ଫିଲିପାଇନ୍ସ, ଭାଲାଡୋଲିଡ୍ରେ ରହୁଥିବା କିମ୍ବରଲି ଜୟ ମାଗ୍ବନୁଆଙ୍କର ପିଲାଦିନୁ ଚିତ୍ରକଳା ପ୍ରତି ଥିଲା ଅହେତୁକ ଭଲ ପାଇବା। ହେଲେ ଏନେଇ ସେ କୌଣସି ତାଲିମ୍ ନେଇ ପାରି ନ ଥିଲେ। ଆଉ ବଡ ହେବା ପରେ ସେ ହେଲେ ନର୍ସ। ରୋଗୀ ସେବାରେ ବିତାଇଲେ ସମୟ। କିନ୍ତୁ ଅନ୍ତର୍ନିହୀତ କଳାଟି ବାହରକୁ ବାହାରିବା ପାଇଁ ଖୋଜୁଥିଲା ରାସ୍ତାଟିଏ। ଶେଷରେ କିମ୍ବର୍ଲି ଦିନେ ଜଣେ ରୋଗୀଙ୍କୁ ଇଞ୍ଜେକ୍ସନ ଦେବାବେଳେ ଭାବିଲେ ସିରିଞ୍ଜରେ ଚିତ୍ର କଲେ କେମିତି ହେବ। ଆଉ ତାକୁ ବାସ୍ତବ ରୂପ ଦେବା ପାଇଁ କାନ୍ଭାସ୍ରେ ଅନେକ ପରୀକ୍ଷା ନିରୀକ୍ଷା କଲେ। ଶେଷରେ ସେ ଆରମ୍ଭ କଲେ ଚିତ୍ର କରିବାର ଏକ ନୂଆ ତରିକା। ସିରିଞ୍ଜରେ ରଙ୍ଗ ପୂରାଇ କାନ୍ଭାସ୍ରେ ତିଆରି କଲେ ଅଦ୍ଭୁତ ଚିତ୍ରସବୁ। ବର୍ତ୍ତମାନ ସେ ରୋଗୀଙ୍କ ସେବା କରିବା ସହ ଜଣେ ଭଲ ଚିତ୍ରଶୀଳ୍ପିଭାବେ ମଧ୍ୟ ବେଶ୍ ପରିଚିତ। ତାଙ୍କ ଚିତ୍ରଗୁଡିକ ଫିଲିପାଇନ୍ସର କିଛି ବଡ ବଡ ଓ୍ବେବସାଇଟ୍ରେ ପ୍ରଦର୍ଶିତ ହେଉଛି। ଗୋଟେ ପେଣ୍ଟିଂ କରିବାକୁ ତାଙ୍କୁ ୪-୫ ଘଣ୍ଟା ସମୟ ଲାଗେ। ଏହା ମଧ୍ୟରେ ଅନେକ ଥର ଛୁଞ୍ଚି ବଦଳେଇବାକୁ ପଡିଥାଏ। କାରଣ ରଙ୍ଗ ଯୋଗୁ ତାହା ଜାମ୍ ହୋଇଯାଏ। ଏହି କାମ ସହଜ ଲାଗିଲେ ବି ଆଦୌ ସହଜ ନୁହେଁ। ସିରିଞ୍ଜର ପ୍ଲଞ୍ଜରରେ କେତେ ଚାପ ପକାଇ ଚିପିଲେ ଆବଶ୍ୟକ ମାତ୍ରାର ରଙ୍ଗ ବାହାରିବ ତାହା ଜାଣିବା ଜରୁରୀ। ନଚେତ ଅଧିକ ରଙ୍ଗ ବାହାରି ପେଣ୍ଟିଂ ନଷ୍ଟ ହେବାର ଆଶଙ୍କା ଥାଏ ବୋଲି ୨୪ ବର୍ଷୀୟା କିମ୍ବରଲି କହନ୍ତି।
