ସମ୍ବଲପୁର,୩୧ା୩(ବ୍ୟୁରୋ): ସମ୍ବଲପୁର ଜିଲା ପର୍ଯ୍ୟବେକ୍ଷକ ଭାବେ ଯାଜପୁର ବିଧାୟକ ତଥା ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ (ବବି) ନିଯୁକ୍ତି ପାଇବା ପରେ ଜିଲା ବିଜେଡି ଶିବିର ଚଳଚଞ୍ଚଳ ହୋଇପଡିଛି। ଏପ୍ରିଲ ୭ରେ ବବି ସମ୍ବଲପୁର ଗସ୍ତରେ ଆସିବା ନେଇ ଚର୍ଚ୍ଚା ହେଉଛି। ପର୍ଯ୍ୟବେକ୍ଷକ ଭାବେ ନିଯୁକ୍ତି ପାଇବା ପରେ ଜିଲାକୁ ବବିଙ୍କ ପ୍ରଥମ ରାଜନୈତିକ ଗସ୍ତ ହେବ। ତେଣୁ ଜିଲାରେ ବିଜେଡି କର୍ମକର୍ତ୍ତା ସମରସଜ୍ଜା କରୁଥିବା ଦେଖାଯାଇଛି। ୫ହଜାରରୁ ଊର୍ଦ୍ଧ୍ୱ କର୍ମକର୍ତ୍ତାଙ୍କୁ ନେଇ ବାଇକ୍ ରାଲି, ଶୋଭାଯାତ୍ରା, ସାଧାରଣ ସଭା କରିବାକୁ ଦଳ ଯୋଜନା କରିଛି। ଏଥିପାଇଁ ଜିଲାର କେତେଜଣ ଯୁବ ଓ ନବାଗତ ନେତାଙ୍କୁ ଦାୟିତ୍ୱ ଦିଆଯାଇଛି। ରେଢାଖୋଲ ନିର୍ବାଚନ ମଣ୍ଡଳୀ, କୁଚିଣ୍ଡା ନିର୍ବାଚନ ମଣ୍ଡଳୀ, ରେଙ୍ଗାଲି ନିର୍ବାଚନ ମଣ୍ଡଳୀରେ ନବାଗତଙ୍କୁ ଦାୟିତ୍ୱ ଦିଆଯାଇଥିବା ବେଳେ ସମ୍ବଲପୁର ବିଧାନସଭା ପାଇଁ ଜଣେ ବରିଷ୍ଠ ନେତାଙ୍କୁ ଦାୟିତ୍ୱ ଦିଆଯାଇଛି।
ଦଳରେ ନବାଗତଙ୍କୁ ଦାୟିତ୍ୱ ଦିଆଯିବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି। ସେମାନେ ନିଜ ଅଞ୍ଚଳର ସଂଗଠକ ଓ କର୍ମକର୍ତ୍ତାଙ୍କ ସହ ଯୋଗଯୋଗ କରୁଛନ୍ତି। ବାଇକ୍ ରାଲି ପାଇଁ ଅଧିକ ସଂଖ୍ୟାରେ ଯୁବ କର୍ମକର୍ତ୍ତାଙ୍କୁ ସାମିଲ କରିବାକୁ ଚେଷ୍ଟା ଚଳାଇଛନ୍ତି। ଯୁବବର୍ଗ ମଧ୍ୟ ବେଶ୍ ଉତ୍ସାହିତ ଥିବା ଦେଖିବାକୁ ମିଳିଛି। ବାଇକ୍ ରାଲି କେଉଁଠାରୁ ଆରମ୍ଭ ହେବ, କେଉଁ ରାସ୍ତା ଦେଇ ଯିବ, ସଭା କେଉଁଠାରେ ହେବ ଓ ଚୂଡାନ୍ତ କାର୍ଯ୍ୟକ୍ରମ ତାଲିକା ଖୁବ୍ଶୀଘ୍ର ଆଲୋଚନା ପରେ ଜଣାପଡିବ। ଜିଲାରେ ବିଗତ କେତେବର୍ଷ ହେବ ଦଳୀୟ ସଂଗଠନ ଜଣଙ୍କ ନେତୃତ୍ୱରେ ରହୁ ନ ଥିବା ଭଳି ଜଣାପଡୁଛି। ଦଳୀୟ ଟିକେଟ, ବ୍ୟକ୍ତିଗତ ସ୍ବାର୍ଥ, ବ୍ୟବସାୟିକ ସ୍ବାର୍ଥ ଆଦି କାରଣ ଯୋଗୁ ନେତାମାନଙ୍କ ମଧ୍ୟରେ ମତାନ୍ତର, ମନାନ୍ତର ଦେଖିବାକୁ ମିଳିଛି। ଏବେ ସମସ୍ତଙ୍କୁ ଏକାଠି କରି ଦଳୀୟ ସଂଗଠନକୁ ଆଗେଇନେବା ବବିଙ୍କ ପାଇଁ ବଡ ଚ୍ୟାଲେଞ୍ଜ ହେବ ବୋଲି କୁହାଯାଉଛି। ଏହାଭିତରେ ଝାରସୁଗୁଡା ଉପନିର୍ବାଚନ ତାରିଖ ଘୋଷଣା ହେବା ପରେ ଦଳୀୟ ନେତାମାନଙ୍କ ଚିନ୍ତା ବଢିଯାଇଛି। ଏଭଳି ସମୟରେ ବବିଙ୍କ ଗସ୍ତ ସମ୍ବଲପୁର ପାଇଁ କ’ଣ ସଙ୍କେତ ଓ ଲାଭ ଦେବ ସମୟ କହିବ ବୋଲି ରାଜନୈତିକ ମହଲରେ ଆଲୋଚନା ହେଉଛି। ହେଲେ ଏହି ଗସ୍ତ ସମୟରେ କେଉଁ ନେତା, ମନ୍ତ୍ରୀ ଉପସ୍ଥିତ ରହିବେ ତାହା ସ୍ଥିର କରାଯାଇ ନ ଥିବା ଜଣାପଡିଛି। ଅନ୍ୟପଟେ ଦଳର ଜିଲା ସଭାପତି ସିଦ୍ଧାର୍ଥ ଦାସ କହିଛନ୍ତି, ପର୍ଯ୍ୟବେକ୍ଷକ ବବି ଦାସଙ୍କ ଗସ୍ତକୁ ନେଇ ଦଳୀୟ ଭାବେ ସେଭଳି ବିଧିବଦ୍ଧ ସୂଚନା ଆସି ନାହିଁ। ସୂଚନା ଆସିଲେ ନିଶ୍ଚିତ ଭାବେ ପ୍ରସ୍ତୁତି କରାଯିବ ବୋଲି ସେ କହିଥିଲେ।
