ଝାରସୁଗୁଡ଼ା/ଭୁବନେଶ୍ୱର,୧୯ା୧(ଆଶିଷ ରଞ୍ଜନ ଦାଶ/ସୁନିତ୍ ମିଶ୍ର): ନବ ଦାସ ହତ୍ୟାକାଣ୍ଡ ନେଇ ରାଜ୍ୟ ଫରେନସିକ ସାଇନ୍ସ ରିପୋର୍ଟରେ ସାଙ୍ଘାତିକ ତଥ୍ୟ ସାମନାକୁ ଆସିଛି। ଏହି ରିପୋର୍ଟ ଅନୁଯାୟୀ ନବ ଦାସଙ୍କ ପଛରେ ଆସୁଥିବା ଗାଡ଼ିର ବାମ ପାର୍ଶ୍ୱରେ ୫ଟି ଗୁଳି ବାଜିଥିଲା। ଗାଡ଼ିରେ ବାଜିଥିବା ଗୁଳି ଓ ଖୋକା କୁଆଡ଼େ ଗଲା ତାହା କ୍ରାଇମବ୍ରାଞ୍ଚ ରିପୋର୍ଟରେ ଉଲ୍ଲେଖ କରାଯାଇନାହିଁ। କ୍ରାଇମବ୍ରାଞ୍ଚ କେବଳ ନବ ଦାସ ଓ ତାଙ୍କ ଗାଡ଼ିରେ ବାଜି ଥିବା ଗୁଳିର ହିସାବ ଦେଇ ତା’ର କାମ ସାରିଦେଇଛି। କ୍ରାଇମବ୍ରାଞ୍ଚ ରିପୋର୍ଟ କହୁଛି ଯେ ଗୋପାଳ ଦାସଙ୍କ ପାଖରୁ ୧୮ଟି ଜୀବନ୍ତ ଗୁଳି ଥିବା ମାଗାଜିନ ଓ ବାହାରେ ରଖିଥିବା ୩ଟି ଜୀବନ୍ତ ଗୁଳି ଜବତ ହୋଇଥିବା ବେଳେ ଗୋଟିଏ ଗୁଳି ଉପରକୁ ବ୍ଲାଙ୍କ୍ ଫାୟାରିଂ ହୋଇଥିଲା। ତାହା ହେଲେ ନବଙ୍କ ପଛପଟେ ଆସୁଥିବା ଗାଡ଼ିରେ ବାଜିଥିବା ଗୁଳି କିଏ ଫୁଟାଇଲା ଓ ତାହା କୁଆଡ଼େ ଗଲା ବୋଲି କୁହାଯାଉଛି। ଏଥିରୁ ସନ୍ଦେହ ପ୍ରକାଶ ପାଉଛି ଯେ ନବଙ୍କ ହତ୍ୟାରେ ୨ଟି ବନ୍ଧୁକ ବ୍ୟବହାର ହୋଇଥିବା ବେଳେ ଗୋପାଳଙ୍କ ବ୍ୟତୀତ ଅନ୍ୟ ବ୍ୟକ୍ତି ମଧ୍ୟ ଏହି ହତ୍ୟାକାଣ୍ଡରେ ଜଡ଼ିତ ଅଛନ୍ତି।
ହତ୍ୟା ମାମଲାରେ ସମ୍ବଲପୁର ବିଧାୟକ ଜୟନାରାୟଣ ମିଶ୍ର କହିଛନ୍ତି ଯେ ନବଙ୍କ ଝିଅ ତଥା ପୂର୍ବତନ ବିଧାୟିକା ଦୀପାଳି ଦାସ ଯଦି କ୍ରାଇମବ୍ରାଞ୍ଚ ତଦନ୍ତ ଠିକ୍ ହେଉନାହିଁ ବୋଲି ଭାବୁଛନ୍ତି, ସେ ହାଇକୋର୍ଟ କିମ୍ବା ମୁଖ୍ୟମନ୍ତ୍ରୀଙ୍କୁ ସିବିଆଇ ତଦନ୍ତ ପାଇଁ ଲେଖିବା ଉଚିତ। ତତ୍କାଳୀନ କ୍ରାଇମବ୍ରାଞ୍ଚ ଅନୁସନ୍ଧାନ ସନ୍ଦେହଜନକ ଥିଲା ବୋଲି ଜୟନାରାୟଣ କହିଛନ୍ତି। ସେପଟେ କଂଗ୍ରେସର ବରିଷ୍ଠ ନେତା ନରସିଂହ ମିଶ୍ର କହିଛନ୍ତି ଯେ ନବ ଦାସ ପ୍ରଥମେ ଜଣେ ବ୍ୟବସାୟୀ ପରେ ଜଣେ ନେତା। ତାଙ୍କର ବ୍ୟବସାୟକୁ ନେଇ ବିଜେଡି ଦଳର ବହୁ ଲୋକଙ୍କ ସହିତ ମଧ୍ୟ ଝଗଡ଼ା ହୋଇଥିଲା। ତାଙ୍କ ହତ୍ୟା ବ୍ୟବସାୟିକ, ରାଜନୈତିକ, ତଥା ବ୍ୟକ୍ତିଗତ ହୋଇପାରେ। ସିବିଆଇ ତଦନ୍ତ ନେଇ ନରସିଂହ କହିଛନ୍ତି ଯେ ସରକାରୀ ଦଳ ନବଙ୍କ ଝିଅଙ୍କୁ ଲିଖିତ ଆକାରରେ ସିବିଆଇ ତଦନ୍ତ ପାଇଁ ମୁଖ୍ୟମନ୍ତ୍ରୀଙ୍କୁ ଦେବା ପାଇଁ କହୁଥିବା କଥାର କିଛି ଦରକାର ନାହିଁ। ଭାଜପା ସରକାର ଆସିବା ପୂର୍ବରୁ ନବଙ୍କ ସିବିଆଇ ତଦନ୍ତ କରିବା ନିର୍ବାଚନ ପ୍ରଚାର ସମୟରେ କହିଥିଲେ। ସରକାର ଚାହିଁଲେ ନିଜେ ତଦନ୍ତ କରାଇ ପାରିବେ। ଦିନକୁ ଦିନ ନବ ଦାସଙ୍କ ହତ୍ୟା ଘଟଣା ନେଇ ନୂଆ ତଥ୍ୟ ସାମ୍ନାକୁ ଆସୁଥିବା ବେଳେ କ୍ରାଇମବ୍ରାଞ୍ଚ ତଦନ୍ତ ପ୍ରତି ଓଡ଼ିଶାବାସୀଙ୍କ ସନ୍ଦେହ ସୃଷ୍ଟି ହେଲାଣି ବୋଲି ନରସିଂହ କହିଛନ୍ତି।
ଅନ୍ୟପକ୍ଷରେ ଖାଦ୍ୟ ଓ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଏହି ଘଟଣାରେ ପ୍ରତିକ୍ରିୟା ରଖି କହିଛନ୍ତି ଯେ ଯେତେବେଳେ ନବ ଦାସଙ୍କ ମୃତ୍ୟୁ ହେଲା ତାଙ୍କ ଝିଅ ଦୀପାଳି ଚୁପ୍ ରହିଲେ ଓ କିଛି କହିଲେ ନାହିଁ। ବିଧାୟକ ଟିକେଟ ପାଇଁ ସେ ଆଶାୟୀ ରହିଲେ ଓ ବିଧାୟିକା ହେବା ପରେ ମଧ୍ୟ ନୀରବ ରହିଲେ ବୋଲି କୃଷ୍ଣ କହିଛନ୍ତି। ରାଜ୍ୟରେ ଭାଜପା ସରକାର ଆସିବା ପରେ ସେ ଏବେ ଆଳୁ ଖୋଳୁଛନ୍ତି। ଆଳୁ ଖୋଳିଲେ ନିଶ୍ଚିତ ଭାବେ ମହାଦେବ ବାହାରିବେ। କିଏ ଖୋଳୁଛନ୍ତି ଆଉ କିଏ ସହଯୋଗ କରୁଛନ୍ତି ତାହା ଦେଖାଯିବ ବୋଲି ମନ୍ତ୍ରୀ କହିଛନ୍ତି। ସେ ଆହୁରି କହିଛନ୍ତି ନବ ଦାସଙ୍କ ମୃତ୍ୟୁ ପଛରେ ଯିଏ ଅଛନ୍ତି, ସେ ଧରାପଡ଼ିବା ଉଚିତ। ଦୋଷୀ କିଏ ସାଧାରଣ ନାଗରିକ ଜାଣିବା ଦାରକାର। ଦୋଷୀ କିଏ ତାଙ୍କୁ ସେମାନେ ଚାପିଦେବାକୁ ଚେଷ୍ଟା କରିଥିଲେ। କିନ୍ତୁ ଆମ ସରକାର ନିଶ୍ଚୟ କିଛି କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ତାଙ୍କର ବିଶ୍ୱାସ ଅଛି ବୋଲି ମନ୍ତ୍ରୀ କହିଛନ୍ତି।
