କଟକ ଅଫିସ/କଟକ ସଦର, ୭।୧: ବର୍ଷବର୍ଷ ଧରି ସହରରେ ନକଲି ସାମଗ୍ରୀର ଚାଲିଥିବା କାରବାର ଏବେ ଧୀରେ ଧୀରେ ପଦାକୁ ଆସୁଛି। ନକଲି ମସଲା, ଘିଅ, ସସ୍, ସିମେଣ୍ଟ, ପନିର ପରେ ଏବେ ନକଲି ଚା’ପତି ବିକ୍ରି କରାଯାଉଥିବା ଜଣାପଡ଼ିଛି। କଟକ ସଦରଥାନା ଅନ୍ତର୍ଗତ ମୁକାମେଶ୍ୱର ଅଞ୍ଚଳର ଏକ ଚା’ ଗୋଦାମରେ ବୁଧବାର ପୋଲିସ ଚଢ଼ାଉ କରି ପ୍ରାୟ ୪୫ କୁଇଣ୍ଟାଲ ନକଲି ଚା’ ଜବତ କରିଛନ୍ତି। ବିଭିନ୍ନ ପ୍ରକାର ଶୁଖିଲା ପତ୍ର ଅପମିଶ୍ରଣ କରାଯାଇ ନକଲି ଚା’ ପ୍ରସ୍ତୁତ କରାଯିବା ସହ ବିଭିନ୍ନ ନାମୀଦାମୀ ବ୍ରାଣ୍ଡରେ ଏହାକୁ ପ୍ୟାକିଂ କରାଯାଇ କଟକ ସମେତ ରାଜ୍ୟର ବିଭିନ୍ନ ଅଞ୍ଚଳରେ ବିକ୍ରି କରାଯାଉଥିବା ପ୍ରାଥମିକ ତଦନ୍ତରୁ ଜଣାପଡ଼ିଥିବା ପୋଲିସ କହିଛି। ଏହି ନକଲି ଚା’ପତି ଗୋଦାମର ମାଲିକ କେନ୍ଦ୍ରାପଡ଼ା ଜିଲା ରାଜନଗର ଅଞ୍ଚଳର ସୁରେଶ ଚନ୍ଦ୍ର ବିଶ୍ୱାଳଙ୍କ ବିରୋଧରେ ପୋଲିସ ଏକ ମାମଲା(ନଂ.୧୬/୨୧) ରୁଜୁ କରି ତାଙ୍କୁ ଗିରଫ କରିଛି। ସୁରେଶ କିପରି ଭାବରେ କଟକ ତଥା ବିଭିନ୍ନ ଅଞ୍ଚଳରେ ଅପମିଶ୍ରିତ ଚା’ ପତି ବିକୁଥିଲେ ସେନେଇ ସଦର ଥାନା ଅଧିକ ଖୋଳତାଡ଼ ଜାରି ରଖିଛି।
ମିଳିଥିବା ସୂଚନା ଅନୁସାରେ, ଅଭିଯୁକ୍ତ ସୁରେଶ ପୂର୍ବରୁ ମାଲଗୋଦାମ ଥାନାରେ କିଛିବର୍ଷ କାର୍ଯ୍ୟ କରିଥିଲେ। ପରେ ସେ ମୁକାମେଶ୍ୱର ଅଞ୍ଚଳରେ ଏକ ୪ ବଖରା ଘର ଭଡ଼ାନେଇ ସେଠାରେ ଏହି ନକଲି ଚା’ପତି ବ୍ୟବସାୟ ଆରମ୍ଭ କରିଥିଲେ। ଏହି ବ୍ୟବସାୟ ୩ରୁ ୪ ବର୍ଷ ହେଲା କରୁଥିବାନେଇ ସେ ପୋଲିସ ନିକଟରେ ସ୍ବୀକାର କରିଥିବାବେଳେ ସ୍ଥାନୀୟବାସିନ୍ଦା କିନ୍ତୁ ଏହି କାରବାର ୮ରୁ ୧୦ ବର୍ଷ ହେବ ଚାଲୁଛି ବୋଲି କହିଛନ୍ତି। ସୁରେଶଙ୍କ ମୂଳ ଗ୍ରାମ ରାଜନଗରରେ ହୋଇଥିବାବେଳେ ସେ ସ୍ଥାନୀୟ ସୁଭଦ୍ରାପୁର ଅଞ୍ଚଳରେ ଜାଗା କିଣି ସେହି ସ୍ଥାନରେ ଏକ ବିଳାସପୂର୍ଣ୍ଣ ଘର ନିର୍ମାଣ କରିଛନ୍ତି। ଏହାର ମୂଲ୍ୟ ଆନୁମାନିକ ୫କୋଟିରୁ ଊର୍ଦ୍ଧ୍ୱ ହେବ ବୋଲି ଥାନା ଅଧିକାରୀ ସୁଧାଂଶୁ ଜେନା ସୂଚନା ଦେଇଛନ୍ତି। ଏହି ନକଲି ଚା’ ପତି ଗୋଦାମରେ ଥାନା ଅଧିକାରୀ ସୁଧାଂଶୁ ଜେନାଙ୍କ ସହିତ ଅତିରିକ୍ତ ଇନ୍ସପେକ୍ଟର ବବିତା ସାହୁ, ଏସ୍ଆଇ ମୁରଲୀଧର ସାହୁ ଓ ଯୁଗଳ ବିଶ୍ୱାଳ ପ୍ରମୁଖ ଚଢାଉ କରିଥିଲେ ା
