ବରଗଡ଼ ଅଫିସ୍,୨୮।୨: ବରଗଡ଼ ସହରରେ ଅସାମାଜିକତତ୍ତ୍ବଙ୍କ ଦୌରାତ୍ମ୍ୟ ବଢ଼ିଚାଲିଛି। ଗତ କିଛିଦିନ ହେଲା ଦୁର୍ବୃତ୍ତମାନେ ସ୍ଥାନୀୟ କଲେଜ ଛାତ୍ରୀଛାତ୍ରଙ୍କୁ ଟାର୍ଗେଟ୍ କରିଛନ୍ତି। କଲେଜ କ୍ୟାମ୍ପସରୁ ସାଇକେଲ ଚୋରି ହେଉଥିବାବେଳେ କଲେଜକୁ ଯିବାଆସିବା ସମୟରେ ମଧ୍ୟ ଦୁର୍ବୃତ୍ତମାନେ ଛାତ୍ରୀଛାତ୍ରଙ୍କ ମୋବାଇଲ ଲୁଟ୍ କରୁଛନ୍ତି। ଏଭଳି ସ୍ଥିତିରେ କଲେଜ ଛାତ୍ରୀଛାତ୍ର ନିଜକୁ ଅସୁରକ୍ଷିତ ମନେ କରୁଛନ୍ତି। ସୋମବାର ବରଗଡ଼ ଟ୍ରଷ୍ଟଫଣ୍ଡ କଲେଜ କ୍ୟାମ୍ପସ ଭିତରୁ ଛାତ୍ର ବିଦ୍ୟାସାଗର ପାଣ୍ଡେଙ୍କ ସାଇକେଲ ଚୋରି ହୋଛି। ସେ କଲେଜ କ୍ୟାମ୍ପସ ଭିତରେ ସାଇକେଲ ରଖି ଶ୍ରେଣୀ କୋଠରୀକୁ ପଢ଼ିବାକୁ ଯାଇଥିଲେ। ତେବେ ସେ ଫେରିବା ସମୟରେ ସେଠାରେ ଆଉ ତାଙ୍କ ସାଇକେଲ ନ ଥିଲା। ଏ ନେଇ ସେ ସୋମବାର ବରଗଡ଼ ଟାଉନ ଥାନାକୁ ଆସି ଏତଲା ଦେଇଛନ୍ତି। ସେହିପରି ପଞ୍ଚାୟତ କଲେଜର ଜଣେ ଛାତ୍ର ହରିଶ ପ୍ରଧାନଙ୍କ ମୋବାଇଲ ଲୁଟ୍ ହୋଇଛି। ସେ ଦିନ ସାଢ଼େ ୧୨ଟା ସମୟରେ ହୋଟେଲକୁ ଖାଇବାକୁ ଆସୁଥିବାବେଳେ କଲେଜ ନିକଟରେ ୫ଜଣ ଯୁବକ ତାଙ୍କୁ ଅଟକାଇ ମୋବାଇଲ ମାଗିଥିଲେ। ସେ ମୋବାଇଲ ନ ଦେବାରୁ ତାଙ୍କୁ ଦୁର୍ବୃତ୍ତମାନେ ମାର୍ପିଟ୍ କରି ମୋବାଇଲ ଲୁଟି ନେଇଥିଲେ ବୋଲି ହରିଶ ବରଗଡ଼ ଟାଉନ ଥାନାରେ ଅଭିଯୋଗ କରିଛନ୍ତି। କେବଳ ଏହି ୨ଟି ଘଟଣା ନୁହେଁ, ଆଗରୁ ଅନେକ କଲେଜ ଛାତ୍ରୀଛାତ୍ର ଏଭଳି ସମସ୍ୟାର ସମ୍ମୁଖୀନ ହୋଇଛନ୍ତି। ଏ ଦିଗରେ ବିହିତ କାର୍ଯ୍ୟାନୁଷ୍ଠାନ ନେବା ପାଇଁ କଲେଜ କର୍ତ୍ତୃପକ୍ଷ ଏବଂ ପୋଲିସର ଦୃଷ୍ଟି ଆକର୍ଷଣ କରାଯାଇଛି । ମାତ୍ର ସେ ଦିଗରେ କିଛି ପଦକ୍ଷେପ ନିଆଯାଇନାହିଁ ବୋଲି ଛାତ୍ରନେତା ଦେବେନ୍ଦ୍ର ପଟେଲ କହିଛନ୍ତି।
