ଜଗତ୍ସିଂହପୁର, ୧୬ା୯(ପ୍ରମୋଦ କୁମାର ନାୟକ): ୨୦୨୪ ସାଧାରଣ ନିର୍ବାଚନ ପୂର୍ବରୁ ଜଗତ୍ସିଂହପୁର ଜିଲାରେ ରାଜନୈତିକ ଚର୍ଚ୍ଚା ଆରମ୍ଭ ହୋଇଯାଇଛି। ୨୦୧୯ ନିର୍ବାଚନରେ ଜିଲାର ୪ଟି ଯାକ ବିଧାନସଭା ଓ ଜଗତ୍ସିଂହପୁର ଏମ୍ପି ସିଟ୍ ବିଜେଡି ପୋଛି ନେଇଥିଲା। କଂଗ୍ରେସ ଓ ଭାଜପା ଗୋଟିଏ ବି ଆସନ ନ ପାଇ ଏକପ୍ରକାର ଦୁର୍ବଳ ସ୍ଥିତିକୁ ଚାଲିଯାଇଥିଲେ। କିନ୍ତୁ ଗତ ପୌର ନିର୍ବାଚନ ସମୟରେ କଂଗ୍ରେସ କେତେକାଂଶରେ ଆଶ୍ୱସ୍ତି ହୋଇଥିଲା। କାରଣ ଜଗତ୍ସିଂହପୁର ପୌରାଧ୍ୟକ୍ଷା ଆସନଟି କଂଗ୍ରେସ ହାତକୁ ଯାଇଥିଲା। ଉଭୟ ସାଧାରଣ ଓ ପୌର ନିର୍ବାଚନରେ ଭାଜପା ତୃତୀୟ ସ୍ଥାନରେ ଥିଲା। ମୋଟାମୋଟି ଦେଖିବାକୁ ଗଲେ ଜିଲାରେ ବିଜେଡି, କଂଗ୍ରେସ ଓ ଭାଜପାର ଭୋଟ ନିର୍ବାଚନମଣ୍ଡଳୀ ଅନୁଯାୟୀ କିଛିଟା ପରିବର୍ତ୍ତନ ଲକ୍ଷ୍ୟ କରାଯାଉଥିଲେ ସୁଦ୍ଧା ବିଜେଡି ସର୍ବାଧିକ ରହିଆସିଛି। ଏବେ ଆଉ ଏକ ନୂଆ ଦଳ ଅର୍ଥାତ୍ ମୋ ଦଳ ଆବିର୍ଭାବ ହେବା ନୂଆ ରାଜନୈତିକ ପରିବେଶ ସୃଷ୍ଟି କରିଛି। କାରଣ ସାମାଜିକ ସଙ୍ଗଠନ ଭାବେ ପରିଚିତ ନବ ନିର୍ମାଣ କୃଷକ ସଙ୍ଗଠନ ତା’ର ଏକ ନୂଆ ରାଜନୈତିକ ପୃଷ୍ଠଭୂମି ତିଆରି କରିଛି। ଅର୍ଥାତ୍ ନବ ନିର୍ମାଣ ସ୍ବରାଜ ସାମ୍ରାଜ୍ୟ ଗଠନ ଉଦ୍ଦେଶ୍ୟରେ ବିକଳ୍ପ ରାଜନୈତିକ ଦଳ ହିସାବରେ ମୋ ଦଳ ଆଗାମୀ ନିର୍ବାଚନରେ ମଇଦାନକୁ ଓହ୍ଲାଇବ ବୋଲି ଘୋଷଣା କରିଛି। ନିକଟରେ ସ୍ଥାନୀୟ ଏକ ମଣ୍ଡପ ପରିସରରେ ମୋ ଦଳର ଜିଲାସ୍ତରୀୟ ସାଙ୍ଗଠନିକ ବୈଠକ ଆନୁଷ୍ଠାନିକ ଭାବେ ଉଦ୍ଘାଟିତ ହୋଇଯାଇଛି। ଏଥିରେ ଦଳର ରାଜ୍ୟ କାର୍ଯ୍ୟକାରୀ ସଭାପତି ଅକ୍ଷୟ କୁମାର ଯୋଗଦେଇ ମୋ ଦଳ ଗଠନର ଆଭିମୁଖ୍ୟ ଉପରେ ବର୍ଣ୍ଣନା କରିଥିଲେ। ସେ କହିଥିଲେ, ନବ ନିର୍ମାଣ କୃଷକ ସଙ୍ଗଠନ ୧୩ ବର୍ଷ ଧରି ଚାଷୀ ଓ ଚାଷ ପାଇଁ ଲଢ଼ି ଆସୁଛି। ଚାଷୀଙ୍କୁ ପ୍ରାଇସ୍, ପ୍ରେଷ୍ଟିଜ୍ ଓ ପେନସନ୍ ଦିଆଯିବା ନେଇ ଆନ୍ଦୋଳନ କରି ଆସୁଛି। କିନ୍ତୁ ଦୁଃଖର କଥା ହେଲା ଯେତେବେଳେ ଚାଷୀ ଦାବି ଉପସ୍ଥାପନ ପାଇଁ ରାଜଧାନୀରେ ଆନ୍ଦୋଳନକୁ ଓହ୍ଲାଉଛନ୍ତି ସେତେବେଳେ ରାଜ୍ୟ ସରକାର ରୋକିବା ପାଇଁ ସମସ୍ତ ଉଦ୍ୟମ କରୁଛନ୍ତି। ଏପରି କି ଗିରଫ ସହ ନାନା ମାଧ୍ୟମରେ ଚାଷୀଙ୍କୁ ଅତ୍ୟାଚାର କରାଯାଉଛି। ଚାଷୀ ନିରାଶ ହୋଇପଡୁଛନ୍ତି। ଚାଷୀଙ୍କ ରାଜନୈତିକ ମେରୁଦଣ୍ଡ ନ ଥିବାରୁ ଏଭଳି ସ୍ଥିତି ସୃଷ୍ଟି ହେଉଛି। ରାଜ୍ୟର ୮୦ ଭାଗ ଚାଷୀଙ୍କ ଭୋଟ ମଧ୍ୟରୁ ଯେଉଁ ଦଳ ୨୫ ଭାଗ ହାତଉଛି ସେ ଦଳ ସରକାର ଗଢୁଛି। ତେଣୁ ଚାଷୀ ନିଜେ ସଙ୍ଗଠିତ ହୋଇ ମୋ ଦଳ ମାଧ୍ୟମରେ ନିଜର ପ୍ରତିନିଧିଙ୍କୁ ବିଧାନସଭା, ଲୋକ ସଭା ପଠାଇବ। ଆଗାମୀ ସାଧାରଣ ନିର୍ବାଚନରେ ଏହି ଦଳ ଓଡ଼ିଶାର ସମସ୍ତ ୧୪୭ ବିଧାନସଭା ଓ ୨୧ ଲୋକ ସଭା ଆସନରେ ପ୍ରାର୍ଥୀ ଦେବ। ଏହି ପ୍ରକ୍ରିୟା ମାଧ୍ୟମରେ ନବ ନିର୍ମାଣ ସ୍ବରାଜ ସାମ୍ରାଜ୍ୟ ଗଠନ ସମ୍ଭବ ବୋଲି ଅକ୍ଷୟ କହିଛନ୍ତି। ସେ ଏକଥା ମଧ୍ୟ କହିଛନ୍ତି, ମୋ ଦଳ କ୍ଷମତାକୁ ଆସିଲେ ସରକାର ଗଠନର ୨୪ ଘଣ୍ଟା ମଧ୍ୟରେ ବାର୍ଦ୍ଧକ୍ୟ ଭତ୍ତା ୨ ହଜାର ଟଙ୍କାକୁ ବୃଦ୍ଧି କରିବ। ଧାନ କୁଇଣ୍ଟାଲ ୩୪୦୦ ଟଙ୍କା, ୨୦ବର୍ଷ ବୟସରୁ ଚାଷୀ ସୁରକ୍ଷା ଭତ୍ତା ୫୦୦୦ ଟଙ୍କା ହିସାବରେ ଦିଆଯିବା ନେଇ ଅଧ୍ୟାଦେଶ ଜାରି କରାଯିବ। ଏଥିସହ ଓଡ଼ିଶାକୁ ମଦ ମୁକ୍ତ, ଦାଦନ ମୁକ୍ତ, ବେକାରି ମୁକ୍ତ କରାଯିବା ସହ ମାଫିଆଙ୍କୁ ଜେଲ ପଠାଯିବାର ବ୍ୟବସ୍ଥା ହେବ। ବୈଠକରେ ରାଜ୍ୟ ସାଧାରଣ ସମ୍ପାଦକ ଭାବେ ରଶ୍ମିରଞ୍ଜନ ସ୍ବାଇଁ, ଉମାକାନ୍ତ ଭରତ, ରାଜ୍ୟ ସମ୍ପାଦକ ଦେବୀ ପ୍ରସାଦ ମହାରଣା, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଅରୁଣ କୁମାର ମହାପାତ୍ର, ଜିଲା ସଂଯୋଜକ ଭାବେ ଦୁର୍ଗାଚରଣ ସ୍ବାଇଁଙ୍କୁ ନିଯୁକ୍ତି ଦିଆଯାଇଥିବା ଘୋଷଣା କରାଯାଇଥିଲା। ଏହି ବୈଠକ ପରେ ଜିଲାରେ ରାଜନୈତିକ ଚର୍ଚ୍ଚା ଜୋର ଧରିଛି। ୨୦୧୯ ନିର୍ବାଚନରେ କଂଗ୍ରେସ ପ୍ରାର୍ଥୀ ଚିରଞ୍ଜୀବ ବିଶ୍ୱାଳ ହାରିଯିବା ପରଠାରୁ ନିର୍ବାଚନ ମଣ୍ଡଳୀଠାରୁ ସେ ଏକପ୍ରକାର ଦୂରତ୍ୱ ଅବଲମ୍ବନ କରୁଛନ୍ତି। ଅନେକ ସମୟରେ ସେ ବିଜେଡିରେ ଯୋଗଦେବେ ବୋଲି ଚର୍ଚ୍ଚା ହୋଇଆସୁଛି। ସେ ଏହାକୁ ଖଣ୍ଡନ କରୁଥିଲେ ସୁଦ୍ଧା କିଛିଦିନ ପୂର୍ବରୁ ରାଜଧାନୀରେ ଜାନକୀ ବସନ୍ତ ସ୍ବର୍ଣ୍ଣିମ ଯୁଗକୁ ନେଇ ହୋଇଥିବା ଆଲୋଚନାଚକ୍ରରେ ବିବାଦୀୟ ବୟାନ ଦେଇ ଦଳରୁ ନିଲମ୍ବିତ ହୋଇଛନ୍ତି। ପାରାଦୀପ କଂଗ୍ରେସ ନେତା ଅରିନ୍ଦମ ସର୍ଖେଲ ମଧ୍ୟ ଗତ ନିର୍ବାଚନ ପରଠାରୁ ଦଳୀୟ ସାଙ୍ଗଠନିକ କାର୍ଯ୍ୟରୁ ଦୂରେଇ ରହୁଛନ୍ତି। ଭାଜପାରେ ମଧ୍ୟ ନେତୃତ୍ୱକୁ ନେଇ ଟଣାଓଟରା ଆରମ୍ଭ ହୋଇଯାଇଛି। ଏ ପରିସ୍ଥିତିରେ ମୋ ଦଳ ଭୋଟରଙ୍କୁ କେତେ ପ୍ରଭାବିତ କରୁଛି ତାହା ଦେଖିବା ବାକି ରହିଲା।
