ଟାଙ୍ଗୀ,୨୮ା୪(ରଘୁନାଥ ସାହୁ)ଟାଙ୍ଗୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ଟାଙ୍ଗୀ ବ୍ଲକ ଅନ୍ତର୍ଗତ ୨୬ ପଞ୍ଚାୟତ, ଚିଲିକା ବ୍ଲକ ଅନ୍ତର୍ଗତ ୫ ପଞ୍ଚାୟତ ଓ ରଣପୁର ବ୍ଲକ ଅନ୍ତର୍ଗତ ୫ ପଞ୍ଚାୟତର ଜନସାଧାରଣ ନିର୍ଭର କରିଥାନ୍ତି। ପ୍ରତ୍ୟେକ ଦିନ ଏହି ସ୍ବାସ୍ଥ୍ୟକେନ୍ଦ୍ରକୁ ୪ଶହରୁ ଊଦ୍ଧର୍ବ ରୋଗୀ ଆସୁଥିବା ଜଣାଯାଏ। ଏହି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧୀନରେ ୭ଟି ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ର ଓ ୨୪ଟି ଉପ ସ୍ବାସ୍ଥ୍ୟକେନ୍ଦ୍ର ରହିଛି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ ମାତୃ ଓ ଶିଶୁ ସ୍ବାସ୍ଥ୍ୟକେନ୍ଦ୍ର ରହିଛି। ମା ଓ ଶିଶୁର ଯତ୍ନ ପାଇଁ ୧୫ଟି ଲେଖାଏ ମୋଟ ୩୦ଟି ବେଡ୍ ରହିଛି। ପ୍ରତି ମାସରେ ପ୍ରାୟ ୧୫୦ଜଣ ପ୍ରସୂତି ପ୍ରସବ ପାଇଁ ଏଠାକୁ ଆସିଥାନ୍ତି। ସ୍ତ୍ରୀ ରୋଗ ବିଶେଷଜ୍ଞ ଥିଲେ ମଧ୍ୟ ନିଶ୍ଚେତକ ବିଶେଷଜ୍ଞ ଅଭାବ ଦର୍ଶାଇ ସିଜରିଆନ କେସଗୁଡିକ ଏଠାରେ ନ କରାଯାଇ ବାହାରକୁ ପଠାଯାଉଥିବା ଅଭିଯୋଗ ହେଉଛି। ସେହିପରି ଏକ ନୂତନ ଅଲଟ୍ରାସାଉଣ୍ଡ ମେଶିନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆସିଥିଲେ ମଧ୍ୟ କାର୍ଯ୍ୟକ୍ଷମ ହୋଇପାରିନାହିଁ। ଫଳରେ ରୋଗୀମାନେ ବାହାରେ ଖର୍ଚ୍ଚାନ୍ତ ହୋଇ ଅଲଟ୍ରାସାଉଣ୍ଡ କରୁଛନ୍ତି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସୁପରିଚାଳନା କରିବା ପାଇଁ ସୁପରିଣ୍ଟେଣ୍ଡେଣ୍ଟଙ୍କ ଆବଶ୍ୟକ ଥିବା ବେଳେ ଏହି ପଦବୀ ଦୀର୍ଘ ବର୍ଷ ହେବ ଖାଲିପଡ଼ିଛି। ସେହିପରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ପ୍ରଶାସନିକ ପରିଚାଳନା ପାଇଁ ବ୍ଲକ ପବ୍ଲିକ ହେଲ୍ଥ ଅଫିସର ପଦବୀ ସୃଷ୍ଟି ହୋଇଥିଲେ ମଧ୍ୟ ଏହି ପଦବୀ ପୂରଣ କରାଯାଇନାହିଁ। ବିଶେଷଜ୍ଞ ଡାକ୍ତର ମେଡିସିନ ଓ ସର୍ଜରୀ ପଦବୀ ସୃଷ୍ଟି ହୋଇଥିଲେ ମଧ୍ୟ ଏହି ପଦବୀରେ ବିଶେଷଜ୍ଞ ଡାକ୍ତର ନିଯୁକ୍ତି ଦିଆଯାଉନାହିଁ। ଡା. ସତ୍ୟ ରଞ୍ଜନ ନନ୍ଦ ସୁପରିଣ୍ଟେଣ୍ଡେଣ୍ଟ ଦାୟିତ୍ୱରେ ଅଛନ୍ତି। ଡାକ୍ତରମାନେ ସପ୍ତାହକୁ ପାଳି କରି ମାତ୍ର ଦୁଇଦିନ କାମ କରି ଭୁବନେଶ୍ୱର ପଳାଇଯାଉଥିବା ଅଭିଯୋଗ ହେଉଛି। ଏମ୍ସର ଡାକ୍ତରୀ ଛାତ୍ରମାନଙ୍କ ଭରସାରେ ଏହି ସ୍ବାସ୍ଥ୍ୟକେନ୍ଦ୍ର ଚାଲିଛି। ପୂର୍ବରୁ କର୍ମଚାରୀ ଓ ଡାକ୍ତରଙ୍କ ପାଇଁ ବାଇଓମେଟ୍ରିକ ବ୍ୟବସ୍ଥା କରାଯାଇଥିଲେ ମଧ୍ୟ ତାହା ଅଚଳ ହୋଇପଡ଼ିଛି। ବିଭିନ୍ନ ସମୟରେ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ରରେ କାର୍ଯ୍ୟରତ ଡାକ୍ତରଙ୍କୁ ଡେପୁଟେସନରେ ଅଣାଯାଇ ଏଠାରେ କାର୍ଯ୍ୟ କରାଉଛନ୍ତି। ଫଳରେ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ର ଅଞ୍ଚଳର ଜନସାଧାରଣ ଅସୁବିଧାର ସମ୍ମୁଖୀନ ହେଉଛନ୍ତି। ତୁରନ୍ତ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଖାଲିପଡ଼ିଥିବା ପଦବୀ ପୂରଣ ଓ ବାଇଓମେଟ୍ରିକ ବ୍ୟବସ୍ଥାକୁ ସଚଳ କରିବା କରିବା ପାଇଁ ସ୍ଥାନୀୟ ଆଞ୍ଚଳିକ ବରିଷ୍ଠ ନାଗରିକ ମଞ୍ଚ ପକ୍ଷରୁ ଦାବି ହୋଇଛି।
