ଚେନ୍ନାଇ,୨୭ା୬: ତାମିଲନାଡୁ ମୁଖ୍ୟମନ୍ତ୍ରୀ ଥାଲାପତି ବିଜୟ ନିଜର ଏକ ପ୍ରମୁଖ ନିର୍ବାଚନୀ ପ୍ରତିଶ୍ରୁତି ପୂରଣ କରିବାକୁ ଯାଉଛନ୍ତି। ଏଣିକି ରାଜ୍ୟର ସମସ୍ତ ସରକାରୀ ମାତୃତ୍ୱ କେନ୍ଦ୍ର ଓ ମଙ୍ଗଳ ହସ୍ପିଟାଲରେ ଜନ୍ମଗ୍ରହଣ କରୁଥିବା ପ୍ରତ୍ୟେକ ଶିଶୁଙ୍କୁ ସରକାରଙ୍କ ପକ୍ଷରୁ ୧ ଗ୍ରାମର ସୁନା ମୁଦି ଉପହାର ସ୍ୱରୂପ ଦିଆଯିବ। ଯଦିଓ ଏହି ଯୋଜନା ଆନୁଷ୍ଠାନିକ ଭାବେ ସେପ୍ଟେମ୍ବର ୧୫ ରୁ ଆରମ୍ଭ ହେବ, କିନ୍ତୁ ଏହା ଜୁନ୍ ୨୨ (ମୁଖ୍ୟମନ୍ତ୍ରୀ ବିଜୟଙ୍କ ଜନ୍ମଦିନ) ଠାରୁ ଲାଗୁ ହେବ ବୋଲି ଧରାଯିବ। ବର୍ତ୍ତମାନର ସୁନା ମୂଲ୍ୟ ଅନୁଯାୟୀ, ପ୍ରତ୍ୟେକ ମୁଦିର ମୂଲ୍ୟ ପ୍ରାୟ ୧୩,୬୦୦ ଟଙ୍କା ହେବ।
ଏହି ଯୋଜନାର ସଫଳ ରୂପାୟନ, ତଦାରଖ ଏବଂ ପରିଚାଳନା ପାଇଁ ରାଜ୍ୟ ସରକାର ଏକ ସ୍ୱତନ୍ତ୍ର ‘ଷ୍ଟେଟ୍ ପ୍ରୋଜେକ୍ଟ ମ୍ୟାନେଜମେଣ୍ଟ ୟୁନିଟ୍’ ଗଠନ କରିବେ। ଏହି ଯୋଜନାର ନାମ ‘ଥାଇମାମନ୍ ଥାଙ୍ଗା ମୋଥିରମ୍ ଥିଟ୍ଟମ୍’ (Thaimaman Thanga Mothiram Thittam) ରଖାଯାଇଛି। ପୂର୍ବତନ ମୁଖ୍ୟମନ୍ତ୍ରୀ ସି. ଏନ୍. ଆନ୍ନାଦୁରାଇଙ୍କ ଜୟନ୍ତୀ ଅବସରରେ ଆସନ୍ତା ସେପ୍ଟେମ୍ବର ୧୫ ତାରିଖରେ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ଆନୁଷ୍ଠାନିକ ଭାବେ ଏହି କାର୍ଯ୍ୟକ୍ରମର ଶୁଭାରମ୍ଭ କରିବେ।
ଏହି ଅଭିନବ ଯୋଜନାଟି ତାମିଲ ସଂସ୍କୃତିର ପାରମ୍ପରିକ ପ୍ରଥା ‘ଥାଇମାମନ୍ ସୀର’ (Thaimaman Seer) ଉପରେ ଆଧାରିତ। ଏହି ପ୍ରଥା ଅନୁଯାୟୀ, ପରିବାରକୁ ଆସିଥିବା ନବଜାତ ଶିଶୁକୁ ସ୍ୱାଗତ କରିବା ପାଇଁ ମାମୁଁ (ମାଆଙ୍କ ଭାଇ) ଉପହାର ଦେଇଥାନ୍ତି।
ସରକାରୀ ନିର୍ଦ୍ଦେଶନାମା ଅନୁଯାୟୀ, ଏହି ଯୋଜନା ମାଧ୍ୟମରେ ସରକାର ରାଜ୍ୟର ସରକାରୀ ଚିକିତ୍ସାଳୟରେ ଜନ୍ମ ନେଉଥିବା ପ୍ରତ୍ୟେକ ଶିଶୁ ପାଇଁ ‘ମାମୁଁ’ର ଦାୟିତ୍ୱ ଗ୍ରହଣ କରୁଛନ୍ତି ଏବଂ ଶିଶୁକୁ ସ୍ୱାଗତ କରିବାର ପ୍ରତୀକ ସ୍ୱରୂପ ଏକ ସୁନା ମୁଦି ପ୍ରଦାନ କରୁଛନ୍ତି।
ଜୁନ୍ ୨୩ ରେ ଜାରି କରାଯାଇଥିବା ସରକାରୀ ନିର୍ଦ୍ଦେଶନାମାରେ କୁହାଯାଇଛି, “ସରକାରୀ ଅନୁଷ୍ଠାନରେ ପ୍ରତ୍ୟେକ ନବଜାତ ଶିଶୁକୁ ଦିଆଯାଉଥିବା ୧ ଗ୍ରାମର ସୁନା ମୁଦି ହେଉଛି ଆଦର ଏବଂ ସ୍ମୃତିର ଏକ ପ୍ରତୀକ। ‘ଥାଇମାମନ୍ ଥାଙ୍ଗା ମୋଥିରମ୍ ଥିଟ୍ଟମ୍’ ଜରିଆରେ ଏହା ମାତୃତ୍ୱର ଆନନ୍ଦ ଏବଂ ଗୁରୁତ୍ୱକୁ ଉତ୍ସବ ଭାବେ ପାଳନ କରେ।” ଏହି ଯୋଜନାକୁ ଚଳାଇବା ପାଇଁ ସରକାର ବାର୍ଷିକ ପ୍ରାୟ ୭୫୫.୮୩ କୋଟି ଟଙ୍କା ବ୍ୟୟବରାଦ କରିଛନ୍ତି।
