ଧୁଷୂରୀ, ୧୮ା୨(ସ୍ବ.ପ୍ର.): ଭଦ୍ରକ ଜିଲା ଧାମନଗର ବ୍ଲକ ଅଧୀନ ଭଗବାନପୁର ପଞ୍ଚାୟତ ଇଛଦା ଗ୍ରାମରେ ଥିବା ତପନେଶ୍ୱର ପୀଠ ଜାଗର ଯାତ୍ରା ପାଇଁ ଚଳଚଞ୍ଚଳ ହୋଇଉଠିଛି। ଶନିବାର ମହାଶିବରାତ୍ରି ଉପଲକ୍ଷେ ମନ୍ଦିର ପରିସର ସଜ୍ଜିତ କରାଯାଇଛି। ପ୍ରବଳ ଭିଡ଼କୁ ଦୃଷ୍ଟିରେ ରଖି ପୂଜା କମିଟି ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ରାତି ଗୋଟାଏରେ ମହାଦୀପ ଉଠିବ ବୋଲି କୁହାଯାଇଛି।
ପୂଜକ ଓ ଗ୍ରାମର ବୟୋଜ୍ୟେଷ୍ଠ ବ୍ୟକ୍ତିଙ୍କ କହିବା ଅନୁଯାୟୀ, କେଳୁ ତ୍ରିପାଠୀ ନାମକ ଗ୍ରାମର ଜଣେ ବ୍ୟକ୍ତି ଜଙ୍ଗଲ ଜମିରେ ଚାଷ ପାଇଁ ହଳ କରୁଥିବା ବେଳେ ଲଙ୍ଗଳ ମୁନ ବାଜି ଏକ ଶବ୍ଦ ହୋଇଥିଲା। ସେହି ସ୍ଥାନରୁ ପଥର ଖଣ୍ଡରୁ ରକ୍ତସ୍ରାବ ହେଉଥିବା ଦେଖି ସେ ଭୟଭୀତ ହୋଇଥିଲେ। ସେଠାରେ ମନ୍ଦିର ଗଢ଼ି ପୂଜାର୍ଚ୍ଚନା କରିବା ପାଇଁ ରାତିରେ ତାଙ୍କୁ ସ୍ବପ୍ନାଦେଶ ହୋଇଥିଲା। ସ୍ଥାନୀୟ ଲୋକଙ୍କ ସହଯୋଗରେ ଏକ ଝାଟି ମାଟି ବେଢ଼ା ତିଆରି କରି ବାବା ସ୍ବପ୍ନେଶ୍ୱର ନାମ ରଖାଯାଇଥିଲା। ରେବ ନଦୀ କୂଳରେ ଅବସ୍ଥିତ ପୀଠର ପ୍ରାକୃତିକ ସୌନ୍ଦର୍ଯ୍ୟ ବେଶ୍ ମନଲୋଭା। ପୂର୍ବ ଦିଗରୁ ସୂର୍ଯ୍ୟଙ୍କର ପ୍ରଥମ କିରଣ ପୀଠ ଉପରେ ପଡୁଥିବାରୁ ପରେ ନାମ ପରିବର୍ତ୍ତନ କରାଯାଇ ତପନେଶ୍ୱର ରଖାଗଲା। ୨୦୦ ବର୍ଷରୁ ଊର୍ଦ୍ଧ୍ୱ ପୁରାତନ ମନ୍ଦିର। ଲୋକକଥା ଅନୁଯାୟୀ ଏଠାରେ ମାନସିକ କଲେ ଧାରଣାରେ ରହିଲେ ବହୁ ଦୂରାରୋଗ୍ୟରୁ ଆରୋଗ୍ୟ ହେବା ସହ ମନସ୍କାମନା ପୂରଣ ହୁଏ। କେଳୁଙ୍କ ପରେ ତାଙ୍କ ବଂଶଧରମାନେ ପୂଜାରେ ନିୟୋଜିତ ଅଛନ୍ତି। ପରେ ମନ୍ଦିର ବେଢ଼ା, ନାଟମନ୍ଦିର, ଗର୍ଭଗୃହ ଆଦି ସହ ପାର୍ଶ୍ୱ ଦେବଦେବୀଙ୍କ ମୂର୍ତ୍ତି ନିର୍ମିତ ହୋଇଛି।
