ଦୁବାଇ, ୧୫ା୧୨ (ପି.ଟି.)-ଅଷ୍ଟ୍ରେଲିଆରେ ହେବାକୁଥିବା ଟି୨୦ ବିଶ୍ୱକପ୍ ୨୦୨୨ର ୧୫ଟି ସ୍ଥାନ ପାଇଁ ଲଢେଇ କରିବେ ୮୬ଟି ଟିମ୍। ୧୩ ମାସ ଧରି ଖେଳାଯିବ ୨୨୫ ମ୍ୟାଚ। ଏହା ଆସନ୍ତାବର୍ଷ ଏପ୍ରିଲରେ ଆରମ୍ଭ ହେବ ବୋଲି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ତରଫରୁ ସୋମବାର ଘୋଷଣା କରାଯାଇଛି। ୪ ପାଦ ବିଶିଷ୍ଟ କ୍ୱାଲିଫାଇଂ ପ୍ରକ୍ରିୟା ଜରିଆରେ ୧୫ଟି ସ୍ଥାନ ନିରୂପିତ ହେବ। କୋଭିଡ୍-୧୯ ମହାମାରୀ ଯୋଗୁ ୫ଟି ଅଞ୍ଚଳରେ ୧୧ଟି ରିଜିଓନାଲ କ୍ୱାଲିଫିକେଶନ ଟୁର୍ନାମେଣ୍ଟ ୨୦୨୧ରେ ଅନୁଷ୍ଠିତ ହେବ। ପୁରୁଷ ଟି୨୦ ବିଶ୍ୱକପ୍ ଯୋଗ୍ୟତା ପାଇଁ ପ୍ରଥମ ଥର ହଙ୍ଗେରୀ, ରୋମାନିଆ ଓ ସର୍ବିୟା ପ୍ରତିଯୋଗିତାରେ ଅବତୀର୍ଣ୍ଣ ହେବେ। ଫିନ୍ଲାଣ୍ଡ ପ୍ରଥମଥର ଏକ ଆଇସିସି ଇଭେଣ୍ଟ ଆୟୋଜନ କରିବାକୁ ଯାଉଛି। ଜାପାନ ମଧ୍ୟ ପ୍ରଥମ ଥର ଏକ ପୁରୁଷ ଟି୨୦ ବିଶ୍ୱକପ୍ କ୍ୱାଲିଫାୟର ଆୟୋଜନ କରିବ। ଆଞ୍ଚଳିକ ସ୍ତରରେ ୬୭ ସହଯୋଗୀ ସଦସ୍ୟ ଅଂଶଗ୍ରହଣ କରିବେ। ଆଫ୍ରିକା ଓ ୟୁରୋପରେ ଅଂଶଗ୍ରହଣକାରୀଙ୍କ ସଂଖ୍ୟା ଅଧିକ ରହିଥିବାରୁ ଉଭୟ ଅଞ୍ଚଳରେ ସବ୍ ରିଜିଓନାଲ କ୍ୱାଲିଫାୟର୍ସ ହେବ। ତାପରେ ଅଞ୍ଚଳରେ ଏକ ଫାଇନାଲ କ୍ୱାଲିଫାୟର ହେବ। ଆଫ୍ରିକା, ଆମେରିକା, ଇଏପି (ଇଷ୍ଟ ଏସିଆ ଓ ପ୍ୟାସିଫିକ୍) ଓ ୟୁରୋପରେ ଗୋଟିଏ ଲେଖାଏଁ ଟପ୍ ଟିଅର ରିଜିଓନାଲ କ୍ୱାଲିଫାୟର ଏବଂ ଏସିଆରେ ଏ’ ଓ ବି’ରୁ ଦୁଇଟି ୮ଦଳ ବିଶିଷ୍ଟ ଗ୍ଲୋବାଲ କ୍ୱାଲିଫାୟର୍ସକୁ ଉନ୍ନୀତ ହେବେ। ଗ୍ଲୋବାଲ କ୍ୱାଲିଫାୟର୍ସରେ ଉପଲବ୍ଧ ୧୬ଟି ସ୍ଥାନ ଉପଲବ୍ଧ। ଆଫ୍ରିକା ଓ ଇଏପି କ୍ୱାଲିଫାୟରରୁ ଗୋଟିଏ ଲେଖାଏଁ ଟିମ୍ ଏଥିରେ ରହିବେ। ସେମାନଙ୍କ ସହ ଆମେରିକା ଓ ୟୁରୋପ କ୍ୱାଲିଫାୟର୍ସରୁ ଦୁଇଟି ଲେଖାଏଁ ଦଳ ଯୋଗଦେବେ। ଟି୨୦ ବିଶ୍ୱକପ୍ ୨୦୨୧ ଷ୍ଟାଣ୍ଡିଂ ଶେଷ ୪ଟି ଦଳ ଏବଂ ଆଇସିସି ପୁରୁଷ ଅନ୍ତର୍ଜାତୀୟ ଟି୨୦ ଟିମ୍ ର଼୍ୟାଙ୍କିଙ୍ଗକୁ ଭିତ୍ତି କରି ନେପାଳ, ସିଙ୍ଗାପୁର, ୟୁଏଇ ଏବଂ ଜିମ୍ବାଓ୍ବେକୁ ନେଇ ଅବଶିଷ୍ଟ ୮ଟି ସ୍ଥାନ ପୂରଣ ହେବ। ଦୁଇଟି ଗ୍ଲୋବାଲ କ୍ୱାଲିଫାୟର୍ସରୁ ଚାରୋଟି ଦଳ ଏବଂ ଆଇସିସି ପୁରୁଷ ଟି୨୦ ବିଶ୍ୱକପ୍ ୨୦୨୧ର ୧୧ଟି ଦଳ ଆପେ ୧୬ଟି ଦଳକୁ ନେଇ ହେବାକୁଥିବା ଟି୨୦ ବିଶ୍ୱକପ୍ ୨୦୨୨ ପାଇଁ ଯୋଗ୍ୟତା ଅର୍ଜନ କରିବେ।
