନଗଣନା ଭାବେ ପ୍ରଚାର କରିଥିବା ସତ୍ତ୍ୱେ, ଏପର୍ଯ୍ୟନ୍ତ ଅନେକ ଅଞ୍ଚଳକୁ ଆବଶ୍ୟକ କିଟ ଯୋଗାଣ ହୋଇନାହିଁ। ଫଳରେ ଶିକ୍ଷକମାନେ ପାରମ୍ପରିକ ପ୍ରଣାଳୀରେ ତଥ୍ୟ ସଂଗ୍ରହ କରୁଛନ୍ତି। ସାଧା କାଗଜରେ କାର୍ଯ୍ୟ କରାଯାଉଛି। ମାର୍କର ପେନଟିଏ ମଧ୍ୟ ଦିଆଯାଇନାହିଁ। କେବଳ ଏକ ପୁସ୍ତିକା ଦିଆଯାଇଛି। ଯାହା ଡିଜିଟାଲ ପ୍ରକ୍ରିୟାର ଲକ୍ଷ୍ୟକୁ ପ୍ରଶ୍ନରେ ପକାଉଛି।
ସ୍ଥାନୀୟ ଶିକ୍ଷକମାନଙ୍କ କହିବା ଅନୁଯାୟୀ, ଆମକୁ କିଟ ଦିଆଯାଇନି, ତଥାପି ଜନଗଣନା କାମ ଆରମ୍ଭ କରିବାକୁ ନିର୍ଦ୍ଦେଶ ମିଳିଛି। ଏହା ଫଳରେ କାମ ଧୀର ହେଉଛି ଓ ଅସୁବିଧା ବଢ଼ୁଛି।
ଏହି ପରିସ୍ଥିତିରେ ସରକାରଙ୍କ ଡିଜିଟାଲ ଉଦ୍ୟମ ଉପରେ ପ୍ରଶ୍ନ ଉଠୁଛି। ପ୍ରଥମେ ପ୍ରୟୋଜନୀୟ ସାଧନ ସୁବିଧା ଯୋଗାଇବାପରେ ଜନଗଣନା ଆରମ୍ଭ କରିବାକୁ ସାଧାରଣ ଲୋକ ଓ ଶିକ୍ଷକମାନେ ଦାବି କରିଛନ୍ତି। ସରକାର ଯଦି ଶୀଘ୍ର ଏହାକୁ ଗୁରୁତ୍ୱ ଦେଇ କିଟ ବିତରଣ ନ କରନ୍ତି ତେବେ ଡିଜିଟାଲ ଜନଗଣନାର ଲକ୍ଷ୍ୟ ପୂରଣ ହେବା କଷ୍ଟକର ହେବ ବୋଲି ମତ ପ୍ରକାଶ ପାଉଛି। ଏଥି ପାଇଁ ତହସିଲଦାର ଓ ଏନଏସି କାର୍ଯ୍ୟନିର୍ବାହୀ ଅଧିକାରୀଙ୍କୁ ଟ୍ରୋଲ କରାଯାଉଛି।
Dharitri – Odisha’s No.1 Odia Daily
