ଭୁବନେଶ୍ୱର,୨୦ା୧୦: ଜୀ ସାର୍ଥକ ଓଡ଼ିଆ ଟେଲିଭିଜନ ଦ୍ୱାରା ପ୍ରସ୍ତୁତ କରାଯାଇଥିବା ସଙ୍ଗୀତ ଭିତ୍ତିକ ରିୟାଲିଟି ଶୋ’ ‘ସାରେଗାମାପା ଲିଟିଲ୍ ଚାମ୍ପ୍ ୨୦୨୩’ର ବିଜେତା ହୋଇଛନ୍ତି ତନୁଶ୍ରୀ ଜେନା। ଏହି ଶୋ’ରେ ଓଡ଼ିଶାର କୋଣ ଅନୁକୋଣରୁ ବଛା ହୋଇ ଆସିଥିବା ପ୍ରତିଯୋଗୀମାନଙ୍କୁ ପଛରେ ପକାଇ ତନୁଶ୍ରୀ ଏହି ଟାଇଟଲ ହାତେଇବାରେ ସକ୍ଷମ ହୋଇଛନ୍ତି। ନିଜ କଣ୍ଠର ଯାଦୁରେ ଶୋ’ର ଜଜ୍ ତଥା ସଙ୍ଗୀତ ନିର୍ଦ୍ଦେଶକ ଗୁଡ୍ଲି ରଥ, ଅସୀମା ପଣ୍ଡା ଓ କ୍ରୀଷ୍ଣା ବେଉରାଙ୍କୁ ବିମୋହିତ କରିଦେଇଥିଲେ।
କେବଳ ସଙ୍ଗୀତ ନୁହେଁ ବିଭିନ୍ନ ପ୍ରକାର ବାଦ୍ୟଯନ୍ତ୍ର ଯଥା ଗୀଟାର, କାଜୋ ଇଦ୍ୟାଦି ବଜାଇ ସେ ଚମତ୍କାର ଢଙ୍ଗରେ ନିଜର ସଙ୍ଗୀତ ପରିବେଷଣ କରିଥିଲେ। ତାଙ୍କର ଏହି ସଫଳତା ପାଇଁ ମାତାପିତା, ସଙ୍ଗୀତ ଗୁରୁ ଦେବେନ୍ଦ୍ର ନାରାୟଣ ଶତପଥୀ, ବିଦ୍ୟୁତ ରାୟ, କୃଷ୍ଣଚନ୍ଦ୍ର ମଲ୍ଲିକ ଓ ସନ୍ତୋଷ କର ତଥା ‘ଜୀ ସାର୍ଥକ’ର ସମସ୍ତ ଟିମ୍ ମେମ୍ବରମାନଙ୍କୁ ଶ୍ରେୟ ଦେଇଛନ୍ତି। ଏହି ପୁରସ୍କାରକୁ ସେ ନିଜର ଜେଜେ ପ୍ରଖ୍ୟାତ ସ୍ବାଧୀନତା ସଂଗ୍ରାମୀ ଏବଂ ଚିଲିକା ଗାନ୍ଧୀ ରୂପେ ସୁପରିଚିତ ଉଦୟନାଥ ଜେନାଙ୍କୁ ଉତ୍ସର୍ଗ କରିଛନ୍ତି। ସଂପ୍ରତି ଭୁବନେଶ୍ୱରର ଡି.ଏ.ଭି. ପବ୍ଲିକ ସ୍କୁଲ ପୋଖରୀପୁଟରେ ଅଧ୍ୟୟନରତ ଥିବା ତନୁଶ୍ରୀ ପୁରସ୍କାର ପାଇଥିବା ଦୁଇଲକ୍ଷ ଅର୍ଥରାଶିକୁ ନିଜର ସଙ୍ଗୀତ ଶିକ୍ଷା କାର୍ଯ୍ୟରେ ବିନିଯୋଗ କରିବେ ବୋଲି ପ୍ରକାଶ କରିଛନ୍ତି।
