ଓ୍ବାଶିଂଟନ/ନୂଆଦିଲ୍ଲୀ,୯।୧୧: ଆମେରିକାରେ ଜୋ ବାଇଡେନ୍ଙ୍କ ସରକାର ଗଠନ ହେଲେ ୯ ମୂଳ ଭାରତୀୟ ସ୍ଥାନ ପାଇବାର ଆଶା ରହିଛି। ବାଇଡେନ୍ଙ୍କ ପ୍ରଶାସନିକ ଟିମ୍ରେ ସେମାନଙ୍କୁ ସ୍ଥାନ ମିଳିବା ନେଇ ଚର୍ଚ୍ଚା ଜାରି ରହିଛି। ଡ. ବିବେକ ମୂର୍ତ୍ତିଙ୍କୁ କରୋନା ମହାମାରୀ ସଙ୍କଟ ସହିତ ଲଢ଼େଇ କାର୍ଯ୍ୟରେ ମୁଖ୍ୟ ଭାବେ ନିୟୋଜିତ କରାଯିବାର ସମ୍ଭାବନା ରହିଛି। ତାଙ୍କୁ ବାଇଡେନ୍ଙ୍କ ଶିବିରରୁ ଏନେଇ ସୂଚନା ମଧ୍ୟ ଜାରି କରାଯାଇଥିବା କୁହାଯାଉଛି। ବିବେକ ପୂର୍ବତନ ରାଷ୍ଟ୍ରପତି ବାରା ଓବାମାଙ୍କ ସରକାରରେ ସର୍ଜନ ଜେନେରାଲ ଭାବେ କାର୍ଯ୍ୟ କରୁଥିଲେ। ସେହିପରି ଆର୍ଥିକ କ୍ଷେତ୍ରରେ ବାଇଡେନ୍ଙ୍କୁ ପରାମର୍ଶ ଦେବା ପାଇଁ ଗଠନ ହୋଇଥିବା ଟିମ୍ରେ ମୂଳ ଭାରତୀୟ ରାଜ ଚେଟ୍ଟି ରହିବା ନେଇ ଆଲୋଚନା ହେଉଛି। ଚେଟ୍ଟି କୌଣସି ଗୁରୁତ୍ୱପୂର୍ଣ୍ଣ ପଦବୀ ମିଳିବାର ଆଶା ରହିଛି। ଅମିତ ଜାନି ବାଇଡେନ୍ଙ୍କର ପଲ୍ଟିକାର କ୍ୟାମ୍ପେନର ଭାବେ କାର୍ଯ୍ୟ କରୁଥିଲେ। ତାଙ୍କ ଯୋଗୁ ବାଇଡେନ୍ଙ୍କ ବିଜୟ ପଥ ସହଜ ହୋଇଥିବା କୁହାଯାଉଛି। ଅମିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ମଧ୍ୟ ଜଣେ ସମର୍ଥକ। ଅମିତଙ୍କୁ ବାଇଡେନ୍ଙ୍କ ପ୍ରଶାସନିକ ଟିମ୍ରେ ଗୁରୁତ୍ୱପୂର୍ଣ୍ଣ ସ୍ଥାନ ମିଳିବା ନେଇ ଚର୍ଚ୍ଚା ହେଉଛି। ସେହିପରି ବାଇଡେନ୍ଙ୍କ ପାଇଁ ଭାଷଣ ପ୍ରସ୍ତୁତ କରୁଥିବା ବିନୟ ରେଡ୍ଡୀଙ୍କୁ ଗୁରୁତ୍ୱପୂର୍ଣ୍ଣ ପଦବୀ ମିଳିବାର ସମ୍ଭାବନା ରହିଛି। ବାଇଡେନ୍ ଏବଂ କମଳା ହାରିସ୍ଙ୍କ ଲାଗି ଭାରତୀୟଙ୍କ ସମର୍ଥନ ଜୁଟାଇ ଥିବା ସଞ୍ଜିବ ଯୋଶୀପୁରାଙ୍କୁ ମଧ୍ୟ ଟିମ୍ରେ ସ୍ଥାନ ମିଳିବ ବୋଲି କୁହାଯାଉଛି। କମଳା ହାରିସ୍ଙ୍କ ପ୍ରେସ୍ ସଚିବ ସବରିନା ସିଂଙ୍କୁ ଏହି ଟିମ୍ରେ ସ୍ଥାନ ମିଳିବା ଆଶା ଉଜ୍ଜଳ ରହିଥିବା ନେଇ ଚର୍ଚ୍ଚା ହେଉଛି। ଅନ୍ୟମାନଙ୍କ ମଧ୍ୟରେ ସୋନଲ ଶାହା, ଗୌତମ ରାଘବନ ଏବଂ ବନିତା ଗୁପ୍ତା ପ୍ରଶାସନିକ ଟିମ୍ରେ ସ୍ଥାନ ପାଇବେ ବୋଲି ଚର୍ଚ୍ଚା ଜାରି ରହିଛି।
