ଡେରାବିଶ, ୧୬ା୯(ବେବର୍ତ୍ତା ଅଜୟ ଦାସ): ୩ ଦଫା ଦାବି ନେଇ ଡେରାବିଶ ଶିକ୍ଷା ସର୍କଲ ଅନ୍ତର୍ଗତ ବିଭିନ୍ନ ବିଦ୍ୟାଳୟର ଶିକ୍ଷକମାନେ ଆନ୍ଦୋଳନରେ ସାମିଲ ହୋଇଛନ୍ତି। ଫଳରେ ପ୍ରାଥମିକ ବିଦ୍ୟାଳୟଗୁଡିକରେପାଠ ପଢା ଏକ ପ୍ରକାର ବନ୍ଦ ହୋଇଯାଇଛି। ଏହି ସର୍କଲ ଅନ୍ତର୍ଗତ ସମୁଦାୟ ୧୪୩ଟି ପ୍ରାଥମିକ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀଯାଏ ରହିଛି। ଶୁକ୍ରବାର ଏହି ବିଦ୍ୟାଳୟକୁ ଶିକ୍ଷକମାନେ ନ ଆସିବା ଯୋଗୁ ଏଥି ମଧ୍ୟରୁ ୨୬ ଟି ବିଦ୍ୟାଳୟ ସମ୍ପୂର୍ଣ୍ଣ ବନ୍ଦ ହେବା ସହ ତାଲା ଝୁଲୁଛି। ଯେଉଁଥିପାଇଁ ଦୈନିକ ଏହି ବିଦ୍ୟାଳୟକୁ ଛାତ୍ରୀଛାତ୍ରମାନେ ପଢ଼ିବା ପାଇଁ ଆସି ଘରକୁ ଫେରିଛନ୍ତି। ଏ ନେଇ ଛାତ୍ର ଅଭିଭାବକଙ୍କ ମହଲରେ ଅସନ୍ତୋଷ ଦେଖାଦେଇଛି। ଅଭିଭାବକ ଅକ୍ଷୟ କୁମାର ବିଶ୍ୱାଳ ଓ ବିକ୍ରମ ଚରଣ କାଣ୍ଡି କହିଛନ୍ତି, ଶିକ୍ଷକମାନଙ୍କ ଆନ୍ଦୋଳନ ଯଥାର୍ଥ ହୋଇପାରେ। ମାତ୍ର ଆନ୍ଦୋଳନ ପାଇଁ ବିକଳ୍ପ ବ୍ୟବସ୍ଥା କରା ନ ଯାଇ ବିଦ୍ୟାଳୟ ବନ୍ଦ କରି ଦିଆଯିବା ଦ୍ୱାରା ପିଲାଙ୍କ ପାଠପଢ଼ାରେ ଯେଉଁ ବ୍ୟାଘାତ ଘଟିଲା ତାକୁ ଭରଣା କରିବ କିଏ। ଏ ବିଷୟରେ ନିଖିଳ ଉତ୍କଳ ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘର ବ୍ଲକ ସଭାପତି ଅଶୋକ କୁମାର ମହାପାତ୍ରଙ୍କୁ ପଚାରିବାରେ ଶିକ୍ଷମାନଙ୍କ ଦାବି ପୂରଣ ନ ହେବା ଯାଏ ଆନ୍ଦୋଳନରୁ ଚାଲିବ। ପିଲାଙ୍କ ବନ୍ଦ ରହିଥିବା ପାଠପଢ଼ା ପାଇଁ କିଏ ଦାୟୀ ରହିବ ବୋଲି ପଚାରିବାରୁ ସରକାର ବୋଲି ସେ କହିଛନ୍ତି। ଏ ନେଇ ବ୍ଲକ ଶିକ୍ଷାଧିକାରୀ ଶ୍ରୀକାନ୍ତ ବେହେରାଙ୍କୁ ପଚାରିବାରେ ବନ୍ଦ ରହିଥିବା ବିଦ୍ୟାଳୟରେ ଶନିବାରଠାରୁ ପାଖରେ ଥିବା ହାଇସ୍କୁଲ ଓ ଆନ୍ଦୋଳନରେ ସାମିଲ ହୋଇ ନ ଥିବା ଶିକ୍ଷକ ସମ୍ପୃକ୍ତ ବିଦ୍ୟାଳୟକୁ ଯାଇ ପିଲାଙ୍କୁ ପାଠ ପଢ଼ାଇବା ପାଇଁ ବିକଳ୍ପ ବ୍ୟବସ୍ଥା କରାଯାଇଛି। ଏ ବିଷୟରେ ଶିକ୍ଷା ସର୍କଲ ଅଧୀନରେ ଥିବା ସମସ୍ତ କ୍ଲାଷ୍ଟରର ସିଆର୍ସିସିଙ୍କୁ ପିଲାଙ୍କ ପାଠପଢ଼ା ଯେପରି ବନ୍ଦ ନ ହୁଏ ସେ ଦିଗରେ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି। ହେଲେ କେତେଜଣ ସିଆର୍ସିସି ନିଜ ନାମକୁ ଗୋପନ ରଖି ବର୍ତ୍ତମାନ ବହୁ ଶିକ୍ଷକ ପଦବୀ ଖାଲି ପଡ଼ିଥିବା ବେଳେ ବନ୍ଦ ଥିବା ବିଦ୍ୟାଳୟରେ କେଉଁଠୁ ଶିକ୍ଷକ ଆଣି ପଢ଼ା ହେବ ତାହା ପ୍ରଶ୍ନବାଚୀ ସୃଷ୍ଟି ହୋଇଛି ବୋଲି କହିଥିଲେ। ତେବେ ବନ୍ଦ ଥିବା ୨୬ଟି ବିଦ୍ୟାଳୟରେ ମଧ୍ୟାହ୍ନ ଭୋଜନ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ତେବେ ଶନିବାରଠାରୁ ବନ୍ଦ ଥିବା ବିଦ୍ୟାଳୟଗୁଡ଼ିକ ଖୋଲି ସେଠାରେ ପାଠପଢ଼ା ଯିବା ସହ ମଧ୍ୟାହ୍ନ ଭୋଜନ କାର୍ଯ୍ୟକ୍ରମ ଚାଲୁ ରହିବ ବୋଲି ସାଧନ କେନ୍ଦ୍ର ସଂଯୋଜକ ଖଗେଶ୍ୱର ନାୟକ କହିଛନ୍ତି।
